Imu dimwatalisha iyi vasi wanyi. Ilaña yatalisha kudi muntu wamonaña kukala kwakuvulu hela yihuñu ilaña yenda yomika.

Tushinshikenu mazu atachi muniyi vasi nianakunkululiwu nachu. Nawu: “Eyi muntu watama, bayi wakabelamina kwashakama mukwakuloñaku; bayi wakakisañana hindi hanokelañayuku; muloña muntu waloña wadimbukaña mapampa katanu nakayedi chanyamukayi hohu; ilaña antu atama afwaña kwawu puchi nayuma yakala. Neyi chilumbu cheyi nadimbuki bayi wuzañalalaku; hakamudimbwishawu heseki bayi wakatiya kuwaha mumuchima weyuku.”—Yish. 24:15-17.

Antu amavulu ahoshaña nawu vasi 16 yatalisha kudi muntu wavulumunaña ilaña yabalumuka. Akulumpi jamachechi ayedi akuEngland asonekeli nawu “antañishi akunyima niamakonu dichalumbululañawu iyi vasi.” Abombelelihu nawu iyi yitoñojoka yatalisha mukwila nawu “muntu wamuwahi nateli kukoña . . . nshidi jasweja, ilaña watwalekañahu kumukeña Nzambi nawa wabalumukaña mumuchima mpinji yejima yinavulumuniyi.” Yitoñojoka yamuchidiwu yinateli kuletesha muntu kutwalekahu kukoña nshidi. Nateli nikutachika kutoñojoka nindi hela neyi yavulumuna mapampa kakavulu, Nzambi wukumwanakena.

Imu dimwatalisha wanyi vasi 16.

Izu dachiHeberu dabalumunawu nawu “wadimbukaña” nidakwila nawu “nadimbuki” muvasi 16 ni 17 anateli kudizatisha munjila yamboka-mboka. Dinateli kutalisha kukudimbuka kutweluka chidi neyi, ñombi nadimbuki munjila, muntu naholoki hamalata hela neyi kalubutu kaholoka heseki. (Kuhit. 22:4, 8; Amosa 9:9) Idi izu anateli kudizatisha cheñi muchifwikija, neyi chinamwekeshiwu: “Mwendañayi muntu Yehova diyi wakoleshañamu, yena njila yindi wayitiyaña kuwaha; Hela wukudimbuka, hakudimbuka chikupu hamasekuku; muloña Yehova namukwati chachiwahi nachikasa chindi.”—Mas. 37:23, 24; Yish. 11:5; 13:17; 17:20.

Hela chochu, talenu chikuma chashimwiniyi Professor Edward H. Plumptre, nindi: “Izu dachiHeberu dazatishawu nawu “wadimbukaña” hiyadizatisha kutalisha kukukoña nshidiku.” Hela chochu, muntu mukwawu wadiza wakunkulwili iyi vasi 16 nindi: Chatama kukabisha antu jaNzambi, muloña wena atwalekañahu kwila yuma yayiwahi ilaña antu atama nehi!”

Dichi, yuma yejimiyi yinakumwekesha nawu Yishimu 24:16 hiyatalisha kukukoña nshidiku, ilaña yatalisha kukukala hela yihuñu yitwamonaña. Mukanu kaayi katama, muntu waloña nateli kukatakata hela kumona kukala kukwawu. Anateli nikumukabisha kudi nfulumendi hamuloña wachikuhwelelu chindi. Ilaña nateli kukuhwelela nindi Nzambi diyi nkwashi yindi nawa wukumukwasha kuumika nikushinda kukala. Toñojokenu yuma chiyayendelaña chiwahi ambuña Nzambi. Muloñadi? Twakuhwelela chikupu netu “Yehova wayikwataña chachiwahi ejima adimbukaña, Wayihindwishaña wejima wawu anoñamaña.”—Mas. 41:1-3; 145: 14-19.

“Muntu waloña” hazañalalaña neyi antu anakukabakanaku. Ilaña wakundejewaña, muloña weluka nindi “atiyaña woma kumesu indi, akamona kuwaha.”—Mukwa. 8:11-13; Yoba 31:3-6; Mas. 27:5, 6.