Yai, izi niye lini zayutanthauza vesi iyi. M’malomwake, yunena za munthu wamene okumana na mavuto mowelezhyawelezhya koma okwanisha kupilila.

Tiyeni tione mavesi a pavuli koma soti a pasogolo pa lemba yamene iyi. Mavesi aŵa onena kuti, “Molingana na munthu muipa, osati ukofisamila munthu wolungama pamalo ŵake onkhala. Osati ukoononga malo ŵake onkhala. Pakuti wolungama angapone nangu kali 7 koma ouka soti. Koma ŵanthu aipa, soka ikaŵapeze. Ufunika lini kusangalala ngati mdani wako wapona ndipo akakhukhumudwa, osati ukokondwela mu mtima mwako.”—Miy. 24:15-17.

Ŵanthu ayakine oganiza kuti vesi 16 yunena za munthu wamene ocita macimo koma olapa nonkhala soti pa ushamwali uweme na Mulungu. Mwacisanzo, asogoleli aŵili a cipembezo a ku England elemba kuti “alaliki a m’nthawi zakale na a masiku ŵano oifotokoza mwa njila yamene iyi.” Elaŵila soti kuti kafotokozedwe koteti ka lemba iyi kangatanthauze kuti “n’zokwanishika kuti munthu angacite cimo ikulu nopitilizhya kukonda Mulungu koma soti kunkhala ovomelezhyewa pa menso pa Mulungu cifukwa cakuti walapa.” Munthu wamene ofuna lini kulapa angakonde kafotokozedwe koteti. Angankhale na maganizo akuti olo kuti acimwe mowelezhyawelezhya, Mulungu angamukhululukile.

Koma izi niye lini zayutanthauza vesi 16.

Mau Aciheberi yamene yemasuliliwa kuti “kupona” mu vesi 16 na 17, yangaseŵenzeshewe m’njila zinyinji. Yangatanthauze kupona kwenekwene. Mwacisanzo, nyama ingapone pa njila, munthu angapone kufumila pa mtenje olo mwala ungaponele pansi. (Deut. 22:4, 8; Amo. 9:9) Mau aŵa angaseŵenzeshewe soti mophiphilisila monga ni mau ali pa lemba akuti: “Yehova watang’isha mendo a munthu wamphamvu, ndipo Mulungu okondwela na njila zake. Olo kuti angakhukhumudwe, oponelatu lini, cifukwa Yehova wamukata kwanja.”—Sal. 37:23, 24; Miy. 11:5; 13:17; 17:20.

Olo n’tetyo, onani zecilaŵila Pulofesa Edward H. Plumptre: “Mau Aciheberi akuti [“kupona”] oseŵenzeshewa lini potanthauza kucita cimo.” Kuyangizhyila apo kaswili muyakine wa za maphunzilo efotokoza vesi 16 mwa njila iyi: “Kuzunza ŵanthu a Mulungu kuliye pindu cifukwa opambana nthawi zonse, koma ŵanthu aipa opambana lini!”

Tetyo, maumboni aŵa oonesha kuti lemba ya Miyambo 24:16 yutanthauza lini kucita cimo. M’malomwake yutanthauza kukumana na mavuto mowelezhyawelezhya. M’calo cino ciipa munthu ŵolungama angakumane na mavuto a thanzi olo mavuto ayakine. Payakine angozunziwa na Boma cifukwa ca cikhulupililo cake. Koma angankhale na cidalilo cakuti Mulungu angamuyavye kupilila mavuto. Tetyo mungaone kuti atumiki a Mulungu vinthu vuŵayendela luweme. Ndaŵa yanji? Cifukwa cakuti “Yehova ocilikiza wamene wasala patontho kupona, ndipo ousha onse amene aŵelama cifukwa ca masauso.”—Sal. 41:1-3; 145:14-19.

“Munthu wolungama” osangalala lini ngati ayakine okumana na mavuto. M’malomwake olimbikishiwa cifukwa oziŵa kuti, “ŵanthu amene oyopa Mulungu wacendi vinthu vikaŵayendele luweme, cifukwa omuyopa.”—Mla. 8:11-13; Yobu 31:3-6; Sal. 27:5, 6.