Lasi, ia anina na dia una. Ina siri ese hekwakwanai momo e davarimu to e haheaukamu tauna e herevalaiamu.

Mani Hereva Lada-isidia 24:16 badina siridia aita itadia: “Basio bani tao, kara dika tauna ese kara maoromaoro tauna ena ruma e bani henia taomu na heto; ena ruma na basio ḡiḡia dobi. Badina be kara maoromaoro tauna na nega hitu e ketomu, ma e tore isimu; a kara dika taudia na hahehisi karadia ese e doridia dobimu. Oi inaimu e ketomu negana ai na basio hisi dae; e hetutuhimu negana ai na lalomu basine moale.”​—Her. 24:15-17.

Haida na e laloamu siri 16 ese e kara dikamu to gabeai e helalo-kerehaimu tauna e herevalaiamu. Hegeregere, England ai tomadiho igunalaina taudia rarua na e gwa, “haroro taudia momo, idaunegai bona hari ina negai, ese ina siri” na unu e herevalaia toma. Danu ma e gwa, una hereva anina na “tau namona ta na kara dika badana ta baine karaia, to dounu Dirava baine lalokau henia bona ena lalonamo baine abia diba, badina e helalo-kerehai.” Kara dika se uramu baine dadaraia tauna ese una lalohadai na be abia daemu, reana be laloamu: ‘Ena be baina kara dika loulou, to hanaihanai Dirava ese egu dika na be gwautaomu.’

To siri 16 ena hereva anina na dia una.

Siri 16 bona 17 ai Heberu gado amo e hahanaia herevana “keto” eiava moru na dala idauidau ai baine heḡaukaralai diba. Hegeregere, animal ta dala ai e ketomu, tau ta guhi amo e morumu, eiava nadi maraḡina ta tano ai e morumu. (Deu. 22:4, 8; Amo 9:9) Danu una hereva na laulau dalanai e gaukaralaia, hegeregere: “Tau namona ena ae-raka na Iehova ese e reḡuamu, bona ena dala e moalelaiamu tauna na ia ese e haginiamu. Ia na baine keto, to basine moru dobi; badina be Iehova ese ia imana amo e dogoa taomu.”​—Sal. 37:23, 24; Her. 11:5; 13:17; 17:20.

Profesa Edward H. Plumptre ese e gwauraia herevana mani aita haeroa, e gwa: “Heberu gado ai e hahanaia herevana [“keto”] na dia kara dika e herevalaiamu.” Danu Baibul mai dibana namonamo tauna ta ese siri 16 na ini e herevalaia toma: “Dirava ena taunimanima ba hadikadia na asi anina badina hanaihanai be kwalimumu, to kara dika taudia hari basie kwalimumu!”

Una ese e hahedinaraiamu Hereva Lada-isidia 24:16 na dia ta e kara dikamu karana e herevalaiamu, to ta ese hekwakwanai idauidau e davari louloumu karana e herevalaiamu. Ina tanobada dikana lalonai, kara maoromaoro e badinaiamu tauna na reana gorere bona hekwakwanai idauidau be davarimu. Eiava reana ena abidadama dainai gavamani ese be daḡedaḡe heniamu. To, e abia daemu Dirava ese ia na be duruamu unu hekwakwanai be haheaukalaimu bona be kwalimumu. Nega momo bo itaiamu Dirava ese ena hesiai taudia na e durudiamu. Dahaka dainai? Badina “Iehova ese e ketomu taudia iboudiai na e abidia isimu; e nunumaidia tarimu taudia iboudiai na ia ese e veridia toremu.”​—Sal. 145:14.

“Kara maoromaoro tauna” na e itaiamu haida ese hekwakwanai idauidau e davarimu neganai, ia ese una na se moalelaiamu. To ia e moalelaiamu ḡauna na ina: “Dirava garina e garimu taudia na bae namo, badina be ia vairanai e garimu.”​—Koh. 8:11-13; Iobu 31:3-6; Sal. 27:5, 6.