Kare ko teia te manako o te irava. Mari ra, te taiku ra i tetai tei ō putuputu ki roto i te manamanata e te taitaia e kua tu akaou ki runga ma te akakoromaki.

Akamanako ana i teia irava: “Auraka koe e moetapapa, e tera ra tangata kino, i te ngutuare o te tuatua-tika ra; auraka koe e tamoana i tona akaangaroianga: Kia taki itu ua atu te inga anga o te tangata tuatua-tika, e tu akaou mai aia; e nina roaia ra te aronga kino e te kino. Auraka koe e rekareka kia inga to enemi ra, e kia turori ua aia, auraka to ngakau kia rekareka.”​—Mase. 24:15-17.

Kua manako tetai pae i te irava 16 e no runga i te tangata tei ara e kua tataraara. E rua nga tangata Peritane tei tata no te “au orometua, i te tuatau taito e teia tuatau, tei akamārama i teia irava” mei teia te tu. Karanga katoa raua e ko te aiteanga “ka o tetai tangata meitaki ki roto . . . i te au ara kino, inara kare tona aroa no te Atua e kore, e ka tu akaou mai aia ki runga ma te tataraara i te au atianga ravarai.” Ka rekaia teia manako e tetai tangata tei rave ua i te ara. Ka akamanako aia noatu e kua ara putuputu aia, ka akakore ua te Atua i tana ara.

Kare ko teia te aiteanga o te irava 16.

Ko te tuatua Epera no te “inga anga” e te “inga” i te irava 16 e te 17, e tukeke te aiteanga. Tona aiteanga, ka inga ua​—ka inga me kore ka topa te puakatoro i runga i te mataara, ka topa tetai mei runga i te are, me kore ka topa tetai toka ki runga i te one. (Deu. 22:4, 8; Amo. 9:9) Ka taangaanga katoaia teia tuatua ei akatutu anga: “Kua akatinamouia e Iehova te rua-tapuae o te tangata meitaki, e te mareka ra aia i tona aerenga. Inga uaorai aia, kare e topa takiri roa ki raro, no te mea te mou mairā Iehova i tona rima.”​—Sala. 37:23, 24; Mase. 11:5; 13:17; 17:20.

Inara, akamanako i ta te Professor Edward H. Plumptre i karanga: “Ko te kupu Epera [“inga”] kare i taangaangaia no te inga anga ki roto i te ara.” Inara, akamārama tetai tangata apii i te irava 16: “Ka puapinga kore te takinokino anga i to te Atua iti tangata, no te mea ka ora ratou​—ka mate ra te aronga kino!”

Ae, kare a Maseli 24:16 e tuatua ra no te “inga anga” ki roto i te ara, mari ra no te au manamanata me kore te au tu ngata, tei tupu putuputu. I roto i teia akatereanga kino, ka aro atu te aronga tuatua tika i tetai oraanga manamanata. Penei ka takinokinoia aia e te kavamani. Inara ka rauka iaia i te irinaki i te Atua kia tauturu iaia kia akakoromaki e kia autu. Ui kia koe uaorai, ‘Kare ainei kua kite ana au i te meitaki tei tupu ki te au tavini o te Atua?’ Eaa ra? Papu ia tatou e “te mou rā Iehova i te aronga katoa e inga ra; kua akatu i te aronga katoa e piko ki raro.”​—Sala. 41:1-3; 145:14-19.

Kare “te tangata tuatua-tika” e mataora me tupu te manamanata ki tetai pae. Mari ra, pumaana aia i te kite e te “meitaki [ra] te aronga i mataku i te Atua, tei mataku ki mua i tona aroaro.”​—Kohe. 8:11-13; Iobu 31:3-6; Sala. 27:5, 6.