Kulewa cadidi, vesiri likulewa lini bzimwebzi. M’mbuto mwace, vesiri likulewa bza munthu omwe akugumana na mabvuto mazinji tsono akukwanisa kuyapirira.

Onani bzomwe mavesiya yambalewa: ‘Leka kumbakhalirira munthu wakulungama pafupi na pamui pace kuti umucite cinthu cakuipa. Lekani kupfudza mbuto yace yakupumira. Pakuti nyakulungama angagwe kanomwe kentse, ndipo iye an’dzalamuka pomwe; koma wanthu wakuipa tsoka lin’dzawagwesa. Leka kukomedwa nyamadulanthaka wako akagwa; Ndipo leka kulekerera kuti mtima wako ukomedwe iye akakhukhumudwa.’—Mimwani 24:15-17.

Wanthu winango ambakumbuka kuti vesi 16 limbalewa bza munthu omwe ambacita pikado koma ambakungula acikhala pomwe pa uxamwali bwabwino na Mulungu. Mwa ciratizo, akulu awiri wa magereja ku Inglaterra adanemba kuti “apfunzisi wakale-kale napo wa ntsiku zino, ambabvesesa tenepa vesiri.” Akulu- akulu wa magerejawo adalewa pomwe kuti: “Bzimwebzi bzikuthandauza kuti munthu wabwino angagwe mwakucita pikado zikulu-zikulu koma iye angaluze lini lufoyi lomwe analo kuna Mulungu, ndipo angabvumidwe na Mulunguyo akakhala kuti akungula.” Makumbukidwe yamweya yangabwerere munthu omwe akufuna lini kusiya kucita pikado. Ndipo iye angafike pakukumbuka kuti napo acite tani pikado mwakubwereza-bwereza, Mulungu animulekerera basi pikadozo.

Tsono ndibzo lini bzomwe vesi 16 limbalewa.

Mafala ya Cihebereu yakuti ‘angagwe’ na ‘akagwa’ yomwe yali mu vesi 16 na 17, yangaphatisidwe basa mu njira zakusiyana-siyana. Mafalaya yangathandauze kugwa caiko. Mwa ciratizo, cirombo ciri-centse cingagwe mu mseu, munthu angagwe kucokera pa ntsodzi, ayai mwala ungagwe kucokera m’dzaulu. (Bzakutonga 22:4, 8; Amosi 9:9) Ndipo fala limweri lingaphatisidwembo basa mwa kuyezezera. Mwa ciratizo, mafala yakuti: ‘Yahova ambatsogolera njira za munthu, akakomedwa na njira za munthuyo. Napo iye acigwa an’dzalekereredwa lini, pakuti Yahova ambamuthandiza mwa kumuphata boko.’—Psalymo 37:23, 24; Mimwani 11:5; 13:17; 17:20.

Tsono, onani bzomwe mpfunzisi munango wakucemeredwa Edward H. Plumptre adalewa. Iye adati: “Fala la Cihebereu lakuti kugwa, limbaphatisidwa lini basa pa nkhani ya kugwa mwakucita pikado.” Ndipo mdziwi munango adafotokozambo vesi 16 mwakulewa kuti: “Bzidaipa kuboneresa atumiki wa Mulungu, thangwe iwo nthawe zentse bzinthu bzin’dzawafambira bwino. Tsono anyakuipa bzin’dzawafambira lini bwino!”

Mafalaya yakulatiza kuti Mimwani 24:16 akulewa lini bza ‘kugwa’ mwakucita pikado, koma akulewa bza mabvuto ayai madede yomwe munthu ambagumana nayo napo mwakubwereza-bwereza. Mu ntsiku zino zakuipa zakumalizira kwa dzikoli, munthu wakulungama angasaye thanzi la bwino ndipo angagumanembo na mabvuto yanango. Iye angazunzidwe na atongi thangwe ra cikhulupiro cace. Iye angafunike kukhulupira kuti Mulungu ni mthandizi wace, ndipo an’dzamuthandiza kulimbana na mabvuto yomwe akugumana nayoyo. Bzibvunzeni mwekha kuti: ‘Kodi ndikanati kuwona kale bzinthu bzimwebzi bzikucitikira atumiki wa Mulungu?’ Inde, bzimbawacitikira. Tsono ifepano tikutsimikiza kuti ‘Yahova ambathandiza wentse omwe ali kugwa, ndipo ambalamusa wentse omwe adatsulima thangwe ra mabvuto.’—Psalymo 41:1-3; 145:14-19.

‘Anyakulungama’ akawona kuti anzawo akugumana na mabvuto, iwo ambawaseka lini. M’mbuto mwace, iwo ambalimbikisidwa thangwe ra kudziwa kuti ‘wanthu omwe ambagopa Mulungu wacadidi, bzinthu bzin’dzawafambira bwino thangwe iwo ambamugopa.’—Mpalizi 8:11-13; Djobi 31:3-6; Psalymo 27:5, 6.