Ali tsakuijin nchja̱ni versículo jebi, jé nchja̱ni xi kjitʼa kjoa faʼatojin tonga chókjoajinle.

Nga ngisa nda koa̱njinná, itso versículo xi ngikʼa: “Alikuijin xi chʼaotjín bʼendajin ya chrian ndʼiale chjota xi kixi, alijojin nikoai ʼnde jña síkjáya. Tsakui nichxin saʼnda ñato kʼa ska̱ je chjota xi kixi, tonga kuisótjenni; tonga je chjotatsʼen jé kjoañʼai sikaténgi. Kʼianga ska̱ je kontrali, ali tsjoajin mali; kʼoa kʼianga sa̱téngi, ali tsjoajin male ni̱ma̱li” (Prov. 24:15-17).

Tjínkʼa je chjota xi kʼoatso nga ya versículo 16 jé xotsole je chjota xi jée tsaojin tonga xi nda batio ijngokʼani ngixko̱n Niná. Jao naʼmi xi Gran Bretaña tsʼe kʼoakitso nga “tjín je xi tsoyason, xi tsakatio ngasʼa kʼoa xi tjío ndʼaibi xi kʼoasʼin majinle texto jebi”. Je naʼmi jebi kʼoati i̱ kitso: “Tsa kʼoalanisʼin tínchja̱ni texto jebi, tojo tsjoakejin koa̱n Niná jngo xi nda chjota kʼiatsa ai jée koa̱njngí kʼoa skanni kʼoamale jmeni xi sʼín kʼianga ñandia ñandia bajngijée”. Je kjoafaʼaitsjen jebi sasénle je chjota xi tsín bʼénele yaole nga síkʼéjna xi chʼaotjín, nga̱ kʼoajinsʼin síkjaʼaitsjen nga sichatʼale Niná nga ñandia ñandia koa̱njngijée.

Tonga ali tsakuijin jebi xi tínchja̱ni ya versículo 16.

Je én hebreo xi “ska̱” sʼin faʼatoya xi faʼaitʼa ya versículo 16 kao 17, nkjín koya josʼin tsoyanile. Kʼoati kui xotsole nga ñaki tsoaa. Tobʼelañá, joma jngo nra̱ja̱ xi katsʼotjen ya yandiaa, joma jngo xi ndʼiale kajenngi kʼoa joma nga kajinʼnde jngo la̱jao̱ (Deut. 22:4, 8; Amós 9:9). Je én jebi sakʼoaa totsoyanile jme xi nchja̱ni, jolani nga i̱ tso texto jebi: “Kʼianga sasénle je Jeobá josʼín jngo chjota, jé bándiaale. Ninga ska̱, alikui toya koájnatsʼotjen, nga̱ jé Jeobá kitsoa ntsja” (Sal. 37:23, 24; Prov. 11:5; 17:20).

Je libro xi Comentario Bíblico Beacon ʼmi, kʼoatso nga je én hebreo xi “ska̱” sʼin faʼatoya, ali tsakuijin xotsole kʼianga jée tsaojiaan. Xi ijngosani, ijngo chjota xi Biblia kotʼayason itso tʼatsʼe versículo 16: “Toxitsjoa kʼoa tiñájin si̱kiʼaonñá yaoná tsa josi̱koaa je naxinandále Niná, nga̱ njengile yaole je, kʼoa je chjotatsʼen mai”.

Ya Proverbios 24:16, ali tsakuijin tínchja̱ni kʼianga jée tsaojiaan, kui tínchja̱ni kʼianga kjoa bitjatojiaan. Nichxin xi tiyoaa ndʼai, tsakui nichxin nkjín kʼa kjoa kjoaʼatojin je chjota xi kixi. Tobʼelañá, tsa chʼin kʼoetʼale, tsa chjotaxá koaitjenngike kʼoa tsa kjaʼaísa kjoa kjoaʼatojin. Tonga kʼoati koa̱n kʼoejngo kon nga je Niná tsjoánganʼiole. Koasenkao nga chókjoajinle je kjoa xi kjoaʼatojin. Jméni xi binyakao je xi Niná síxále kʼianga me tokjitʼa nga nda bichótsjoá jmeni xi sʼín. Ya Biblia kʼoatso nga je Jeobá basenkao je xi jeme tsao kʼoa kjomitjen je xi aon tjío ni̱ma̱le (Sal. 41:1-3; 145:14-19).

Je xi kixi alikui tsjoa male kʼianga kjoa faʼatojin xi kjaʼaí. Tonga tsjoa sʼe kon kʼianga be nga nda koatio je xi tsokjónke Niná xi kixi (Job 31:3-6; Sal. 27:5, 6; Ecl. 8:11-13).