Metrere ni ja mikaka ngite ye ñan aibätä blitata yete, ñakare aune nire tä batire batire ja tuin kukwe tare aune kukwe ñaka nuäre ben biti tä nüketa krö medenbätä blitata bersikulo yekänti.

Bersikulo ye känenkri aune ye bitikäre dre mikata gare ye ani mike ñärärä: “Mä ñaka ja mika känime ni kukwe metre nuainkä ye jue ken kukwe blo nuainkäre, ja düka käi kwe ye ñaka juan ngwarbe kän. Ñan ñobätä aune ni kukwe metre nuainkä raba mate bä kükü tibien, akwa rükaita krö, akwa kukwe tare ye käkwe nitre kukwe käme nuainkä nitai tibien. Mä rüe matadre tibien ngwane, ñaka käi ngwan nuäre jabätä aune ngoto ritadrete ngwane, käi ñan rabadre juto mä brukwäbätä” (Prov. 24:15-17).

Nitre tä mate tibien ja mikabätä ngite akwa raba nementa kwin kukwe ja üairebiti ye ai mikata gare bersikulo 16 yekänti nitre ruäre tä niere. “Nitre kukwe driekä mekerabe aune kä nengwane käkwe texto ye driebarera krubäte kore” tikani sacerdote nibu británico yekwe. Kukwe ne mika tö gare niebare sacerdote nibu yekwe: “Ni töi kwin matadre tibien ja mikabätä ngite, akwa raba Ngöbö tarere jankunu. Ja mikadre ngite kwe batire batire akwa ja töi kwitadre kwe ngwane, yebiti tä nüketa krö” meden gäräta kwetre. Töbikata kore ne tä nemen tuin kwin nitre tö nierare ja mikabätä ngite yei ñobätä ñan aune batire batire ja mikai ngite kwetre ngwane, Ngöbö raba käre ngite juen ta bititre ruin ietre yebätä.

Akwa kukwe ye ñan ai mikata gare bersikulo 16 yekänti.

Kukwe hebreo “matadre tibien” kwitata bersikulo 16 aune 17 yekänti yebiti kukwe keta kabre mika raba nemen gare. Nita mate tibien metre kore mika raba garebiti arato, ñodre, toro krati matadre jite tibien, ni iti ju dokwäte kwin jatadrekä kwintubu o jä chi matadre tibien (Deut. 22:4, 8; Amós 9:9). Kukwe nebiti kukwe bämika raba arato. Ñodre, Salmo 37:23, 24 tä niere: “Ji ni itikwe tä nemen tuin kwin Jehovai ngwane, jie ngwanta kwe. Matai tibien akwa, ñaka rabai kitanintibe tibien ñobätä ñan aune tä neketaninte kisebiti Jehovai” (Prov. 11:5; 17:20).

Ne madakäre, kukwe hebreore matadre tibien “ye ñaka tä blite ja mika ngite yebätä” mikata gare Comentario bíblico Beacon yekwe. Ne ben arato, ni ie kukwe gare krubäte tä bersikulo 16 ye mike gare krörö arato: “Ngwarbe juta Ngöbökwe mikata klabore ja kisete ñobätä ñan aune tätre nemente nire jabätä, akwa ye erere ñaka nemen bare ni blo yebätä”.

Proverbios 24:16 ye ñaka tä blite ni matadre tibien ja mikabätä ngite yebätä, ñakare aune kukwe tare o kukwe ñaka nuäre ben ja tuata batire batire yebätä blitata. Kukwe tare ne näire ni kukwe metre nuainkä raba ja tuin kukwe tare ben. Ñodre, raba näkäin bren, gobrantre raba ja mike krubäte niaratre rüere o kukwe mada mada yebe raba ja tuin arato. Akwa Ngöbö täi ben dimikakäre ja tuakäre kukwe tare yebe ye köböire raba näin ja käne ye täi gare metre ie. Käre kukwe kwin tä nemen bare ni Ngöbö mikaka täte kräke, ¿ñan ererea? ¿Ñobätä kukwe ye tä nemen bare? Bibliabätä kukwe ye mikata gare metre: “Nire bäsi kitera mate tibien ye jökrä Jehovata ketebätä krö aune nire trö ngötötaninbiti kwintubu ye jökrä gakröta kwe” (Sal. 41:1-3; 145:14-19).

Ye medenbätä, nire tä ja tuin kukwe tare ben ye ñaka käita nemen juto “ni kukwe metre nuainkä” yebätä, ñakare aune ni Ngöbö metre jürä ngwanka jabätä ye kräke kukwe kwin tä nemen bare tä nemen gare ie ngwane käita nemen jutobätä (Ecl. 8:11-13; Job 31:3-6; Sal. 27:5, 6).