Tsis yog li ntawd, lub ntsiab tiag yog hais txog tus neeg uas ntsib teeb meem thiab kev txom nyem npaum li cas los nws ua siab ntev thev.

Cia peb nyeem nqi 15 txog 17 peb thiaj to taub lub ntsiab zoo: “Tsis txhob ua li tus neeg siab phem uas pheej nrhiav tswvyim mus nyiag lossis rhuav tus neeg ncaj ncees tej vajtse. Tus neeg ncaj ncees ntog pestsawg zaus los nws yeej sawv taus, tiamsis kev puastsuaj rhuav tshem cov neeg ua phem. Tsis txhob zoo siab thaum koj tus yeebncuab raug kev puastsuaj, thiab tsis txhob zoo siab thaum nws ntog.”​—Pajlug 24:15-17.

Muaj ib txhia xav tias nqi 16 yog hais txog cov neeg uas mus ua txhaum tiamsis ho los lees txim thiab rov sib raug zoo nrog Vajtswv dua. Muaj ob tug thawj coj ntawm txojkev ntseeg hauv tebchaws Askiv sau tias “cov xibhwb thaum ub thiab nimno nquag siv nqi Vajlugkub no li ntawd.” Nkawd hais ntxiv tias “tus neeg zoo txawm nws yuav mus ua txhaum loj heev los tsuav yog nws tseem hlub Vajtswv thiab lees txim ces Vajtswv yeej lees yuav nws.” Cov uas pheej ib sij mus ua txhaum ib zaug yuav nyiam lub tswvyim no heev. Lawv xav tias lawv mus ua txhaum pes tsawg zaus los Vajtswv yeej yuav zam txim rau lawv.

Tiamsis nqi 16 lub ntsiab tsis yog li ntawd.

Lo lus Henplais uas Hmoob muab txhais tias “ntog” hauv nqi 16 thiab 17 kuj txhais tau tias “poob” thiab. Lo lus no siv tau ntau yam xws li tus nyuj ntog rau ntawm kev, neeg poob tsev tuag, lossis lub qe zeb poob rau hauv av. (2 Kevcai 22:4, 8; Amaus 9:9, TT ) Lo lus no kuj siv tau ua lus piv txwv li no thiab: “Tus TSWV [“Yehauvas,” NWT ] yeej yog tus uas coj neeg txoj haukev, thiab yog tus tsomkwm cov neeg uas ua haum nws siab. Txawm yog lawv ntog los lawv yeej tsis pw twjywm, rau qhov tus TSWV [“Yehauvas,” NWT ] yuav tsa lawv sawv.”​—Phau Ntawv Nkauj 37:23, 24; Pajlug 11:5; 13:17; 17:20.

Tus xibhwb Evawj Hes Pla-ris (Edward Hayes Plumptre) hais tias: “Lawv tsis siv lo lus Henplais ‘ntog’ lossis ‘poob’ no rau tus neeg ua ‘txhaum.’ Muaj ib tug neeg txawj ntse piav txog nqi 16 li no: “Ua phem rau Vajtswv cov neeg yeej tsis tau dabtsi rau qhov lawv yeej tsis swb, tsuas yog cov neeg phem swb xwb.”

Raws li tej peb tham tas los no, peb pom tias Pajlug 24:16 tsis yog hais txog kev txhaum tiamsis yog hais txog tej teeb meem lossis kev txom nyem uas tibneeg niaj hnub raug. Lub sim ceeb uas peb nyob no, txawm tus neeg ncaj ncees los yeej raug teeb meem thiab muaj kev mob kev nkeeg. Tej zaum nws kuj raug nom tswv tsim txom vim nws txojkev ntseeg. Tiamsis nws yeej tso siab tias Vajtswv yog nws qhov chaw cuab zog thiab yuav pab nws thaum nws poob tsag, thiab kov yeej nws tej teeb meem. Sim xav seb ua cas Vajtswv cov neeg ho muaj kev zoo siab ua luaj. Twb yog vim rau qhov Yehauvas “pab txhua tus uas raug kev txomnyem; thiab tsa txhua tus uas ntog lawm sawv rov los.”​—Phau Ntawv Nkauj 41:1-3; 145:14-19.

“Tus neeg ncaj ncees” tsis zoo siab thaum lwm tus raug teeb meem. Tiamsis nws zoo siab vim nws paub tias “cov uas hwm thiab paub ntshai Vajtswv yuav tau zoo vim lawv paub ntshai” Vajtswv.​—Tej Lus Qhia 8:11-13; Yauj 31:3-6; Phau Ntawv Nkauj 27:5, 6.