Kana ngana! Kikyene kyamulombolola ovelusu yiyi. Muvelusu yiyi, okizwelu kudibhala, kilombolola kudibhana ni maka muveji javulu; okizwelu kubalumuka, kilombolola kusunga dingi onguzu.

Tala ngo ojivelusu jamukwa: “Eye u muthu wabhumu, kana kubatamena kudibhata dya muthu wayuka, o kididi kyê bhwa kondamena eye kukisekalese. Kuma o muthu wayuka, né wadibhale lusambwadi, ubalumuka; maji athu abhumuphe, à kajikinina mu kibwika. Kyoso kidibhala o nguma yé, eye kusanguluke; o kya dibhukana, muxima wé ki utane.”—Jisa. 24:15-17.

Amoxi axinganeka kwila ovelesu ya 16 izwela yalungu ni muthu uta kituxi maji mukubhita kithangana amuloloka. Sayi atwameni ayadi ajingeleja ku ixi ya Gra Bretanha asoneka kwila m’ukulu ni mu izuwa yalelu, enemujimbulula mwene kiki ovelesu yiyi. Ene ambe kwila kutendela ovelesu yiyi m’ukexilu yu kubhangesa omuthu kuxinganeka kwila “omuthu wambote utena kudibhala. . . mu ituxi yamakota muveji javulu, maji se udyela mwene utena kubalumuka, utena kusuluka ni kuzola Nzambi, o Nzambi wandamuxikine.” O ukexilu yú wakutendela ovelesu yiyi, usangulukisa yó kabhangawu nguzu phala kulenga o ituxi. Mwene utena kuxinganeka kwila némwene se uta ituxi muveji javulu Nzambi wandamuloloke mu ithangana yoso.

Maji kiki kikyene kyamuzwela ovelesu 16.

Okizwelu mu Hebalayuku kyolungulule, “udibhala” ni “kudibhala” mujivelesu 16 ni 17 atena kujitumbula mumawukexilu avulu. Mukifika itena kulombolola ngombe yabhu kumbandu anjila, muthu wadibhale kutandu a inzo, ditadi dyabhu bhoxi. (Mate. 22:4, 8; Amo. 9:9) Okizwelu kiki atena we kukitumbula kiki, kala kibhita muvelesu yiyi: “Màkanda ma muthu wambote Jihova watambula konda, wendelu wê umuwabhela. Né wadibhale, kadibhaleláku; kuma Jihova umukwata ni lukwaku lwê.”—Jisá. 37:23, 24; Jisa. 11:5; 13:17; 17:20.

Maji tala yazwela omulongexi waxikola phala ojingeleja, amwixana Edward H. Plumptre: “Okizwelu mu Hebalayuku phala [“kudibhala”] kene mukitumbula phala kulombolola kudibhala mu ituxi.” Kiki kidi mwene mukonda sayi mutokwexi wamukwa walombolola kiki ovelesu yiyi: “Kutalatala kyayibha omundu wa Nzambi hadye ngó, mukonda ene andanangenenawu mba kulaya, maji o athu ayibha kana!”

Kyenyikiphe, okizwelu “kudibhala” mudivulu dya Jisabhu 24:16, kikilombolola kuta kituxi, kana. Maji kilombolola kukolokota mu ibhidi mba muhadi némwene muveji javulu. Maji kumundu yú wayibha omuthu wambote utena kudibhana ni maka ni ibhidi yamukwa. Ene atena kwazukutisa mu jinguvulu. Maji ene adyelela kwila Nzambi wandakwabhana nguzu, wandakwatekesa kudibhana ni ibhidi yosoyoso ibhita kumyenyu yâ. Ojiselevende ja Jihova enemuditunda kyambote. Kyenyiki dibhwidise Kiki kibhita mukonda dyahi? Mukonda twadyelela kwila “Jihova ubalumuna oso adibhale, hé ubhetula oso azeka bhoxi.”—Jisá. 41:1-3; 145:14-19.

“Omuthu wayuka” kasanguluka kyoso akwa kyadibhana ni maka mba ibhidi. Muveji dya kiki mwene uximbakata mukwijiya kwila “oso axila Nzambi ene azediwa, oso mwene kyá akala ni woma bhu pholo yê.”—Ndo. 8:11-13; Jobe 31:3-6; Jisá. 27:5, 6.