Mana chaita nisha ninchu. Ashtahuanpish cai versoca maijan sinchi llaquicunahuan chꞌimbapuracushpapish qꞌuipaca jatarij shina, ñaupajman catinatami nisha nin.

Proverbios 24:16-ta alli intindingapajca Proverbios 24:15, 17-tapish ricushun. Chaipica: ‘Diosta mana manchaj runa, cashcata ruraj runataca ama llaquichinata yuyarichu. Paipaj huasipi ima tiyashcatapish ama shuhuagrichu. Cashcata ruraj runaca, canchis cutin urmajpipish, cutin jataringallami. Ashtahuanpish Diosta mana manchajcuna jatun llaquipi huashicushpaca, ña mana jataringachu. Canta pꞌiñaj runa ima llaquipi urmajpica, ama asinguichu. Paita llaqui japijpica shungullapipish ama cushicunguichu’ ninmi (Proverbios 24:15-17).

Huaquin gentecunaca Proverbios 24:16 versomanta parlashpaca cada rato juchata rurashpapish Diostami cutin alli sirvi tucun nishpami yuyancuna. Inglaterra llajtamanta ishqui curacuna ima nishcata ricushun. Paicunaca: “Ñaupa punllacunapish, cunan punllacunapish achca yachachijcunami maijancuna juchapi cutin cutin urmajpipish Diosca perdonanllami nishpa yachachingapajmi cai versotaca utilizashcacuna” nircami. Shinallataj paicunaca: “Maijan jatun juchapi cutin cutin urmajpipish Diosca cꞌuyashpami catin. Cashna jatun juchata rurashpa, cutin cutin arrepintirishpaca Diospaj ñaupajpimi alli ricurin” nircacunami. Maijanpish jatun juchata saquingapaj mana esforzarishpaca ‘cai yachachijcuna shina yuyanami alli can’ nishpami yuyai callaringa.

Proverbios 24:16 versoca chaitaca mana nisha ninchu.

Proverbios 24:16, 17 versocunapi “urmana” shimitaca hebreo shimipica chꞌican chꞌican yuyaicunatami ricuchin. Por ejemplo, shuj toro ñanpi urmanamanta o terraza huasimanta urmanamanta o shuj rumi pambapi urmanamanta parlangapajmi carca (Deuteronomio 22:4, 8; Amós 9:9). Cai shimica caita ningapajpishmi can. Salmo 37:23, 24-pipish “Mandaj Diosca runapaj causaitaca, paipaj maquipimi charicun. Tucui imapipish pai munashca shinami pushacun. Urmashpapish mana chaipi saquiringachu. Paitaca Mandaj Diosmari paipaj maquimanta charicun” ninmi (Salmo 37:23, 24; Proverbios 11:5; 17:20).

Por ejemplo, teologiamanta yachaj Edward Plumptre profesorca: “Hebreo shimipi ‘urmana’ nishpaca juchapi urmanamantaca mana parlacunchu” ninmi. Shinallataj shujtaj yachajpish cai verso 16-manta parlashpaca: “Diosta sirvijcunata llaquichinaca yangami can. Paicunata llaquichijpipish jatarij shinami ñaupajman catingacuna. Cutin millaicunaca ña mana jataringacunachu” nircami.

Proverbios 24:16 versoca juchapi urmanamantaca mana parlacunchu. Ashtahuanpish chꞌican chꞌican llaquicunahuan chꞌimbapuranamantami parlacun. Cai millai mundopi causacushcamantami maijancunaca ancha ungüita o shujtaj llaquicunata charincuna. Mana cashpaca gobiernocuna paicunata catirashpa llaquichishcamantami achca llaquicunata charincuna. Pero paicunaca llaquicunahuan cashpapish, jatarij shina ñaupajman catinatami seguros cancuna. ¿Manachu Diosta sirvijcunapaj ruraicunaca tucuipi alli llujshin? ¿Imamantataj tucuipish alli llujshin? Bibliapica: “Mandaj Diosca tucui urmaricujcunata charirajmi. Tucui llaquilla cajcunata jatarichijmi” ninmi (Salmo 41:1-3; 145:14-19).

Cashcata rurajca shujtajcuna llaquicunahuan cajpica mana cushicunchu. Ashtahuanpish Diospaj munaita rurajcuna tucuita alli rurajta ricushpami cushicun (Eclesiastés 8:11-13; Job 31:3-6; Salmo 27:5, 6).