Mweeparipari, tahi yeeyo eversikulu ela enachunaaya oloca. Iva, wuuwa enataphulela ohoolela makacamiho ikwaha sincipale, nave ovinya onataphulela ovootha makacamiho.

Wi niiwexexe phaama haya noone, mwaha woothene: “Muchu we aweera soonanara, ohimwiipithele awookololowa murima vaate wawe nari opahula nipuro nawe oniichuuweiyevo. Awookololowa murima, nari uuwale ikwaha thanu napiili, onarwa avinya; nto aweera soonanara onarwa akwaculiwa ti epahu. Mwiicani aa uuwa, ohitheye; ohichape mmurimani mwaa oomwi akhwaculiwa.”—Masi. 24:15-17.

Akina anuupuwela wi eversikulu ya  16 enamuloca muchu yoowo onapaka yoocheka nave voocharela acharuwa. Ahooleli eeli a malapelo o Krapretanya arempe wi “anamalaleya akhalai, ni a mmahiku ahu anathariha” mmukhalelo yoola. Ahooleli yaala a malapelo alonce wi othariha mmukhalelo yoola yaahaala wiiwexexeya wi “muchu aphaama onanwerya wuuwela . . . mu soocheka itokotoko mu ikwaha sincipale, nyenya moorweela wa ocharuwa, owo onanwerya ovinya, ni otitelela omusivela Muluku ni okhala aweemereryiwa ni yoowo.” Moonelo yoola, onanwerya omuhakalaliha muchu yoowo ohinachuna ocharuwa mu yoocheka awe. Akhweya owo onanwerya wuupuwela wi, naamwi apakaka soocheka sincipale mwawuuluulela Muluku onanwerya omulevelela.

Nave tahi yeeyo eversikulu ya 16 enachunaaya oloca.

Masu a Ehepiri ataphuleliwe wi “uuwale”naari “uuwa” mu eversikulu 16 ni 17ananwerya ophariheliwa mmikhalelo soohiyanahiyana. Awo ananwerya otaphulela wuuwa mmukhalelo woomwiilini—ntoko yootakiherya emope yuuwenle mphironi, muchu uuwale vasulu va empa, naari nluku nimorenle vathi. (Malam. 22:4, 8; Amo. 9:9) Masu yaala a Ehepiri ananwerya ophariheliwa mmukhalelo woosiphela, ntoko mu eversikulu ela “apwiya annookolola meecelo a muchu nave annaakhapelela yaawo anaasivelaaya. Nari uuwa harimeelaru ntakhara Apwiya annaphara ntata nawe.”—Sal. 37:23, 24; Masi. 11:5; 13:17; 17:20.

Nave moone yeeyo Edward Plumptre, muhusiha a exikola ya mapastore olonceiye. “Masu a Ehepiri awi [“wuuwa”] hanaphariheliwaru mmukhalelo wa wuuwa mu yoocheka.” Muchu mukina oohuserya ooloca mwa mukwasu sa eversikulu ya 16 ariki: “Tahi yaphaama waakhaliha moonanara achu a Muluku, othowa nawi awo annatitelela okhala—nyenya oonanara murima, hooye!”

Mwawiihiiha Masiposipo 24:16 hanachuna oloca “wuuwa” mmukhalelo wa meecelo, naari wi wuuwa mu yoocheka. Enaloca sa ohoolela makacamiho naari sawuukhula naamwi iri ikwaha sincipale. Mu elapo yeela yoonanara awookololowa onanwerya ohoolela makacamiho a okumi naari ohoolela makacamiho makina. Ophiyerya wi owo onanwerya okhalihiwa moonanara nthowa na wiikariwa ni alamuleli. Nyenya owo onanwerya ororomela wi Muluku onahaala omukhaviherya wi akhumelele phaama vaavaa onahooleleiye makacamiho. Mwiikohe: ‘Ikwaha kavi kiwonnaaka alapeli a Yehova ichu sihiweecelaka phaama mweekumini?’ Ntakhara heeni eneereyaaya hiihaa? Nthowa nawi ninnaroromela wi “Apwiya [Yehova] annaakhaviherya oothene anomora, aweemesha oothene anaceecheya.”—Sal. 41:1-3; 145:14-19.

“Awookololowa” hanahakalala vaavaa akina anahoolelaaya makacamiho. Ohiya yeeyo owo onnahakararyeya osuwela wi “yoole onamoova ni omucicimiha Muluku akaneeca phaama.”—Ekle. 8:11-13; Yobi 31:3-6; Sal. 27:5, 6.