Eyi vesi keshi mukiko yalumbununako. Oloze yatalisa kumutu uze eji kumikanga chamokomoko nakuhita muukalu wauvulu.

Talenu hachihande chosena. Ngwacho: “Kanda nauswama kwakamwihi nazuvo yamuka-kwoloka mangana umulukukeko. Kanda naukenyeka chihela chenyi chakutwamako. Muka-kwoloka nahase kulimbuka mapapa 7 nakukatuka cheka, oloze muka-kuhuka mwalimbuka nalupi. Nge muka-kole wove mwalimbuka, kanda nauwahililako, kachi nge mwahukana, muchima wove kanda nauwahililako.”—Vishi. 24:15-17.

Vatu vamwe vashinganyeka ngwavo vesi 16 yahanjika hamutu uze mwalinga shili, nakupihilila nakwalumuka. Chakutalilaho, vatwamina vamauka akwitava vavali vakuEngland vasonekele ngwavo, “vaka-kunangula vamukwitava vakushikulu nava vamakumbi ano, vanazachisanga chisoneka kana” mujila kaneyi. Ava malunga vahanjikile ngwavo vishinganyeka kana vyasolola nge “mutu wavilinga vyamwaza nahase kulimbuka . . . hakulinga shili yayinene, oloze mwatwalaho kuzanga Kalunga nakumwivwila uselewa kuli Kalunga.” Shikaho, vatu vaze kavazanga kwecha kulinga shiliko, vanahase kuwahilila hakwivwa vishinganyeka kana. Ngocho vanahase kushinganyeka ngwavo numba tuhu navalinga shili mapapa kakavulu, Kalunga mwavakonekela.

Oloze ou keshi ukiko ulumbunwiso wavesi 16 koko.

Lizu lyachiHepeleu valumuna ngwavo “kulimbuka” chipwe ‘kuhukana’ muvesi 16 na 17, vanahase kulyalumuna mujijila jajivulu. Chakutalilaho, vanahase kulizachisa kutalisa kuli kanyama uze nalimbuka mujila chipwe mutu uze naholoka kufuma helu yazuvo chipwe lilolwa lize linaholokela hamavu. (Lushi. 22:4, 8; Amo. 9:9) Lizu kana vanahase nawa kulizachisa mujila yachifwanyisa. Chakutalilaho, mujivesi jimwe vasonekamo ngwavo: “Yehova eji kutwaminyinanga jitambo jamutu, kachi nge namwivwila kuwaha. Numba tuhu mwahukana, oloze keshi kulimbila hamavuko, mwomwo Yehova mwamukwata kulivoko.”—Samu 37:23, 24; Vishi. 11:5.

Ivwenu mazu ahanjikile mutu alinangula chikuma walijina lyaEdward Hayes Plumptre. Ambile ngwenyi: “Lizu lyachiHepeleu valumuna ngwavo kulimbuka, kavalizachisa kumutu uze nalingi shiliko.” Kaha mutu mukwavo alinangula chikuma, ahanjikile havesi kana ngwenyi: “Chapwa hikulishina kuyanjisa vatu jaKalunga, mwomwo lwola lwosena veji kufukilanga. Oloze vaka-kuhuka kavafukilako.”

Shikaho, muchishishisa chakuhanjika ngwetu lizu kulimbuka lize vavuluka hali Vishimo 24:16, lyalumbununa kulinga shili, oloze twatela kutachikiza ngwetu lyalumbununa kumona vihuli, numba vene mapapa kakavulu. Mukatwamino kamyaka yino kakapi, muka-kwoloka nahase kumona ukalu wakufwana nge kuviza, naukalu weka. Vanahase kumuyanjisa kuli vaka-fulumende mwomwo yavyuma afwelela. Oloze atela kufwelela ngwenyi Kalunga mwamukafwa omike nakufukila. Lihulisenu ngwenu, ‘Kutala kangweshi nakumona omu vyuma vyeji kuvawahilanga vangamba jaKalungako tahi?’ Mwomwo ika vyuma vyeji kuvawahilanga? Mwomwo Mbimbiliya ngwayo, “Yehova eji kukwachililanga vosena vaze vali nakulimbuka, eji kwololanga vosena vaze vanazembama.”—Samu 41:1-3; 145:14-19.

Shikaho “muka-kwoloka” keshi kuwahililako, nge vakwavo vali nakumona ukalu. Oloze eji kukwatanga ngolo hakutachikiza ngwenyi, “vaze vevwa Kalunga wamuchano woma vyuma navivawahila mwomwo vamwivwa woma.”—Kwambu. 8:11-13; Yopa 31:3-6; Samu 27:5, 6.