Se ga se seo temana ye e se bolelago. Re ka se sa re temana ye e bolela ka motho yo a welego ka baka la go dira sebe. Go e na le moo, e bolela ka motho yo a welwago ke mathata a mantši eupša a kgona go a kgotlelela.

Lebelela mantšu ao a lego temaneng ya pele le ya ka morago ga Diema 24:16. A re: “O se ke wa lalela bodulo bja moloki go etša yo kgopo; o se ke wa senya bodulo bja gagwe. Moloki le ge a ka wa gašupa, o tla tsoga gape; eupša ba kgopo ba tla wišwa ke bošula. Ge lenaba la gago le ewa, o se ke wa thaba; ge le kgopša, pelo ya gago e se ke ya thaba.”—Die. 24:15-17.

Batho ba bantši ba nagana gore temana 16 e bolela ka motho yo a dirago sebe eupša a itshola, ke moka a boela a ba le segwera se sebotse le Modimo. Baetapele ba bangwe ba bodumedi ba kua England ba ngwadile gore baruti ba lehono le ba kgale ba hlalositše temana ye ka tsela yeo. Baetapele bao ba boletše gape le gore tsela yeo temana ye e hlaloswago ka yona e ra gore “go a kgonega gore moloki a dire sebe se segolo eupša a sa dutše a rata Modimo e bile Modimo a mo amogela ka ge a itshola.” Motho yo a dirago sebe ka boomo a ka rata tlhaloso yeo. A ka ipotša gore le ge nka tšwela pele ke dira dibe Modimo o tla no dula a ntebalela.

Eupša se ga se seo temana ya 16 e se bolelago.

Lentšu la Seheberu leo le fetoletšwego e le “go wa” temaneng ya 16 le 17 le ka dirišwa ka ditsela tše dintši. Ka mohlala, phoofolo e ka wela fase tseleng, motho a ka wa godimo ga tlhaka ya ntlo goba thoro e tee e ka wela fase. (Doit. 22:4, 8; Amose 9:9) Eupša lentšu le le ka dirišwa ka tsela e nngwe gape. Ka mohlala Psalme 37:23, 24 e re: “Jehofa o tiiša dikgato tša monnatia, le gona Modimo o kgahlwa ke tsela ya gagwe. Gaešita le ge a ka wa, a ka se buragane, gobane Jehofa o thekga seatla sa gagwe.”—Die. 11:5; 13:17; 17:20.

Moporofesara Edward H. Plumptre o boletše ntlha e nngwe. O itše: “Lentšu la Seheberu leo le fetoletšwego e le go wa ga le ke le dirišwa e le go wela sebeng.” Seithuti se sengwe sa Beibele se hlalošitše temana ye ka gore: “Ke ga lefeela go tlaiša batho ba Modimo ka gobane sohle seo ba se dirago se a atlega, eupša batho ba babe bona ga ba ke ba atlega!”

Ka gona ditlhaloso tše re boletšego ka tšona ka moka di bontšha gore Diema 24:16 ga e bolele ka motho yo a welago sebeng, eupša e bolela ka motho yo a welwago ke mathata a fapafapanego a mantši. Mehleng ye re phelago go yona e thata, moloki a ka babja goba a welwa ke mathata a mangwe, e bile a ka tlaišwa ke ba mmušo ka baka la ditumelo tša gagwe. Eupša a ka tshepa gore Jehofa o tlo mo thekga e bile o tlo mo thuša go lebeletšana le mathata a gagwe. Ipotšiše gore: ‘Ke ga kae ke bona bahlanka ba Modimo dilo di ba sepelela gabotse?’ Ke ka baka la eng di ba sepelela gabotse? Ke ka gobane ba kgodišegile gore “Jehofa o thekga bohle bao ba wago, e bile o emiša bohle bao ba buraganego.”—Ps. 41:1-3; 145:14-19.

Ka baka leo “moloki” ga a thabišwe ke go bona ba bangwe ba welwa ke mathata. Eupša o thabišwa ke go tseba “gore bao ba boifago Modimo wa therešo dilo di tla ba sepelela gabotse, ka ge ba . . . mmoifa.”—Mmo. 8:11-13; Jobo 31:3-6; Ps. 27:5, 6.