An realite, sa verse-la pa pe rod dir sa. Sa verse-la pe koz lor enn kikenn ki pe fer fas ar boukou problem, me ki reisi andire.

Anou get kontex sa verse-la: “Pa vinn kouma enn move ki pe atann pou piez enn dimounn ki zis, pre ar so lakaz. Parski enn dimounn zis, kapav tonbe set fwa, me a-sak fwa li pou releve; me enn move dimounn pou tonbe akoz maler. Kan to lennmi tonbe, fode pa to kontan; ek kan li manke tonbe, fode pa ki to leker dan lazwa.”​—Prov. 24:15-17.

Sertin dimounn panse ki verse 16 koz lor enn kikenn ki fer pese me ki repanti, ek ki re-gagn so lamitie avek Bondie. Par exanp, de sef relizie Angle ti ekrir ki bann predikater dan lepase ek dan nou lepok explik sa verse-la dan sa fason-la. Zot ti dir osi ki sa verse-la pe rod dir ki “enn bon dimounn kapav fer enn gran pese ek anmemtan kontign kontan Bondie ek ena enn bon relasion avek Li parski li’nn repanti.” Enn dimounn ki pe fer bann move kitsoz kitfwa pou bien kontan sa lexplikasion-la. Kitfwa li pou panse ki mem si li fer pese plizir fwa, Bondie pou touletan pardonn li.

Me se pa dan sa fason-la ki bizin konpran verse 16.

Ena plizir fason pou konpran mo Ebre ki’nn servi pou “tonbe” dan verse 16 ek 17. Nou kapav konpran li dan enn fason literal. Par exanp, enn zanimo ki’nn tonbe lor semin, enn dimounn ki’nn sap lor twa so lakaz ek ki’nn tonbe, ouswa enn ros ki tom anba. (Det. 22:4, 8; Amos 9:9) Me sa mo-la kapav osi ena enn lot sans, kouma par exanp: “LESEGNER gid nou lor bon sime e li protez bann ki swiv drwatir. Si zame enn bon dimoun tonbe vit-vit LESEGNER pou ed li leve.”​—Ps. 37:23, 24; Prov. 11:5; 13:17; 17:20.

Selman, get seki Profeser Edward H. Plumptre ti dir: “Zame pa servi mo Ebre [“tonbe”] pou fer referans ar pese.” Akoz sa, enn lot exper explik sa verse-la koumsa: “Li pa servi nanye ki maltret pep Bondie parski zot pou touletan reisi, alor ki bann move dimounn pa pou reisi!”

Alor, tou sa bann lexplikasion-la montre nou ki Proverb 24:16 pa pe koz lor pese, me lor bann problem ek bann difikilte ki souvan nou gagne. Azordi, dan sa move lemond ki nou pe viv la, bann dimounn ki zis kitfwa ena bann problem lasante ouswa bann lezot problem ankor. Ouswa kitfwa zot pe gagn bann persekision akoz bann gouvernman. Me zot kapav sir ki Bondie pou soutenir zot ek ed zot pou andir sa bann sitiasion-la. Reflesi komie fwa tomem to finn trouv bann serviter Bondie reisi! Wi, nou kapav sir ki Zeova “soutenir bann ki pe tonbe e li relev bann ki kourbe.”​—Ps. 41:1-3; 145:14-19.

“Enn dimounn zis” li pa ere parski lezot ena bann problem. Okontrer, li rasire parski li kone “ki sa pou fini bien pou bann ki ena lakrint pou vre Bondie, parski zot ena lakrint pou Li.”​—Ekle. 8:11-13; Zob 31:3-6; Ps. 27:5, 6.