Kati oko ca talekesa eci cinimbu. Vunoni, eci cinimbu cemanena muntu ue ku uila mu visoti ni vitanga via kama kaha mu nima yaco a katuka ni nguetu a vi vula.

Tu hilulenu vinimbu vikuavo via lihata naco: Cinimbu ca helu nguaco: “Kati u vandamene, A mukua vipi, vukalo vua mukua vuviuke; kati u enieke vuhuimino vueni.” Kaha cikeco nguaco, “Muomu mukua vuviuke a ua lutanu na luvali, na ku katuka naua, vunoni vakua vipi va ua ku luvinda.” Kaha cinimbu ca kuintsi nguaco; “Kati u viukilile omo citozi cove a ua, kaha kati u tave mutima uove ku zolela omo na u.”​—Visi. 24:15-17.

Vamo ve ku handeka nguavo, cinimbu 16 cemanena muntu ue ku uila mu vupi na ku katuka naua. Vamo vakuluntu vavali va ku malombelo a ku Inglaterra va sonekele nguavo: “vakua ku ambulula vavengi cipue va ku laza ni va ku ntsimbu ino, ve ku pangesa eci cinimbu caco mu njila eyi vene.” Kaha va vuezeleko naua nguavo: “eci ca lomboloka ngecize muntu ua cili a hasa ku uila mu vupi vua kama, vunoni ke ku zimbalesa cilemo ceni kuli Njambi kaha ue ku katuka naua mu ku aluluka, nkala ntsimbu ye ku linga vupi.” Ku lombolola eci cinimbu mu cifua eci ci hasa ku ya ku mutima ua muntu ali na ku linga vupi. Muomu a hasa ku singanieka ngueni, cipue nga na vulumuna ku hilukila na ku hilukilamo Njambi a ka mu ecela ntsimbu yose.

Kaha eci ka ci litombola na vutumbe vua cinimbu 16.

Lizi lia ciHevelu li va tumbula ha cinimbu 16 na 17 nguavo “a ua” ni “nau” citava ku lipangesa mu vinjila via vingi. Li hasa ku lomboloka ku ua mpundu ngeci mua ngombe a ua mu njila, muntu a lahuka ha ntsimba, ni nona ya mbuto i uila ha mavu. (Ndeu. 22:4, 8; Amose 9:9) Lizi liaco citava naua ku lipangesa mu cimueso lika, ca ku muenako imo Samo nguayo: “Ku-enda ca yala Yehova a ci kolesa; Kaha a viukilila njila yeni. Vutuhu a ua, ke ku ua ha mavu liapa; Muomu Yehova a mu kuatesa na livoko lieni.”​—Visa. 37:23, 24; Visi. 11:5; 13:17; 17:20.

Vunoni halakanenu nguli ya handekelele mulongisi Edward H. Ngueni: “Na hamo hahi ha va pangesa lizi ku ua mu ciHevelu, mu ku handeka via ku uila mu vupi.” Ngeci mukemuo umo mulongisi mukuavo, ua lomboluele cinimbu 16 ngueni: “Ku luisa vantu va Njambi ca pua ku lisina ngoco na ku livula ove ivene, muomu kasi ve ku ovoka, vunoni vakua vupi ve ku nonga!”

Ku tsiha mpanga, Visimo 24:16, ka ya handekele via “ku ua” mu vilinga ngeci mua ku uila mu vupi. Vunoni lia handeka via ku uila mu visoti via vingi kaha naua kusua kumo. Mu mavu ano a api, mukua vuviuke a hasa ku hita mu visoti via cihindu ni visoti vieka via kama. Ni va hasa ku mu luisa cikuma kuli vakua nguvulu. Vunoni ua kulahela ngecize, Njambi ikeye mukuasi ueni kaha a ka mu kuasa linga a hase ku kolesa na ku vula nkala cisoti caco. Aci singaniekenuho, vintsimbu vingahi mua limuena vangamba va Yehova va hita mu visoti na ku vi vula? Mua vusunga via vingi. Omo lia vika? Muomu tuli na vusunga ngecize, “Yehova a kuatesa vose va lahuka, kaha a katula vaze vose va na kotama.”​—Visa. 41:1-3; 145:14-19.

“Mukua vuviuke ke ku viukilila” mu ku tantekeya ngecize vakuavo vali na ku pinda na visoti. Vunoni ue ku ivua ndzolela mu ku tantekeya ngecize, “va ka mona via cili vaze va vuila Njambi vuoma, vaze va mu zuzukila.”​—Ekel. 8:11-13; Yombi 31:3-6; Visa. 27:5, 6