Nakai kakano pihia e kupu tohi nei. Ka e hagaao ke he tagata kua veli he puhala kua fehagai tumau a ia mo e tau lekua po ke tau mena uka ti liu tu hake he puhala kua maeke a ia ke fakauka.

Kitekite la ke he manatu katoa he kupu tohi: “Ko e tagata mahani kelea na e aua neke lamalamati a koe ke he mena kua nofo ai e tagata tututonu; aua neke moumou e koe e mena kua takoto ai a ia. Ha ko e lagafitu he veli e tagata tututonu, ka e liu tu a ia; ka ko e tau tagata mahani kelea kua liti hifo a lautolu ke he malaia. Ka veli a ia kua fai fi kia koe, aua neke fiafia ai a koe; ka liti hifo foki a lautolu, aua neke olioli ai hāu a loto.”​—Fakatai 24:15-17.

Falu ne manatu ko e kupu 16 kua hagaao ke he tagata kua liga veli ke he agahala ka e maeke ke tokihala. Tokoua e akoako Peritania ne tohi ko e “tau ako fakamatala i tuai mo e mogonei kua fakaaoga lahi e kupu tohi” he puhala ia. Lafi he tau akoako ko e onoonoaga pihia kua kakano “ko e tagata mitaki kua maeke ke veli ke he . . . tau agahala kelea muitui, ka e nakai galo e ia e fakaalofa haana ke he Atua, ti liu tu hake he veli he tokihala ke he tau magaaho takitaha.” Ko e manatu pihia kua liga fiafia ki ai e tagata ne nakai manako ke totoko e agahala. Liga manatu a ia pete he matutaki a ia ke agahala, to fakamagalo tumau he Atua a ia.

Ka e nakai ko e kakano mooli a ia he kupu 16.

Ko e kupu Heperu ma e “veli” he tau kupu tohi 16 mo e 17 ka fakaaoga he tau puhala kehekehe. * Kakano ai ko e veli mooli​—kua veli e povi he puhala, to hifo e tagata he tuafale, po ke to e fua [maka] ke he kelekele. (Teu. 22:4, 8; Amosa 9:9) Maeke foki e kupu ke fakaaoga he puhala fakatai tuga anei: “Ko Iehova ne kotofa e fano[a]ga he tagata; to fiafia foki a ia ke he hana puhala. Kaeke ke veli a ia, ti nakai takaveli ni; ha kua toto e Iehova hana lima.”​—Sala. 37:23, 24; Fakatai 11:5; 13:17; 17:20.

Ka e mailoga e manatu ne talahau he Porofesa ko Edward H. Plumptre: “Ko e kupu Heperu ma e [“veli”] kua nakai fakaaoga ke veli ke he agahala.” Ti fakamaama foki pehē he taha pulotu e kupu 16: “To nakai aoga mo e fakateaga ke taute fakakelea e tau tagata he Atua ha ko e mena to hao a lautolu, ka e nakai hao a lautolu ne mahani kelea!”

Ē, fakakite he tau mena oti nei kua nakai kakano e Tau Fakatai 24:16 ke veli ke he agahala, ka ko e lauia tumau he tau lekua po ke tau mena vihi. He lalolagi kelea mogonei, liga fehagai e tagata tututonu mo e tau lekua malolō tino po ke falu mena foki. Liga favale foki e fakatufono ki a ia ha ko e tua haana. Ka e falanaki a ia ko e Atua e lalagoaga haana mo e to lagomatai a ia ke fahia mo e kautū. Hūhū hifo ki a koe, ‘Nakai kia la kitia e au kua fua mitaki e tau mena ia ke he tau fekafekau he Atua?’ Ko e ha? Iloa tonu e tautolu “kua toto hake e Iehova a lautolu oti kua veveli; ko ia foki kua fakatu hako a lautolu oti kua fakatolotolo.”​—Sala. 41:1-3; 145:14-19.

Ko e “tagata tututonu” kua nakai fiafia ha kua lauia e falu he tau lekua. Ka e fiafia a ia he iloa “to monuina a lautolu kua matakutaku ke he Atua, ko lautolu kua matakutaku ki mua hana.”​—Fakama. 8:11-13; Iopu 31:3-6; Sala. 27:5, 6.