Nē xoas ge di ǂâibasen tama hâ. Nē xoas ge khoe-i hîna ǂgui ǃgomsin ǃnâ ra ǃkharu i xawe nēsa ra mâǃkharu i xa ra ǃhoa.

Ha re î da nē xoas ais ai tsî khaos ai hâ xoade kō: “Tāts eloxoresatsa ǃapi ǂhanu-aib di ǁanǃkhais ǁga, îts ǁgoeǃkhais âba tā hîǀhuru. ǂHanu-aib ge hû ǃnādi kōse ǁnā tsî ǁkhawa nîra khâi xuige, xawe eloxoresan ge ǂkhabab ǃnâ nîra ǃnôa. Tā ǃgâiaǂgao khākhoeb âts ga ǁnāǃnubai; tsî ǃnôab kao, tā dâ.”—ǂKhm. 24:15-17.

ǀNî khoen ge ra ǂâi 16ǁî ǁaraǃās khoe-i hîna ǁore tsî Eloba ǃoa ǁkhawa ra oaǀkhī i xa ra ǃhoa di. ǀGam ǁkhāǁkhā-aoga Englandi ǃnâ hâ ga ge ge xoa “aoǁnâ-aon ǃkharu gere ǁaeb tsî nēsi hân nē xoasa” ti ra ǁnâuǃā ǃkhaisa. ǁÎgu ge ra mî nē xoas ge ra ǁgau “ǃgâi khoe-i hîna . . . tsūxūna ra dī i Eloba ǀnama a ūhâba ǁkhāsa. Tsî i dī i ra tsūxūna xu a ūdawasen ǁkhā” ǃkhaisa. Nēti i ǂâiǀgaub ge ǁnān hîna tsûxūna dīs xa a ǃgâibahena a ǃgâiba. ǁÎ-i ge ra ǂâi ǃnās hoasa i ga ra ǁore ob Eloba ǁî-e nî ǀûba di.

Xawe nēs ge 16ǁî ǁaraǃās di ǂâibasen tamasa.

Hebremîs hîna “ǁnā” tsî “ǁnās” ti 16ǁî tsî 17ǁî ǁaraǃāra ǃnâ ra mîhes ge ǂgui ǃnâgu ǀgaugu ǃnâ a sîsen-ūhe ǁkhā. Aiǁgause i ge xamani-e daob ai a ǁnā ǁkhā, tamas ka io khoe-e oms daksa xu a ǁnā ǁkhā tsî ǂgari ǀuiro-e a ǁnā ǁkhā. (Deu. 22:4, 8; Amo. 9:9) Nē mîs ge ǀkhara xū-i tsîna a ǂâibasen ǁkhā. Aiǁgause, “khoeb di ǃgûs ge ǃKhūb xa ra ǁapoǁapohe, daob âb ga ǃgâiba bio. ǁNāb rao, ob aoxūhe tama, ǃKhūb ra ǃommi âba ǂkhâǃnâ amaga.”—Psa. 37:23, 24; ǂKhm. 11:5; 13:17; 17:20.

ǂAnsa ūhâ khoeb Edward H. Plumptreb ge mî xū-e ǃgaoǃgâ re. ǁÎb ge ge mî: “Hebreǁî mîs [“ǁnā”] di hâs ge ǁoreba ǃoa ǁnaeǁgau tama hâ.” ǀNî khoeb ǂansa ūhâb ge 16ǁî ǀaraǃās xa ra mî: “Hui tama i ge hâ Elob di khoena ǃgâi tamase hâ-ūsa. ǁÎn ge nî ǃgâiǃgâ, xawe eloxoresan ose.”

Nēs ge ra ǁgau ǂKhoamîdi di 24:16 ǁoreba ǃoa ǁnaeǁgau tamasa. Xawe ǃnâkorobe da ra hōǃgâ ǃgomsina ǃoa ra ǁnaeǁgausa. Nē eloxoresa ǃhūbaib ǃnâ i ge ǂgomǂgomsa khoena ǀaeb ǃgomsin, tamas ka io ǀkhara ǃgomsina a hōǃgâ khā. ǁÎ-i ge ǂhanub xas tsîna a ǃgôaǃgonhe ǁkhā ǁî-i di ǂgoms ǃaroma. ǁÎ-i ge Elob ai nî ǂgomaiǂnui tsî nî huihe nē ǃgomsin ǃnâ mâǀgaisa. Aitsama du dîsen re, ‘matikō ǃnâde ta ge mû nēs Eloba ra ǃoaba khoen ǀkha ra īsa?’ Tae-i ǃaroma? ǂGomǃgâsiba da ge ūhâ “ǃKhūb ge ǁnā ran hoana ra ǂkhâǃnâ, tsîb ge ǃgamǃgâ hân hoana ra ūkhâi.”—Psa. 41:1-3; 145:14-19.

‘ǂHanu-ai’ khoen ge nau khoen ga ǃgomsin ǃnâ hâ o ǃgâiaǂgao tama hâ. ǁÎn ge a ǂan “Eloba ga ǃaon nîra ǃgâibahe ǃkhaisa, ǁnān, ais âba ga ǃaona.” Tsî nēs xan ge ǁîna ra ǂkhâǃnâhe.—Aoǁn. 8:11-13; Job. 31:3-6; Psa. 27:5, 6.