Akava stiho na vakerela adava. Akate mislinela pe ki nekaste so poviše puti perela bašo problemija ili bašo pharipa so isi le, ama uspejnela palem te uštel.

Soske vakeraja akava. Te dikha o kontekst e stihoskoro: „Ma ov sar o lošno hem garavindor te dikhe o kher e pravednikoskoro, ma uništin o than kote so živinela. Soske, ako o pravedniko perela efta puti da, ov palem ka uštel, a o lošno ka propadinel ki pli nevolja. Keda ka perel tlo dušmani, ma ov bahtalo, hem tlo vilo te na radujnel pe keda ka sopkinel pe“ (Izr. 24:15-17).

Nesave mislinena kaj o 16 stiho kerela lafi bašo manuša kola so grešinena hem kainena pe. Duj sveštenikija tari Anglija vakergje kaj but džene objasningje akava stiho ko akava način. Ola vakergje kaj jekh šukar manuš šaj poviše puti te grešinel ama nane te čhinavel te mangel e Devle hem šaj sekogaš te kainel pe keda ka grešinel. Asavko razmislibe odgovorinela okolenge so na mangena te borinen pe protiv o grevo. Ola šaj te mislinen peske kobor hem te grešinen o Devel sekogaš ka prostinel lenge.

Ama, akava stiho na vakerela adava.

O hebrejsko lafi „pelo“ ili „perela“ soj koristimo ko 16 hem 17 stiho šaj te ovel le različno značenje. Na primer, ki doslovno smisla šaj te koristinel pe sar, o biko pelo ko drumo, nekoj perela taro krovi, o bar perela ki phuv (5. Moj. 22:4, 8; Amos 9:9). Akava lafi šaj te ovel le javer da značenje, sar na primer: „O Jehova vodinela e manušeskere čekorija hem bahtalo tano bašo leskoro drumo. Te perel da, ov nane te propadinel, soske o Jehova ikerela le ple vastea“ (Ps. 37:23, 24; Izr. 11:5; 13:17; 17:20).

„Ama o hebrejsko lafi ’perela‘ nikogaš nane koristimo bašo grevo“, objasninela jekh profesori. Javer izučuvači objasninela o 16 stiho ko akava način: „Džabe tano te ponašine tut lošno e Devleskere narodoja, soske ov sekogaš ka ovel uspešno, a o lošna na!“

Znači, sa akava sikavela kaj o Izreki 24:16 na kerela lafi bašo grevo, nego bašo problemija hem pharipa so stalno šaj te oven amen. Ko avdisutno lošno sveto, e pravedno manuše šaj te oven le but problemija, na primer, problemija e sastipaja. Ov šaj čak te ovel progonimo taro vlastija baši pli vera. Ama le šaj te ovel le doverba kaj o Devel ka poddržinel le hem ka pomožinel leske te ikljol ko krajo adale problemencar hem te ovel uspešno. Razmislin samo kobor puti pomožingja o Devel ple slugenge! Soske? Amen siem sigurna kaj „o Jehova ikerela sa okolen so perena hem vazdela sa okolen so pele“ (Ps. 41:1-3; 145:14-19).

O pravedno manuš nane bahtalo keda e javeren isi len problemija. Namesto adava, ov osetinela pe šukar soske džanela „kaj ka ovel šukar adalenge so darana taro čačutno Devel“ (Prop. 8:11-13; Jov 31:3-6; Ps. 27:5, 6).