Amo. Ni versículo kineki kiijtos kema se akajya ajachika kiixnamiki kuesoli uan tlaouijkayotl tlen tlauel ouij, uan sampa motlalana o kiijiyouia.

Ma tikitakaj tlen kiijtoua achtoui uan teipa ipan ni versículo: “Ayok ximochiakaj ikalteno se tlakatl tlen xitlauak para inkichiuilisej tlen fiero. Amo xijtlachtekilikaj tlen kipia ipan ichaj. ¿Axinkimatij para se kuali tlakatl yonke inkitlaijiyouiltisej [uetsis, TNM] chikome ueltas, nochipa sampa motlalanas? Pero kema sansetsi tlaijiyouilistli inmechasis inaxkuajkualmej, elis kuali para inmechtsontlamiltis. Amo xiyolpaki kema mokualankaitaka uetsi ipan tlaouijkayotl. Amo xijuetskili kema yajaya kipia kuesoli” (Prov. 24:15-17).

Sekij kiijtojtokej versículo 16 kiijtosneki kema se maseuali tlajtlakolchiua uan sampa peua kuali tlaneltoka. Omej tlayakananij ipan religión katli euaj Gran Bretaña kiijtojkej: “Tlamachtianij tlen uejkajkia uan tlen nama itstokej, nojkia kiampa kitekiuijtokej ni texto”. Nojkia, moiljuiaj kiijtosneki: “Uelis maske se akajya tlajtlakolchiuas uan nojua kiiknelis toTeotsij, ya nojua kuali kiitas tlaj moyolkuepas”. Pampa kiampa moiljuiaj, uelis kichiuas se maseuali amo ma kichiua kampeka ayokmo tlajtlakolchiuas pampa moiljuis maske miakpa tlajtlakolchiuas, toTeotsij nochipa kitlapojpoljuis.

Versículo 16 amo ya nopa kineki kiijtos.

Nopa tlajtoli “uetsis” ipan hebreo, tlen versículo 16 uan 17, amo san se kiijtosneki. Uelis kiijtosneki kema se akajya uetsi kema itstok kalpani, kema uetsi se tlapiali o kema uetsi iyol se xinachtli (Deut. 22:4, 8; Amós 9:9). Ni tlajtoli nojkia uelis kiixnextis sekinok tlamantli, kej kema “toTeko kichiua ma eli temachtli sejse paso ipan iyolis se kuali tlakatl. Yonke uetsis nopa kuali tlakatl, axmokauas nepa uetstok, pampa toTeko kitlalanas ika ima” (Sal. 37:23, 24; Prov. 11:5; 13:17; 17:20).

Nopa Comentario bíblico Beacon kiijtok ika tlajtoli hebreo kema uetsi se akajya “amo kiijtosneki pampa tlajtlakolchijki”. Seyok ixtlamatketl kej ni kiijtok tlen versículo 16: “Amo kinamiki kintlatsakuiltisej toTeotsij itekipanojkauaj pampa ya nochipa kinmanauia, uan amo kinmanauia katli amo kualmej”.

Yeka, ipan Proverbios 24:16 kema kiijtoua “uetsis” amo kiijtosneki uetsi ipan tlajtlakoli. Kiijtosneki kema se akajya ajachika kiixnamiki miak tlaouijkayotl. Ipan ni tonali se akajya katli kuali monejnemiltia uelis kiixnamikis tlaouijkayotl, kej kokolistli, kema tekichiuanij kitlatsakuiltisej o sekinok tlamantli. Maske kipia kuesoli, kimati Jehová kipaleuis ma kiixnamiki tlen kipano. Ximoiljui kenijkatsa Jehová itekipanojkauaj miakpa kinpanotok tlen kuali, ¿kenke kiampa kinpano? Biblia kiijtoua: “Ta toTeko tikintlalana nochi tlen uetsij, uan tikinfuerzajmaka tlen itstokej ipan kuesoli” (Sal. 41:1-3; 145:14-19).

Yeka, se tlakatl tlen xitlauak amo yolpaki kema sekinok tlaijiyouiaj. Yolpaki kema “tlakamej tlen kimakasij toTeko” kuali itstokej (Ecl. 8:11-13; Job 31:3-6; Sal. 27:5, 6).