Chi ve teˇ tawn ve tcuhˉ kuiˬ lehˬ awˬ tehˬ kʼo chi hkʼe kʼoˆ gaˇ ve maˇ heˆ. Chi ve teˇ tawn tcuhˉ kuiˬ lehˬ, chaw teˇ gʼaˇ shoꞈ shaꞈ ve gʼa hpuˇ peuˬ kaꞈ gʼa hpuˇ leh yawˇ laiˉ pawˆ paiˍ˗e ve htaꞈ shuˍ ve yoˬ. Yaꞈ hkʼaˇ, yawˇ kʼawꞈ tu la gʼa leh shoꞈ shaꞈ ve htaꞈ tawˍ daꞈ leh yeunˇ hkanˍ gʼaˇ ve yoˬ.

Chi ve teˇ tawn htaꞈ teˇ geh nyi sheˍ. Tawˇ naˉ ve liꞈ 24:15-17 hkʼaw kʼoˆ ve, “hteˇ ve cawˇ ve chaw hui htaꞈ hiˉ yuˬ lu yuˬ tuˬ dawˇ nyi chehˇ ve haiˬ ve chaw hkʼe nawˬ taˇ te. Hteˇ ve cawˇ ve chaw lehˬ hkʼaˬ nyiˇ pawˆ paiˍ ve htawˇ, kʼawꞈ tu la ve yoˬ. Yaꞈ hkʼaˇ, haiˬ ve chaw lehˬ luˬ kʼai sheˆ kʼai tuˬ yoˬ. Nawˬ ve canˇ paˍ dawˇ haˍ tuˬ kuiˬ lo gaˬ ve htaꞈ nawˬ gʼa mawˬ htaˇ, taˇ ha lehˬ. Yawˇ hkui htiˇ poˬ ve teˇ yanˇ htawˇ, nawˬ taˇ ha lehˬ.”

Kaˇ nanˉ ehˉ 16 hkʼaw kʼoˆ taˍ ve htaꞈ chaw teˇ hpaˍ chi hkʼe dawˇ ve, chaw teˇ gʼaˇ venˇ baˆ te yaꞈ ve htawˇ dawˇ hpfuhˆ leh Gʼuiˬ sha geh kʼawꞈ meuˆ daꞈ la ve htaꞈ kʼoˆ gaˇ ve tehꞈ dawˇ ve yoˬ. Tawˆ pa haˉ te kʼo, Eˍgaˍlanˍ mvuhˇ miˬ hkʼaw bon awˬ hoˉ 2 gʼaˇ kʼoˆ ve, bon maˍ paˍ oˇ htaˇ teˇ co˗e leh chi beuꞈ teˇ co˗e kaꞈ chi ve teˇ tawn htaꞈ chi hkʼe kʼoˆ maˍ ve yoˬ. Yawˇ hui kʼawꞈ kʼoˆ ve, “hteˇ ve cawˇ ve chaw lehˬ, venˇ baˆ uiˍ jaˇ ve htaꞈ te peuˬ kaꞈ te leh . . . paiˍ˗e ve htawˇ, yawˇ Gʼuiˬ sha htaꞈ haꞈ ve maˇ yawˇ kʼai. Yawˇ venˇ baˆ te yaꞈ ve htaꞈ teˇ pawˆ le le dawˇ hpfuhˆ ve pa taw Gʼuiˬ sha venˇ baˆ hpehˇ piˇ ve yoˬ.” Yaꞈ ve awˬ ceuˬ te gaˇ ve htaꞈ tawˍ daꞈ tuˬ maˇ loˍ tehꞈ dawˇ ve chaw lehˬ, tawˇ hkawˇ chi ve htaꞈ dawˇ cawˇ ve yoˬ hehˉ. Awˬ lawn kʼo, yawˇ venˇ baˆ hkʼaˬ nyiˇ pawˆ te ve htawˇ, Gʼuiˬ sha yawˇ htaꞈ hkʼaˬ htaˆ kaꞈ venˇ baˆ hpehˇ laˇ ve tehꞈ dawˇ ve yoˬ.

Yaꞈ hkʼaˇ, kaˇ nanˉ ehˉ 16 hkʼaw ve tcuhˉ kuiˬ lehˬ, chi hkʼe kʼoˆ gaˇ ve maˇ heˆ.

