Awe foo, asi vino icikomo cii cikapiliula. Lelo, cikalanda pa muntu aakakwata intazi zingi nupya akazizimizya.

Lekini tulole icikomo icili uku cisila nu ku nkoleelo yakwe Mapinda 24:16: “Utateyamila umuntu umusuma apakuti umwiyile, nanti ukumononela ing’anda. Umuntu mololoke nanti angapona amaila 7, wene alakatuka nupya. Lelo umwipe wene nga wapona, atalakatuka. Utasansamuka nga walola kuno iviipe vyaponela umwanisi wako.”—Mapi. 24:15-17, NWT.

Yamwi yakaelenganya ukuti icikomo 16 cikalanda pa muntu uwacita uluyembu lelo walapila nu kutwalilila ukuya na ucuza usuma na Leza nupya. Ya simapepo yamwi yaili aku England yalemvile ukuti vikwene avino ya simapepo a mpiti na andakai yakalondolola icikomo cii. Yalanzile nu kuti: “Canguka sana umuntu umusuma ukucita uluyembu ulwipisye nu kutwalilila ukutemwa Leza, lyonsi lino walapila kuli vino watacita.” Umuntu asilonda ukuta ukucita iviipe angatemwa ulondolozi uu. Angaelenganya ukuti nanti icakuti akuswilizyapo ukuyembuka, Leza alamweleela.

Nomba vii asi vino icikomo 16 cikapiliula.

Izwi lya Ciyebulai lyakuti ‘ukupona’ ilyaya umu cikomo 16 na 17 lingaomviwa umu nzila izingi. Lingapiliula ukupona kwa cumi cumi, wakwe ing’ombe yatipona pa museo, umuntu wapona apipaala, nanti iwe lyapona pansi. (Malan. 22:4, 8; Amo. 9:9) Izwi kwene lii nupya lingapiliula ivipusane wakwe vino lyaomviwa paa ukuti: “Yawe [nanti Yeova] aliwe akatungulula intampulo muno umuntu angapita ningo, nu kumuzanzya cikamuzanzya ndi walola vino akutampula ningo. Ndi wapona asisyala alambalile, pano Yawe aliwe akamulemelela, akatuka.”—Masa. 37:23, 24; Mapi. 11:5; 13:17; 17:20.

Nomba uvwini vino uwasambilila pa vya mapepo Edward H. Plumptre walanziile, watiile: “Izwi lya Ciyebulai ilyakuti [“ukupona”] litaomviwapo uku kulanda pa kucita uluyembu.” Uwasambilila na muze walondolwile icikomo 16 ukuti cisi campomvu ukucuzya antu yakwe Leza pano yene yakatunguluka, lelo aipe yene foo!

Fwandi ilembelo lya Mapinda 24:16, lisilanda pa kucita uluyembu lelo likalozya ku ntazi zino tungakwata, izingatwalilila ukuyako. Umu nsi ino twikalamo ndakai, umuntu umololoke angakwata intazi izili wa kulwala ni ntazi zyuze. Limwi angazunyiwa nu uteeko pa mulandu nu utailo wakwe. Nomba angatwalilila ukutaila ukuti Leza angamutungilila nu kumwazwa ukuzizimizya nu kucimvya. Elenganyini pa nsita izingi zino mwalolako kuno ivintu vikuzipila aomvi yakwe Leza. I cani icalenga? Twasininkizya ukuti Yeova “akaazwilizya yayo yonsi ali umu ntazi nga nu kukatusya yonsi yao apona.”—Masa. 41:1-3; 145:14-19.

Umuntu mololoke asitemwa ndi cakuti yauze yakucuula. Lelo akauvwa ningo nga welenganya ukuti “antu yano yakaoopa Leza yene yakaya nu longo.”—Kasa. 8:11-13; Yobo 31:3-6; Masa. 27:5, 6.