▪ လံာ်စီဆှံ​တ​ဆၢ​အံၤ တ​အဲၣ်ဒိး​တဲ​ဝဲ​ဒ်​န့ၣ်​ဘၣ်. လၢတၢ်န့ၣ်​အလီၢ် အဲၣ်ဒိး​တဲဝဲ ပှၤလၢ​အ​အိၣ်ဒီး​တၢ်ကီ​တၢ်ခဲ​လၢ အ​မၤ​ကမၣ်​​ဘၣ်​တၢ်​တဘျီ​ဝံၤ​တဘျီ ဘၣ်ဆၣ်​ အ​ဝဲ​တ​ဟ့ၣ်အၡူ​ဘၣ်​ ဒီး​ဂုာ်ကျဲးစၢး​မၤနၢၤ​က့ၤ​ဝဲ​လီၤ.

ဒ်သိး​ပ​က​သ့ၣ်ညါ​တၢ်ဂ့ၢ်​အံၤ​အဂီၢ် ပ​ကကွၢ်​သကိး တၢ်ဂ့ၢ်​လၢ​လံာ်စီဆှံ​တ​ဆၢ​အံၤ အ​ဖီခိၣ်​ဒီး​အ​ဖီလာ်​လီၤ. “ပှၤ​အအၢ​အသီ​ဧၢ, ခိး​ခူသူၣ်​ထီဒါ​ပှၤတီ​ပှၤလိၤ​အဟံၣ်​တဂ့ၤ. မၤ​ဟးဂီၤ​အ​အိၣ်ဘှံး​အလီၢ်​တဂ့ၤ. အဂ့ၢ်ဒ်အံၤ, ပှၤတီ​ပှၤလိၤ​လီၤဃံၤ​နွံ​ဘျီ​ဘၣ်ဆၣ်​ဒီး, က​ဂဲၤ​ဆၢထၢၣ်​က့ၤ​လီၤ. မ့မ့ၢ်​ပှၤ​တတီ​တလိၤ​​ဘၣ်​န့ၣ်​ အ​ခီၣ်​ဘၣ်တိၢ်​ဒီး လီၤဃံၤ​လၢ​တၢ်​ဟးဂီၤ​အ​ပူၤ​လီၤ. တုၤ​န​ဒုၣ်​န​ဒါ​လီၤဃံၤ​ဒီး, သးခု​တၢ်​တဂ့ၤ, ဒီး​တုၤ​အ​ခီၣ်​ဘၣ်တိၢ်​ဒီး, သူၣ်ဖှံ​သးညီ​တဂ့ၤ.”—ကတိၤဒိ ၂၄:၁၅-၁၇.

ပှၤ​တနီၤ​ဆိကမိၣ်​​ဝဲ​လၢ အဆၢဖိ ၁၆ န့ၣ်​ အဲၣ်ဒိး​တဲဝဲ ပှၤလၢ​အ​မၤ​ကမၣ်​တၢ် ဘၣ်ဆၣ်​ အ​ပီၢ်ယၢ်​​လီၤ​က့ၤ​အသး​ဒီး အ​ဝဲ​အ​တၢ်​ရ့လိာ်သး​ဒီး ကစၢ်​ယွၤ​က့ၤ​ဂ့ၤထီၣ်​​ဝဲ​လီၤ. အဒိ, တၢ်​အိၣ်ဖှိၣ်​သရၣ်​ခံဂၤ လၢ​အ​အိၣ်​လၢ​ကီၢ်အဲကလံး​န့ၣ်​ ကွဲး​ဝဲ​လၢ ပှၤ​စံၣ်တဲၤ​တဲ​လီၤ​တၢ်ဖိ လၢညါ​မ့ၢ်ဂ့ၤ, ခဲအံၤ​မ့ၢ်ဂ့ၤ ၡဲ​ပၠးဝဲ လံာ်စီဆှံ​တ​ဆၢ​အံၤ​ဒ်အံၤ “ပှၤတီ​ပှၤလိၤ က​မၤ​​ဘၣ်​တၢ်ကမၣ်​ဖးဒိၣ်​ ဘၣ်ဆၣ်​ အ​ဝဲ​ဆဲး​အဲၣ်​ကစၢ်​ယွၤ အဃိ အ​ပီၢ်ယၢ်​​လီၤ​က့ၤ​အသး​ဒီး အ​ဒိးန့ၢ်​ဘၣ်​က့ၤ ကစၢ်​ယွၤ​အ​တၢ်ဘၣ်သး​လီၤ.” အဃိ ပှၤ​တဂၤဂၤ​လၢ​အ​မၤ​ကမၣ်​​ဘၣ်​တၢ်​န့ၣ်​ က​ဘၣ်သူၣ်​ဘၣ်သး​ဝဲ တၢ်ထံၣ်​တခါ​အံၤ​လီၤ. ​ဘၣ်​သ့ၣ်​သ့ၣ်​ အ​က​ဆိကမိၣ်​​ဘၣ်​လၢ အမ့ၢ်​မၤ​ကမၣ်​​ဘၣ်​တၢ်​တဘျီ​ဝံၤ​တဘျီ ဘၣ်ဆၣ်​ ကစၢ်​ယွၤ​က​ပျၢ် အ​တၢ်ကမၣ်​ထီဘိ​လီၤ.

