Awe asa vino lyo-o iwaliko likalandapo. Lelo likalanda pa muntu wino akatwalilila ukusipicizya asa mulandu nu kuvula kwa ntazi zino zingamukonka.

Pakuti twivwicisye cino lyo-o iwaliko likalandapo, twatalicila ukuwazya pa vesi 15 tufike napa 17. Pakuti: “Utati wavwamilila umulungamane pa n’ganda pa mwa kwe, utakonone pano akapuzila. Cingatenga umuntu umulungamane agapona impindi 7 ukuwa ukukatuka kweni alikatuka. Awawipe weni nga waponelwa ni ntazi wakalala waponelela wowonye. Cisi acizima ukusecelela umulwani wako nga waponelwa ni ntazi.”—Imilu. 24:15-17.

Wamwi wakalanda ukuti lyo-o iwaliko likalanda pa muntu wino akaluvyanya lelo wino akatwalilila ukulapila pakuti atwalilile ukuwa we ciwuza wa kwe Leza. Ku cakulolelako, wa simapepo wawili awa ku England walenvile ukuti “wakasambilizya awavule ukufuma na kalinye avino wakasambilizya pe lyo-o iwaliko.” Walanzile nu kuti “umuntu umuzima nanti angacita uluwembu ulukulu wuli lelo nga atalesile ukukunda Leza swinya walapila angatwalilila ukuwa we ciwuza wakwe.” Ya-a mazwi yangalenga wino asilapila ukwivwa icete nga wayawazya. Swinya yangalenga awalola ukuti nanti angatwalilila ukuwembukanye e Leza angatwalilila ukumutetela.

Lelo co-o asa cisinka cino vesi 16 ikalandapo.

Izwi lya ciHeberi lino wawonvya mu vesi 16 ne 17 ilya kuti “ukupona” lingapiliwula ukupona kwa cisinkanye. Ku cakulolelako, inyama ingapona pano ikupita, umuntu angapona pa musonje ni liwenye na lyonye lingapona. (Amasu. 22:4, 8; Amos. 9:9) Lelo lingawa nu wupiliwulo na wunjinye. Ku cakulolelako,“Imfumu e Leza akatungulula umuntu umutende mu nzila yino akupita. Swinya akasecela ni myata yakwe. Ndi wapona atange alange ali paponye amuno imfumu e Leza alimwavwa ukukatuka.”—Amalu. 37:23, 24; Imilu. 11:5; 13:17; 17:20.

Lelo e Professor uwi zina lya kwe Edward H. Plumptre wino wasambilila ivya mu Baibolo walanzile icisinka icicindame sana, watili: “Izwi lya kuti [“ukupona”] mu ciHeberi lisisula ukuwembuka.” Winji wino wasambilila pa vya mu Baibolo walanzile pa mazwi ya mu vesi 16 ukuti: “Kwawa akuyicuzya vye ukucuzya awantu wa kwe Leza, amuno lyonsinye weni wakatunguluka, ukuwa awawipe weni wakalowa!”

Vyonsinye vyo-o vikulanjizya ukuti iwaliko lya Imilumbe 24:16 lisilanda pa kuwembuka. Lelo likalanda pa muntu wino akatwalilila ukupita mu ntazi. Mwe yo-o insi yino twisilemo imbipe, umulungamane angapita mu ntazi invulenye ndi vino ukulwala nu kumucuzya ku wamuwuteko pa mulandu wi suwilo lyakwe. Lelo akasuwila ukuti e Leza alitwalilila ukumutunjilila nga nu kumwavwa ukutwalilila ukusipicizya, swinya wonye wo-o avino tukalola ku wawonvi wakwe. Acani cino cikalenga ukuti ivintu vyawazipila? E Baibolo ikati, ‘E Yehova akakwavwa wonsinye wano wali ni ntazi, swinya akakatusya wonsi wano wakakwelengulwa.’—Amalu. 41:1-3; 145:14-19.

Acino “umulungamane” asisecelela nga walola wamwi wakupita mu ntazi. Lelo akawomelezwa nkaninye nga wizuka ukuti ‘wano wakatina Leza wa cisinka ivintu vikawazipila pa mulandu wa kuwa na katina kwe weliwe.’—Ekawi. 8:11-13; Job 31:3-6; Amalu. 27:5, 6.