O cho a wana del o hakioo niŋndo okɔɔ le bolle Baabuileŋ le cho suɛi le. Kɛ, a wana del o bahawɛilaŋ niŋndo okɔɔ le cho suɛi ni. Mi bahawɛilaŋ la yisila wana waa ndoo komallo, kɛ mbo biunuŋ ndaŋ kpou.

Le chɔɔloo hei sinaa, tofawɔ nyɛ sɔɔŋ 15 a 17 dimi wo. “Wa maa wanaa dɛnɛ wɔɔŋnda, a chal mɛŋgɛlaa le chiɛila wanaa tonyaa delɔɔ choo wa le. Wa wana puŋgaa nyɛm pila le. [O yɔŋ bɛɛ mi wana cho sakpo wo o del bɛmbɔɔ le ŋɔmmɛu, chɔnɔŋndo o chaŋ ni mbo sim. Kɛ wana dɛnɛ wɔɔŋndo ndu te nyɛpalaa komal ndu pɛ, o nɔla mbo fula leniŋ te. NWT] Te dɛnɛ palaa o komal yaamɔɔnɔ numndo pɛ, naŋ kɔl le keŋ te. Te nyɛ kindilaa o komal ndu pɛ, duaunuŋ nyaale le keŋ te.”—Pulɔ. 24:​15-17.

Waŋnda apum yiyaŋ maa a wana del o hakioo niŋ teleŋ o teleŋ kɛ mi Mɛlɛka mal ndu haki wo okɔɔ bolle Baabuileŋ le cho suɛi ni. Le taamaseliiyo, mi simlachiaa lepiɛiya a ŋiɔɔŋ o Iŋgilaŋ niŋ dimi maa, “o sindɔɔ niŋ a o teleŋ naa hoo niŋ, o nɛi waa naa choo wanaa dimul waŋnda suɛi Mɛlɛkɛiya tɛɛsial waŋnda bolle Baabuileŋ ndeŋ ni.” Ma hiau lachi a chɔmndo le sabu wanaa dimul waŋnda suɛi Mɛlɛkɛiya tɛɛsiaa leŋ lende wo. Koŋ cho ni maa “o yɔŋ bɛɛ mi wana cho sakpo wo tosa haki wɔɔŋ wɔɔŋndo, kɛ te o nɔ pɛ kaalaa le Mɛlɛka nduyɛ mbo mulul yɔŋndɔ wɔɔŋndo kɔɔ, malɔɔ Mɛlɛka mal ndu haki ni.” Mi wana del o hakioo niŋ teleŋ o teleŋndo naŋ kɔl tau te o tuei pɛ ma tɛɛsiaa bolle Baabuileŋ o nɛiyo hoo choo. Mbo yiyaŋ pɛŋ maa o yɔŋ bɛɛ mbo wa yɔŋnda wɔɔŋndaŋ tosaa daandi daandi, Mɛlɛka cho ndu wa malɔɔ haki.

Kɛ o kpeekpei niŋ, o cho a hei okɔɔ le Pulɔwaa 24:​16 cho suɛi le.

Diom maHibului nda soliŋ kpeku ma hivi diomndo hoo “delɔɔ” wo sim le sɔɔŋ bɔɔbɔɔ. O wa le delɔɔ yɔŋaa hoo. Le taamaseliiyo, mi chɔloo wa kɔlaŋ o nɛi mbo del, naapum mi waŋndo fula o chiɛiyo choo mbo del ɔɔ mi tɛnɛi i del lɛŋ. (Ditɔnɔ. 22:​4, 8; Emɔɔ. 9:​9) Diomndo hoo delɔɔ, sim vɛlɛ le nyɛ cheleŋ. Ndu cho ni: “Te waŋndo tosa kaa nɛŋi Mɛlɛka Yaawɛɛ kɔllo wo pɛ, nyɛ o nyɛ wana koŋ o wa tosaa, mandaa Mɛlɛka manda ndu ni. A yɔŋ bɛɛ aa mi wanaa waa lendiaa ma del, o ve delɔɔ nda bumba chɔnɔŋ te, kani fuule, Mɛlɛka Yaawɛɛ saa nda baa mbo miŋgi nda simi ni.”​—Sam 37:​23, 24; Pulɔ. 11:​5; 13:​17; 17:​20.

Tofawɔ nyɛ Fallo Ɛduwɔ H. Pulɔmtɛɛ dimi wo. “Diom maHibului nda soliŋ kpeku le “delɔɔ” wo sim pɛŋ le delɔɔ o haki niŋ te.” Mi wana sinaa dɛnɛ cheleŋ liima nyɛ dimiŋ o sɔɔŋ 16 niŋndo o nɛiyo hoo choo: “Wanaa Mɛlɛkaa biyɔɔ o nɛi wɔɔŋndo choo, saŋga fondoo fuu koni kanifuule mi Mɛlɛka mala nda ma fula leniŋ. Kɛ wanaa dɛnɛ wɔɔŋnda a fula leniŋ te!”

A tonya, sɔɔŋ muŋ kpou chɔm maa Pulɔwaa 24:​16 cho isɔɔ kposoŋ a delɔɔ o hakioo niŋ te. Kɛ le cho suɛi a wana sɔɔŋ palaŋ yisila komallo wo. O chieeŋ dɛnɛ wɔɔŋndo hoo niŋ, mi bahawɛi kɛndiaa ɔɔ sɔɔŋ palaŋ cheleŋ komal wana cho hoo sakpo wo. Lepum mi masaa waa kɛsi pɛŋ ndu hɔlteŋ kɔɔli le ndu nyɛpalaa tusioo choo le laalaŋ ndɔɔ. Kɛ mbo dɔu tiindaŋndo o Mɛlɛka niŋ le ndu malaa mbo biuŋ nduyɛ, mbo sɔla batiuwaa. Yiyaŋndɔ a mɛɛ kpɛ wanaa Mɛlɛkaa cho batiuwaa sɔlaa a simulta komal ndalaŋ yɛ. Le yɛɛ? Kanifuule, ŋ nɔ tiindaŋndo maa “wanaa cho o nyɛ palaa niŋ nda, mi Mɛlɛka Yaawɛɛ o mala nda, wanaa cho a kɔlta tambɛilaŋ nda, [mbo] nyɔɔlu nda kɔltaŋ.”​—Sam 41:​1-3; 145:​14-19.

“Wana cho sakpo wo” ve a kɔl kɛndɛ le mɛɛ wanaa cheleŋnda cho o bahawɛilaŋ niŋ yɛ le. Kɛ, mbo naŋ kɔl kanifuule o sina maa sɔɔŋ cho bɛnda le wanaa nɔ siooŋnde le Mɛlɛka tonyaa wa.​—Ikili. 8:​11-13; Choobu 31:​3-6; Sam 27:​5, 6.