ဘၣ်ဆၣ်​အဆၢဖိ ၁၆ န့ၣ်​ အခီပညီ​တမ့ၢ်​ဒ်​န့ၣ်​ဘၣ်.

ဧ့ၤဘြံၤ​အ​တၢ်ကတိၤ​လၢ​အမ့ၢ် “လီၤဃံၤ” လၢ​အ​အိၣ်​လၢ အဆၢဖိ ၁၆ ဒီး ၁၇ အ​ပူၤ​န့ၣ်​ အခီပညီ​အိၣ်​အ​ကလုာ်​ကလုာ်​လီၤ. လီၤဃံၤ​အခီပညီ​လိၤလိၤ​မ့ၢ်ဝဲ ကျီၢ်​တဒု​လီၤဃံၤ​လၢ​ကျဲခိၣ်, ပှၤ​တဂၤ​လီၤတဲာ်​လၢ​ဟံၣ်ခိၣ်, လၢၢ်​ဖိ​တဖၣ်​အိၣ်လီၤတဲာ် လၢ​ဟီၣ်ခိၣ်​လိၤ​လီၤ. (၅ မိၤၡ့ ၂၂:၄, ၈; ဧၤမိၣ်​ ၉:၉) တၢ်ကတိၤ​အံၤ အခီပညီ​လၢ​အဂၤ​အိၣ်​စ့ၢ်ကီး​​ဝဲ​လီၤ. အဒိ, “ယွၤ​ဒုး​ထွဲ​ပှၤကညီ​အ​ခီၣ်​လီၤ. ဒီး​မုာ်လၤ​​ဝဲ​လၢ​အကျဲ​လီၤ. မ့ၢ်​လီၤဃံၤ​​ဝဲ​ဘၣ်ဆၣ်​ဒီး တ​ဟးဂီၤ​တုၤ​အလၢာ်​ဘၣ်. အဂ့ၢ်ဒ်အံၤ, ယွၤ​မၤစၢၤ​အီၤ​လၢ​အ​စု​လီၤ.”—စံးထီၣ်​ပတြၢၤ ၃၇:၂၃, ၂၄; ကတိၤဒိ ၁၁:၅; ၁၃:၁၇; ၁၇:၂၀.

ဆိကမိၣ်​ကွၢ် Professor Edward H. Plumptre တဲ​ဝဲ​လၢ “ဧ့ၤဘြံၤ​အ​တၢ်ကတိၤ​လၢ အမ့ၢ် [လီၤဃံၤ] န့ၣ်​ တ​အဲၣ်ဒိး​တဲဝဲ တၢ်ဒဲးဘး​နီတဘျီ​ဘၣ်.” အဃိ ပှၤ​ကူၣ်​ဘၣ်​ကူၣ်သ့​တဂၤ တဲ​ဝဲ​ဘၣ်ဃး​ဒီး အဆၢဖိ ၁၆ လၢ “ကစၢ်​ယွၤ​အခ့အပှၤ​တဖၣ်​ က​ပူၤဖျဲးဝဲ မ့မ့ၢ်​ပှၤအၢ​ပှၤသီ​န့ၣ်​ တ​ပူၤဖျဲး​ဝဲ​ဘၣ်​ အဃိ​ပ​မ့ၢ်​ရ့​ဒီး ကစၢ်​ယွၤ​အခ့အပှၤ​အၢ​အၢ​သီသီ​န့ၣ်​ အခီပညီ​တအိၣ်​ဘၣ်.”

