Na nugbo tọn, e ma yin nue dọ wefọ ehe te niyẹn. Kakatimọ, e to alọdlẹndo mẹde he jai to linlẹn lọ mẹ dọ e pehẹ nuhahun lẹ kavi avùnnukundiọsọmẹnu lẹ pludopludo podọ, e vọ́ fọnṣite to linlẹn lọ mẹ dọ e penugo bo duto yé ji.

Mì gbọ mí ni lẹnnupọndo lẹdo wefọ lọ tọn ji: “A gbọn kanyinylan dali tọ̀wu dai sẹpọ owhé dodonọ tọn blo; a và gbọjẹtẹn etọn sudo blo. Na dodonọ sọgan jai whla ṣinawe bo na vọ́ fọnṣite, ṣigba, nugbajẹmẹji wẹ na hẹn mẹylankan dahli. Eyin kẹntọ towe jai, a jaya blo, podọ eyin ewọ dahli, a hùnhomẹ blo.”—Howh. 24:15-17.

Mẹdelẹ dọ dọ wefọ 16tọ to alọdlẹndo mẹhe jai jẹ ylando mẹ de bo ka lẹnvọjọ. Sinsẹ̀ngán Grande-Bretagne-nù awe delẹ dọ dọ, “yẹwhehodọtọ hohowhenu tọn podọ egbezangbe tọn lẹ ko yí wefọ ehe zan whlasusu” to aliho enẹ mẹ. Sinsẹ̀ngán lọ lẹ sọ yidogọ dọ pọndohlan enẹ dohia dọ, “e yọnbayi dọ dodonọ de ni jai jẹ . . . ylando sinsinyẹn mẹ bo gbẹ́ yiwanna Jiwheyẹwhe bosọ tindo nukundagbe etọn, na e nọ lẹnvọjọ whepoponu wutu.” Pọndohlan mọnkọ gán jẹeji na mẹhe mọ nọ jlo na nọavùnte sọta ylando. E gán lẹndọ, eyin emi tlẹ waylando whlasusu, Jiwheyẹwhe na nọ jona emi to whepoponu.

Amọ́, e ma yin nue dọ wefọ 16tọ lọ te niyẹn.

Hogbe Heblu tọn he yin lilẹdo “jai” to wefọ 16 po 17tọ po mẹ gán yin yiyizan to aliho voovo mẹ. E gán dlẹnalọdo aijijẹ tlọlọ, enẹ wẹ aijijẹ oyìnsú de tọn to aliji, mẹde he flẹ jai sọn họta kavi zannu de he flẹ jẹ kọmẹ. (Deut. 22:4, 8; Amọ. 9:9) Hogbe lọ gán sọ yin yiyizan to yẹhiadonu-liho dole: “Jehovah nọ deanana afọdide gbẹtọ tọn eyin Ewọ hùnhomẹ do aliho etọn go. Eyin mẹlọ tlẹ jai, e ma na takiti, na Jehovah nọ hẹn alọ go na ẹn.”—Salm. 37:23, 24; Howh. 11:5; 13:17; 17:20.

Enẹwutu, doayi nue weyọnẹntọ Edward H. Plumptre dọ go: “Hogbe Heblu tọn lọ he yin lilẹdo [“jai”] ma yin yiyizan gbede na aijijẹ jẹ ylando mẹ.” Amọ́, weyọnẹntọ devo bayi zẹẹmẹ wefọ 16tọ lọ tọn dole: “Ovọ́ wẹ e na yin nado yinuwa hẹ omẹ Jiwheyẹwhe tọn lẹ to aliho agọ̀ mẹ, na yé na tindo kọdetọn dagbe janwẹ, amọ́ e ma na yinmọ na mẹylankan lẹ!”

Enẹwutu, Howhinwhẹn lẹ 24:16 ma to hodọdo “aijijẹ” jẹ ylando mẹ ji, kakatimọ, pipehẹ nuhahun lẹ kavi avùnnukundiọsọmẹnu lẹ etlẹ yin debọdo-dego lẹ ji wẹ e to hodọ do. To aihọn ylankan ehe mẹ, dodonọ de gán pehẹ nuhahun agbasalilo tọn kavi devo lẹ. E tlẹ gán pehẹ nukundiọsọmẹ sinsinyẹn aṣẹpatọ lẹ tọn. Amọ́, e gán deji dọ Jiwheyẹwhe na nọgodona emi, bosọ gọalọna emi nado pehẹ ninọmẹ lọ po kọdetọn dagbe po. Kanse dewe dọ, ‘Be n’mọ nọ mọdọ nulẹ nọ saba wá yì do ganji na omẹ Jiwheyẹwhe tọn lẹ ya?’ Etẹwutu? Mí kudeji dọ “Jehovah nọ gọalọna mẹhe jlo na jai lẹpo bo nọ jlọ mẹhe dẹ́ do odò lẹpo dote.”—Salm. 41:1-3; 145:14-19.

“Dodonọ de” mọ nọ jaya to whenue mẹdevo lẹ to pipehẹ nuhahun lẹ gba. Kakatimọ, e nọ vivi na ẹn nado yọnẹn dọ “e na yin dagbe na mẹhe dibusi Jiwheyẹwhe nugbo lọ lẹ, na yé dibusi i wutu.”—Yẹwh. 8:11-13; Jobu 31:3-6; Salm. 27:5, 6.