Dai hku n re. Marai langai gaw manghkang ni chyahkring hkring hkrum nna kataw tim, bai rawt lu ai hpe tsun mayu ai re.

Dai Chyum daw a lawu lahta ga yan ni a lachyum hpe yu yu ga: “Tara n lang ai wa e, ding hpring ai wa a nta hpe hkum mayun yu et; Shi shanu nga ai shara hpe, hkum shaprai kau ya et. . . . ding hpring ai wa gaw sanit lang kataw ti mung, bai rawt lu na ra ai; Tara n lang ai ni chyawm gaw, tsinyam tsindam hte htum mat na ma ra ai. Nang hpe hpyen ai wa kataw yang, hkum kabu et; Shi ahtu kadawng yang, myit hkum sharawng et.”—Gsh 24:15-17.

Masha nkau gaw, dai daw kaji hpe marai langai mara galaw nna kataw mat tim, myit malai lu yang Karai Kasang hte hku hkau lam bai kaja wa lu ai ngu sawn la ai. Moi prat hte ya prat na tara hkaw sara ni gaw, dai Chyum daw hpe dai lam hku nna sha sanglang dan ai ngu Britin kaw na hpung sara lahkawng ka da ai. “Masha kaja langai gaw mara kaba ni hpe tawt lai hkrup nna kataw mat tim, Karai Kasang hpe tsawra nga dingyang rai nna, myit malai lu ai majaw Karai a myi man bai lu ai lachyum re” ngu nna mung ka da ai. Mara hpe n kam ninghkap ai wa a matu, dai zawn ningmu gaw ra sharawng hpa re. Mara ni hpe kahtap htap galaw tim, Karai Kasang gaw shi hpe galoi mung mara raw ya ai ngu sawn la chye ai.

Raitim, daw kaji 16 a lachyum gaw dai hku n re.

Daw kaji 16 hte 17 hta, “kataw” ngu nna ga gale da ai Hebre ga si hpe lam amyu myu hku nna akyu jashawn mai ai. Lam ntsa kaw dumsu kataw ai, nta magaw na masha hkrat ai, shingrun tum ga de hkrat ai ngu ai lachyum re. (Trj 22:4, 8; Amo 9:9) Dai ga si hpe ndai zawn nbung ai lachyum hte mung lang mai ai: “Yehowa gaw masha sa wa na hku san da nga ai rai nna, Shi a lam hta sharawng awng nga ai. Yehowa shi a lata hpe shadaw ya wu ai majaw, shi kataw yang, taw nan nga na n rai.”​—Shk 37:23, 24; Gsh 11:5.

“[“Kataw”] ngu ai Hebre ga si hpe mara galaw nna kataw ai hta galoi mung nlang ai” ngu Chyum Hpaji Du Edwad H. Plamtra tsun ai. Kaga hpaji du langai gaw, ndai daw kaji 16 hpe ndai hku sanglang dan ai: “Karai a masha ni hpe n tara ai hku kanawn mazum yang, akyu nga na n re. Shanhte gaw ayan na awng dang nga na. Raitim, nhkru ai masha ni gaw hkrat sum na re.”

Ga Shagawp 24:16 gaw mara galaw nna “kataw” mat ai hpe tsun mayu ai n re ai sha, manghkang ni, yakhkak ai lam ni chyahkring hkring hkrum ai hpe tsun mayu ai re. Ndai nhkru ai mungkan hta dinghpring ai wa gaw, hkamja lam manghkang, kaga manghkang ni, asuya ni a zingri zingrat ai pyi hkrum chye ai. Raitim, Karai Kasang madi shadaw ya ai majaw, manghkang ni hpe atsawm hparan lu na hpe shi kam ai. “Karai a mayam ni hpe madi shadaw ya wa ai lam ni hpe myit yu u.” Hpa majaw kun? “Yehowa gaw kataw ai ni mahkra hpe, sharawt ai rai nna, Shagrit kau hkrum ai ni yawng hpe shadaw nga ai” ngu ai hpe anhte kam ai majaw re.​—Shk 41:1-3; 145:14-19.

“Ding hpring ai wa” gaw masha ni manghkang hkrum yang n kabu ai. Karai Kasang hpe hkrit kamyin ai ni mai kaja ai lam lu la na hpe chye ai majaw shalan shabran lam lu ai.​—Hpj 8:11-13; Yob 31:3-6; Shk 27:5, 6.