Tenga daʼö geluaha ayati daʼa. Sindruhunia, manandrösa daʼa ba niha sasese manaögö abula dödö mazui faʼatosasa, hizaʼi ifuli maoso ia.

Datafaigi ayati fatua lö daʼö hegöi ayati ganetenia, ”Böi daro-darogö nahia zatulö tödö, yaʼugö sebua horö, ba böi dudugö waratenia. Mewitu sa alau zatulö tödö, ba mewitu ifuli maoso; ba sebua horö, ba tetaru mbagi, na göna famakao. Na alau zi fatiu tödö khöu, ba böi omusoiʼö tödö; ba na tetaru mbaginia, ba böi owua-wua dödöu.”​—Gamd. 24:15-17.

So ösa zangumaʼö wa manandrösa ayati 16 andrö ba niha sasese mamalua horö hizaʼi ifuli mangesa dödönia. So darua zondröniaʼö ba agama moroi ba Inggris sangumaʼö wa ”daʼö zasese lafahaʼö ira samaʼema huhuo me föna hegöi iadaʼa”. Lafahaʼö ba niha wa ”tola manö alau niha satulö . . . ba wamalua horö sebua, hizaʼi lö tebulö iʼomasiʼö Lowalangi, ba ifuli maoso ia ba waʼalaunia andrö ba ginötö ifalalini gera-erania ero na ifalua horö”. Te so ösa niha si fao tödö ba wamahaʼö andrö börö me lö omasi ira ba wanimbagö famalua horö. Tola manö lawaʼö tödöra wa hasambalö iʼefaʼö horöra Lowalangi hewaʼae na asese lafalua daʼö.

Sindruhunia, tenga daʼö geluaha ayati 16 andrö.

Ba li Heberaiʼo, oya geluaha ngawua wehede ”alau” si so ba ayati 16 ba 17. Tola manandrösa daʼa ba waʼalau sindruhu, simane na alau zi sageu sawi ba lala, alau zi samösa niha moroi ba mbumbu nomo, mazui aekhu gereke tou ba danö. (5 Moz. 22:4, 8; Gamo. 9:9) Hizaʼi, tola göi muʼogunaʼö ia ba woʼamaedolagö. Duma-dumania, so ayati sangumaʼö, ”Yehowa sa zangabeʼeʼö ahe niha, na omasi ia nitörönia. Na alau ia, ba lö adölö ba danö, ituwu sa dangania Yehowa.”​—Zin. 37:23, 24; Gamd. 11:5; 13:17.

Imane Profesor Edward H. Plumptre, ”Ba li Heberaiʼo, lö irai muʼogunaʼö ngawua wehede [”alau”] ba wanutunö faʼalau ba horö.” Börö daʼö, imane samösa niha sagatua-tua tanö böʼö ba wanutunö eluaha ayati 16 andrö, ”Zaya-zaya gölö ba si lö eluaha na mufakao nono mbanua Lowalangi, börö me tola lataögö daʼö, tenga simane niha si lö sökhi!”

Börö daʼö, ngawua wehede ”alau” si so ba Gamaedola 24:16, lö manandrösa ia ba wamalua horö, hizaʼi ba gabula dödö mazui faʼatosasa sasese alua. Ba gulidanö si lö sökhi andre, te lataögö wökhö mazui abula dödö tanö böʼö ira niha satulö tödö. Tola manö göna ira folohi moroi khö ndra samatörö. Hizaʼi, tola faduhu dödöra wa hasambalö ituhini ba itolo ira Lowalangi ba wanaögö fefu daʼö. Sofu khöu samösa, ’Hawaʼasese uʼila waʼamofozu nono mbanua Lowalangi ba wanaögö abula dödö salua khöra?’ Hadia mbörö wa tola mofozu ira? Börö me ”ituwu Yehowa fefu zalau enaʼö, ba ifaöga fefu zi no aöndrö”.​—Zin. 41:2-4; 145:14-19.

Lö omuso dödö niha ’satulö tödö’ na göna abula dödö niha böʼö. Hizaʼi, terara dödönia börö me iʼila wa ”sohahau tödö dania zangataʼufi Lowalangi, samondrongo linia”.​—Zango. 8:11-13; Yob. 31:3-6; Zin. 27:5, 6.