Nɔ, nɔto dat dis vas min. Dis vas de tɔk bɔt pɔsin we de gɛt prɔblɛm igen ɛn igen bɔt we de ebul fɔ bia.

Tink bɔt di vas dɛn we de arawnd Prɔvabs 24:​16. Dɛn se: “Nɔ le ambush fɔ atak pɔsin we de waka tret na PAPA GƆD in yay nain os, nɔ ambɔg am atɔl; ilɛk ɔmɔs tɛm pɔsin we de waka tret na PAPA GƆD in yay fɔdɔm i de grap bak, bɔt wɛn bad pɔsin fɔdɔm, i nɔ de ɛva grap. Nɔ laf wɛn yu ɛnimi fɔdɔm, nɔ gladi we i staga ɛn fɔdɔm.”—Prɔv. 24:​15-17.

Sɔm pipul dɛn tink se vas 16 de tɔk bɔt pɔsin we sin bɔt we ripɛnt ɛn gɛt tayt padi biznɛs wit Gɔd bak. Fɔ ɛgzampul, tu bigman dɛn pan rilijɔn na Ingland rayt se “pricha dɛn trade ɛn naw dɔn ɛksplen dis vas” da we de. Dɛn tɔk bak se di we aw dɛn ɛksplen dis vas kin min se “i pɔsibul fɔ lɛ gud pɔsin . . . sin siriɔs wan, bɔt i kin stil lɛk Gɔd ɛn Gɔd go stil gladi fɔ am bikɔs i ripɛnt.” Pɔsin we de du bad tin go lɛk di we aw dɛn ɛksplen dis vas. I go tink se ilɛk i de sin igen ɛn igen, Gɔd go fɔgiv am ɔltɛm.

Bɔt nɔto dat vas 16 min.

Dɛn kin yuz di Ibru wɔd we dɛn translet as “fɔdɔm” na vas 16 ɛn 17 difrɛn we dɛn. Fɔ ɛgzampul, i kin min tru tru fɔdɔm lɛk we animal fɔdɔm na rod, we sɔmbɔdi kɔmɔt ɔp ruf ɛn fɔdɔm, ɔ we ston fɔdɔm na grɔn. (Dit. 22:​4, 8; Emɔs 9:​9, NWT) Bɔt da wɔd de kin gɛt difrɛn minin bak. Fɔ ɛgzampul, wan pan di man dɛn we bin rayt di sam buk bin se: “We PAPA GƆD gladi wit pɔsin, i nɔ de kɔmɔt biɛn am; if i bɔk in fut sɛf, i nɔ go fɔdɔm bikɔs na PAPA GƆD [“Jiova,” NWT] de ol in an waka.”—Sam 37:​23, 24.

Bɔt notis wetin wan masta sabi bukman we nem Ɛdwɔd H. Plɔmtri bin tɔk. I se: “Dɛn nɔ de ɛva yuz di Ibru wɔd fɔ [“fɔdɔm”] fɔ min sin.” Wan ɔda masta sabi bukman bin ɛksplen vas 16 dis we. I se: “Nid nɔ de fɔ trit Gɔd in pipul dɛn bad bikɔs bɛtɛ go fala dɛn ɔltɛm, bɔt bɛtɛ nɔ go fala bad pipul dɛn.”

So ɔl dis de sho se Prɔvabs 24:​16 nɔ de tɔk bɔt we pɔsin de sin. Bɔt i de tɔk bɔt we pɔsin de gɛt prɔblɛm dɛn igen ɛn igen. Insay dis wikɛd wɔl we wi de tide, pɔsin we de du wetin rayt go gɛt wɛlbɔdi prɔblɛm ɔ ɔda prɔblɛm dɛn. Sɔntɛnde, di gɔvmɛnt go mek i sɔfa siriɔs wan bikɔs ɔf di fet we i gɛt. Bɔt i go abop pan Gɔd fɔ sɔpɔt am ɛn ɛp am fɔ bia ɛn tinap tranga wan. Aks yusɛf dis kwɛstyɔn, ‘A nɔ dɔn si se bɔku tɛm tin de go fayn fɔ Gɔd in savant dɛn?’ Wetin mek? Di Baybul mek wi biliv tranga wan fɔ se “PAPA GƆD [“Jiova,” NWT] de es udat fɔdɔm ɛn kɔrej udat in at pwɛl.”—Sam 41:​1-3; 145:​14-19.

“Pɔsin we de waka tret na PAPA GƆD in yay” nɔ de gladi we ɔda pipul dɛn de gɛt prɔblɛm. Bifo dat, i kin gladi bikɔs i no se “ɔltin go go fayn fɔ di wan dɛn we de fred PAPA GƆD, bikɔs dɛn rɛspɛkt am.”—Ɛkli. 8:​11-13; Job 31:​3-6; Sam 27:​5, 6.