Kaˇ nanˉ ehˉ 16 leh 17 hkʼaw Heˍbrehˇ hkawˇ kʼo “paiˍ˗e ve” tcuhˉ kuiˬ lehˬ laiˉ ceuˬ cawˬ ve yoˬ. Chi ve lehˬ paiˍ˗e ve maˇ heˆ leh ce la ve htaꞈ kʼoˆ gaˇ ve yoˬ hehˉ. Tawˇ pa haˉ te kʼo, nuˇ yaꞈ kʼaw hkʼoˆ lo paiˍ˗e ve, chaw yehˬ hkʼoˆ lo ce la ve, maˇ heˆ kʼo haˉ pui shiˍ ce la ve htaꞈ kʼoˆ gʼa ve yoˬ. (Bon maˍ ve 22:4, 8; Aˍmoˆ 9:9) Chi ve teˇ hkawˇ lehˬ awˬ nu ve tcuhˉ kuiˬ kaꞈ cawˬ sheˍ ve yoˬ. Tawˇ pa haˉ te kʼo, Chiˇ mvuh ve liꞈ 37:23, 24 hkʼaw kʼoˆ ve, “Gʼuiˬ sha lehˬ, chaw teˇ gʼaˇ yawˇ kʼai cawˇ ve yaꞈ kʼaw htaꞈ beˆ maˍ piˇ leh, yawˇ nyi ma cawˇ ve chaw htaꞈ haꞈ shaˉ piˇ ve yoˬ. Yawˇ paiˍ ve htawˇ, oˇ kaˬ lo ceh tiˉ zuhꞈ chehˇ taˍ tuˬ ve maˇ heˆ. Awˬ lawn kʼo, Gʼuiˬ sha yawˇ htaꞈ kʼawꞈ cawˍ tu piˇ tuˬ yoˬ.”—Tawˇ naˉ ve 11:5.

Chi ve teˇ hkawˇ tcuhˉ kuiˬ laiˉ ceuˬ cawˬ ve htawˇ, chaˬ nyi tehˆ nyi paˍ Eˆveuꞈ H. Hpa˗hteuˇ kʼoˆ ve, “Heˍbrehˇ hkawˇ kʼo chi ve teˇ hkawˇ lehˬ venˇ baˆ te ve htaꞈ kʼoˆ gaˇ ve maˇ heˆ.” Leh chaˬ nyi tehˆ nyi paˍ teˇ gʼaˇ kaˇ nanˉ ehˉ 16 htaꞈ chi hkʼe kʼawꞈ kʼoˆ maˍ laˇ taˍ ve, “Gʼuiˬ sha ve chaw htaꞈ naˬ tuˬ te piˇ ve awˬ bon maˇ cawˬ. Yawˇ hui htaꞈ aˬ htoꞈ ma te piˇ ve htawˇ, yawˇ hui a shaꞈ gʼa ponˬ tuˬ yoˬ. Yaꞈ hkʼaˇ, haiˬ ve chaw chi hkʼe maˇ hpehꞈ.”

Chi htaꞈ pa taw, Tawˇ naˉ ve liꞈ 24:16 hkʼaw venˇ baˆ te yaꞈ ve htaꞈ kʼoˆ gaˇ ve maˇ heˆ. Yaꞈ hkʼaˇ, tuꞈ ve hkanˍ ve gʼa hpuˇ peuˬ kaꞈ gʼa hpuˇ ve htaꞈ kʼoˆ gaˇ ve tehꞈ hpeuꞈ maw laˇ ve yoˬ. Haiˬ ve miˬ guiˬ chi hkʼoˆ lo hteˇ ve cawˇ ve chaw lehˬ, chehˇ sha cawˬ sha hpawˇ maˇ heˆ leh awˬ nu ve awˬ lawn shoꞈ shaꞈ ve kaꞈ gʼa hpuˇ ve yoˬ. Yawˇ htaꞈ mvuhˇ miˬ uˉ peunˍ paˍ ciˍ yanˍ piˇ jaˇ ve htawˇ, yawˇ shoꞈ shaꞈ ve gʼa hpuˇ htaˇ, gu gʼa leh yeunˇ hkanˍ gʼaˇ tuˬ, Gʼuiˬ sha ga laˇ tuˬ tehꞈ yonˍ ve yoˬ. Gʼuiˬ sha ve kanˉ te ve chaw shoꞈ shaꞈ ve gʼa hpuˇ ve htawˇ, awˬ leh meuˇ htaˇ hkʼa dehꞈ gu gʼa ve htaꞈ nawˬ gʼa mawˬ ve hkʼaˬ nyiˇ pawˆ gaˬ˗oˬ ve htaꞈ dawˇ nyi sheˍ. “Dawˇ haˍ gaˇ haˍ chehˇ ve chaw hui htaꞈ yawˇ ga piˇ leh, paiˍ ve chaw hui htaꞈ yawˇ cawˍ tu piˇ ve yoˬ” tehꞈ ngaˬ hui yonˍ gʼa ve yoˬ.—Chiˇ mvuh ve 41:1-3; 145:14-19.

Ngaˬ hui gʼa mawˬ ve “hteˇ ve cawˇ ve chaw” lehˬ shu shoꞈ shaꞈ ve gʼa hpuˇ ve htaꞈ gʼa mawˬ htaˇ, ha lehˬ ve maˇ heˆ. “Gʼuiˬ sha htaꞈ kawˆ chehˇ ve kʼo, awˬ ceuˬ hkʼa peu˗eˬ daꞈ la tuˬ yoˬ” tehꞈ yawˇ shiˍ ve pa taw awˬ gʼaˇ gʼa ve yoˬ.—Cuˇ yiˍ piˇ ve 8:11-13; Yawˇbaˆ 31:3-6; Chiˇ mvuh ve 27:5, 6.