အဃိ တၢ်ဂ့ၢ်​သ့ၣ်​တဖၣ်​အံၤ ပာ်ဖျါ​ထီၣ်​ဝဲ​လၢ ကတိၤဒိ ၂၄:၁၆ န့ၣ်​ တ​အဲၣ်ဒိး​တဲ​ဝဲ​ဘၣ်ဃး​ဒီး ပှၤ​မၤ​​ဘၣ်​တၢ်ဒဲးဘး​န့ၣ်​ဘၣ်. လၢတၢ်န့ၣ်​အလီၢ် အဲၣ်ဒိး​တဲဝဲ နီၢ်ကစၢ်​တၢ်ကီ​တၢ်ခဲ​တဖၣ်, တၢ်​ဂံၢ်စၢ်​ဘါစၢ် မ့တမ့ၢ် တၢ်ကမၣ်​လၢ​ပ​မၤ​​ဘၣ်​အီၤ တဘျီ​ဝံၤ​တဘျီ​လီၤ. မုၢ်မဆါ​တနံၤ​အံၤ ပ​အိၣ်မူ​​ဘၣ်​လၢ ဟီၣ်ခိၣ်​လၢ​အ​အိၣ်​ပှဲၤ​ဒီး တၢ်အၢ​တၢ်သီ​အဃိ ပှၤတီ​ပှၤလိၤ​ဒၣ်လဲာ် ထံၣ်​ဘၣ်​ဒီး​တၢ်ဆူး​တၢ်ဆါ ဒီး​တၢ်ကီ​တၢ်ခဲ​တဖၣ်​လီၤ. ခီဖျိ​လၢ အ​ဝဲ​အိၣ်ဒီး​တၢ်နာ်​ကစၢ်​ယွၤ​အဃိ ​ဘၣ်​သ့ၣ်​သ့ၣ်​ ပဒိၣ်​ပပှၢ် က​မၤအၢ​မၤနး​အီၤ​လီၤ. ဘၣ်ဆၣ်​ အ​ဝဲ​နာ်​ဝဲ​သပှၢ်​ကတၢၢ်​လၢ ကစၢ်​ယွၤ​က​မၤစၢၤ​အီၤ ဒ်သိး​အ​လဲၤခီဖျိ​တၢ် က​န့ၢ်​အဂီၢ်​လီၤ. သံကွၢ်​လီၤ​န​သး​လၢ ‘မ့ၢ်​ယ​ထံၣ်​ဘၣ်​လၢ ကစၢ်​ယွၤ​အခ့အပှၤ​တဖၣ်​ မၤတၢ်​ကဲထီၣ်​လိၣ်ထီၣ်​စ့ၢ်ကီး​ဧါ.’ ​ဘၣ်​မနုၤ​အဃိ​လဲၣ်. ခီဖျိ ပ​သ့ၣ်ညါ​လၢ​ယဟိဝၤ​ယွၤ “မၤစၢၤ ကယဲၢ်​ပှၤလၢ​အ​လီၤဃံၤ​တဖၣ်, ဒီး​ဝံၣ်ဆၢထၢၣ်​ ကယဲၢ်​ပှၤလၢ​အ​သကူး​ဝဲ​ခဲလၢာ်​လီၤ.”—စံးထီၣ်​ပတြၢၤ ၄၁:၁-၃; ၁၄၅:၁၄-၁၉.

“ပှၤတီ​ပှၤလိၤ”န့ၣ်​ ဖဲ​အ​ဝဲ​ထံၣ်​ဘၣ်​ပှၤဂၤ ဘၣ်ကီ​ဘၣ်ခဲ​အခါ အ​တ​သးခု​ဘၣ်. လၢတၢ်န့ၣ်​အလီၢ် အ​ဝဲ​ဟ့ၣ်ဂံၢ်​ဟ့ၣ်ဘါ​ပှၤဂၤ ခီဖျိ​အ​သ့ၣ်ညါ​​ဝဲ​လၢ “တၢ်ဂ့ၤ ကအိၣ်​လၢ​ပှၤ​ပျံၤ​ယွၤ​အဂီၢ်, ပှၤလၢ​အ​ပျံၤတၢ်​လၢ​အမဲာ်ညါ​အဂီၢ်​လီၤ.”—စံၣ်တဲၤ​တဲ​လီၤ​တၢ် ၈:၁၁-၁၃; ယိၤဘး ၃၁:၃-၆; စံးထီၣ်​ပတြၢၤ ၂၇:၅, ၆.