Kebendar iya, ukai baka nya. Ayat tu dituju ngagai orang ke rebah ketegal ditinggang mayuh penanggul, tang ulih angkat baru laban iya mujur tan napi penanggul nya.

Aram kitai meda ayat sebedau enggau pengudah Jaku Dalam 24:16. “Anang baka orang ke jai, ke bekira deka ngerumpak orang ke lurus ati, tauka ngerampas rumah sida. Orang ke lurus ati nyangka rebah tujuh kali, lalu sida angkat baru; tang orang ke jai deka alah laban penusah. Anang gaga ati lebuh munsuh kita rebah, lalu anang gaga ati lebuh sida tesangkut.”—J-lam. 24:15-17.

Sekeda orang ngumbai ayat 16 tu berandau pasal orang ke bedosa tang nesal ati lalu bulih kaul ti manah enggau Petara baru. Ambika chunto, bisi dua iku tuai pengarap ari England nulis: “Orang ke ngajar maya suba sereta diatu udah nerangka ayat tu baka nya.” Sida mega madah, ajar ke baka tu reti iya, “orang manah ulih ngereja dosa ti besai lalu pengerindu iya ngagai Petara nadai kala lenyau ketegal iya nesal ati.” Penemu ke baka tu ulih ngasuh orang deka ngereja dosa. Iya engka berunding, enti iya suah ngereja dosa, Petara agi ulih ngampunka iya.

Tu ukai reti ku ayat 16.

Leka jaku “rebah” dalam bansa jaku Hebrew ulih disalin ngena bemacham chara. Ambika chunto, sapi engka rebah ba jalai tauka orang ke labuh ari perabung rumah. (U-dat. 22:4, 8) Leka jaku tu mega ulih mai reti “tesangkut.” Ambika chunto: ‘Singkang kitai diiring Jehovah, lebuh Iya gaga ati ke ulah kitai; taja pen kitai tesangkut, tang kitai enda rebah, laban Jehovah deka megai jari kitai.’—Mas. 37:23, 24.

Taja pia, peratika utai ke dipadah Profesor Edward H. Plumptre: “Leka jaku [“rebah”] dalam jaku Hebrew nadai kala mai reti bedosa.” Nya alai, seiku agi pakar Bup Kudus nerangka pasal ayat 16: “Nadai guna bejaika nembiak Petara laban sida seruran mujur, tang utai ke digaga orang jai deka puntan!”

Nya alai kitai ulih nyimpulka leka jaku “rebah” ba Jaku Dalam 24:16 ukai ditujuka ngereja dosa. Tang dituju ngagai penanggul ke ditapi kitai baka penanggul ba pengerai, diperinsa perintah mensia tauka penanggul bukai. Tang kitai ulih arapka Petara nyukung sereta nulung kitai mujur napi penanggul nya. Nama kebuah? Laban “[Jehovah] nulung orang ke dituntung penusah. Iya ngangkatka orang ke udah rebah.”—Mas. 145:14-19; 41:1-3.

“Orang ke lurus ati” enda gaga ati lebuh orang bukai ditinggang penusah. Tang iya berasai diperansang ketegal iya nemu, enti orang ‘ngasika Petara, semua utai nadai nama-nama.’—P-jar. 8:11-13; Jop 31:3-6; Mas. 27:5, 6.