Sɩd-sɩdã, vɛrse-kãngã pa rat n yeel woto ye. Vɛrse wã sẽn gomd lʋɩɩs yellã yaa ned sẽn na n segd zu-loees wʋsgo, tɩ ne rẽ fãa bɩ a yikdẽ, rat n yeel t’a kelld n tõogda toogo.

D ges b sẽn deng n yeel bũmb ning n yaool n na n wa yeel woto wã, la b sẽn yeel bũmb ning rẽ poorã. B yeelame: ‘Da soos n dɩgl bẽdg nin-tɩrg yiri, n na n maan a wẽng ye, la f ra sãam a vʋʋsgã zĩig ye. Bala, nin-tɩrg tõe n lʋɩɩ naoor a yopoe, la a na n leb n yikame. La toog na n luba nin-wẽnga. Fo bɛ sã n lʋɩ, bɩ f ra maan sũ-noog ye. A sã n lak n na n lʋɩ bɩ f ra kɩdem ye.’—Yel. 24:15-17.

Neb kẽer tagsdame tɩ vɛrse 16 gomda ned sẽn na n maand yel-wẽnd n yɩlemdẽ, tɩ wakat fãa bɩ Wẽnnaam kõt-a sugri. Wala makre, Ãngeletɛɛr tũudum taoor dãmb a yiib wilgame tɩ pĩndã la baa masã, kiris-neb ne yʋʋrã koe-moondb wʋsg n sɩd bilg vɛrse-kãngã võor woto. B paasame tɩ b sẽn bilgd vɛrse-kãngã võor woto wã rat n yeelame tɩ nin-tɩrg tõe n maanda yel-wẽn-kãsemse, tɩ baa ne rẽ bɩ Wẽnnaam ket n nong-a, tɩ wakat fãa bɩ a tekd yam n kot sugri. Vɛrse wã võor sã n sɩd yaa woto, dẽnd ned sẽn pa maood n na n bas yel-wẽnã na n nonga vɛrse-kãngã. A tõe n tagsame tɩ baa a sã n maand yel-wẽn n yɩlemdẽ, Wẽnnaam na n kõt-a-la sugr wakat fãa.

Vɛrse wã võor yaool n pa woto ye.

Ebre gom-bil ning b sẽn lebg vɛrse 16 ne 17 wã pʋgẽ tɩ “lʋɩ” wã võor tõe n yɩɩ toor-toore. Tõe n yɩɩ lʋɩɩs sɩdem-sɩdem, wala makre, loalg sẽn na n lʋɩ n gãe sor zugu, ned sẽn yi roog zug n lʋɩ, pa rẽ bɩ kugr sẽn na n yi yĩngr n lʋɩ tẽnga. (Tõo. 22:4, 8; Amoos 9:9) La lʋɩɩsã tõe n talla võor a to. Wala makre, Biiblã yeelame: “Sẽn-Ka-Saab kɩtdame tɩ ned kẽnd yɩ sõama, la a manesem tata bãmb yam. Yẽnda sã n salge, a ka lʋɩt tẽng ye, bala, Sẽn-Ka-Saab gãda yẽnda nugu.”—Yɩɩn. 37:23, 24; Yel. 11:5; 13:17; 17:20.

Bãngd a ye yʋʋr sẽn boond t’a Edward Plumptre yeelame: “Ebre gom-bil ning b sẽn lebg tɩ [“lʋɩ”] wã, pa tol n gomd yel-wẽnd yell ye.” Bãngd a to me togsa a tagsg vɛrse 16 zug n yeel yaa: “F sã n dat n nams Wẽnnaam nin-buiidã, yaa zaalem, bala f pa na n tõog ye. B na n põsame, la nin-wẽnsã pa põsd ye.”

Dẽnd woto fãa wilgdame tɩ Yel-bũn 24:16 pa gomd wẽngã pʋgẽ lʋɩɩs yell ye. A gomda ned sẽn na n paamd zu-loees n yɩlemdẽ yelle. Dũni-wẽn-kãnga pʋgẽ, nin-tɩrg tõe n maooda ne bãaga, wall yɛl a taaba. Goosneema wã tõeeme meng n namsd-a wʋsg a tũudmã yĩnga. La a tõe n basa a yam tɩ Wẽnnaam teend-a lame, la t’a na n sõng-a lame t’a kell n yals kãn-kãe. Rẽ yĩnga, yãmb pa tar kaset sẽn wilgd tɩ sɩd yaa woto ne Wẽnnaam nin-buiidã? D kɩsa sɩd t’a Zeova “kokda sẽn lʋɩtbã, la b yikda neb nins pãng sẽn sɛ wã.”—Yɩɩn. 41:2-4; 145:14-19.

“Nin-tɩrg” pa maand sũ-noog ne neb a taabã sẽn paamd zu-loeesã yĩng ye. La a sũur noomame, a sẽn mi “tɩ sẽn zoet-b Wẽnnaamã na n paama sũ-noogo, bãmb sẽn zoet Wẽnnaamã yĩngã.”—Koɛ. 8:11-13; Zoob 31:3-6; Yɩɩn. 27:5, 6.