Dik tak chuan, chu chu he Bible châng sawi tum a ni lo. Chu aiin, miin vawi tam tak harsatna leh buainate hmachhawn mah se, chûngte chu chhel takin a tuar chhuak ṭhîn tih a sawi tumna zâwk a ni.

A chhehvêl chângte hi han ngaihtuah teh: “Aw, mi suaksualpa, mi felte awmna chu châng suh; a awmna chu tihchhiatsak suh. Mi fel chu vawi sarih tlu mah sela, a tho leh zêl ṭhîn; mi suaksual erawh chu chhiatnain a tiboral ṭhîn. I hmêlma a tlûkin lâwm suh la, tihtlâwma a awmin i rilru lâwm suh se.”—Thuf. 24:15-17.

Mi ṭhenkhat chuan châng 16-na hi ngaihdam theih thil sual titu chungchâng sawina niin an ngai a. British sakhaw hruaitu mi pahnih chuan “hmân lai leh tûn laia thuhriltute chuan chu Bible châng chu chutiang awmze nei chuan an hmang nasa hle,” tiin an sawi. Chu hrilhfiahna chu “mi ṭha chu sual lian tak tiin . . . a tlu thei a; mahse, Pathian a hmangaihna chu a hloh ngai lo va, vawi tam tak inchhîrna lantîrin a tho leh ṭhîn,” tihna a ni ang tiin an sawi belh a. Chu ngaih dân chu sual do duh lo ṭhenkhat tân pawm a nuam hle ngei ang. Ani chuan thil sual a tinawn fo a nih pawhin, Pathianin ngaidam reng tûrah a ngai mai thei a ni.

Mahse, chu chu châng 16-nain a sawi tum a ni lo.

Châng 16 leh 17-naa “tlu” tih leh “tlûk” tia lehlin Hebrai thu mal chu kawng tam taka hman theih a ni a. Chu chuan a tak taka tlu, a nih loh leh tla—kawnga bâwngpa tlu, inchung aṭanga tla, a nih loh leh buh fang leia tla—sawina a ni thei a. (Deut. 22:4, 8; Amos. 9:9) Chu ṭawngkam chu entîr neia hman a ni thei bawk, entîr nân: “LALPA chuan an kalna tûrah a hruai ṭhîn a, a duh zâwng titute chu a vêng ṭhîn. Tlu mah sela, an tlu hlen lo vang, LALPAN a kutin a chelh reng si a.”—Sâm 37:23, 24; Thuf. 11:5; 13:17; 17:20.

Mahse, Professor Edward H. Plumptre-a’n: “Hebrai thu mal [“tlu”] tih chu thil sual tihnaa tlûkna sawi nâna hman a ni ngai lo,” tia a sawi hi lo chhinchhiah ang che. Chu bâkah, Bible lama mi thiam dang leh chuan he châng 16-na hi heti hian a khaikhâwm a ni: “Pathian mite dik lo taka cheibâwl chu engmah hlâwkna a awm lo, mahni intihchhiatna mai a ni ang; anni chu an dam khawchhuak ang a, mi sualte erawh chu an boral dâwn si a!” tiin.

Thufingte 24:16-na hi nungchang bawlhhlawhna lama suala “tlu” sawina ni lovin, buaina leh harsatnate hmachhawn fona lam sawina a ni zâwk. He khawvêl suaksual takah hian, mi fel chuan hrisêlna lama harsatnate leh buaina dangte a hmachhawn thei a. A rinna avângin sawrkâr thuneitute’n nasa takin an tiduhdah pawh a ni thei bawk. Mahse, chûngte chu tuar chhuak thei tûrin Pathianin a ṭanpui ang tih a ring tlat thei a ni. Chuvângin, ‘Pathian chhiahhlawhte tân dinhmunte a ṭha zâwngin a inher chhuak fo ṭhîn tih ka hmu a ni lâwm ni?’ tiin inzâwt ang che. Engvângin nge? “LALPA chuan tlute zawng zawng chu a chelh reng ṭhîn a, kun ngawih ngawiha awm zawng zawngte chu a kaitho ṭhîn,” tia tiam kan nih avângin.—Sâm 41:1-3; 145:14-19.

“Mi fel” chuan mi dangin harsatnate an hmachhawn hian a lâwm lo va. Mahse, “Pathian ṭihtute erawh chu, amah ngei an ṭih avângin an tluang ang,” tih a hriat avângin thlamuanna a nei a ni.—Thur. 8:11-13; Job. 31:3-6; Sâm 27:5, 6.