Lá nsɔsɔlɔ, ɔsɔ apalekɔ ikanyi yɛ vɛrse djɛnɛ. Koko, vɛrse djɛnɛ ntepelaka nkambo dj’onto wopomana l’ekakasano kana ndjolo ko nkfulumeyɛka.

Nyontshɔ tokolenda avɛrse w’imá ntondo la w’im’ɔkɔngɔ wɔ vɛrse djɛkɔ: ‘Topolamake lá yɔpo yɛ nyɛtshi entshupa lá mvulu k’onto wɔ wɔlɔ, totshitake etena kɛnde k’ohomolande. Ladjikɛnde onto wɔ wɔlɔ nkoka nkfɔ mbala esambele ko angowetshɔ lonkina, koko anto wa nyɛtshi wangotala m’ɔtɛ wɔ ndjolo. Ntsha ontonyi wɔko ambɔkfɔ, tosasangake edjinge ntsha nde ambotala, tawolake djɛ oloko wɔko ndjala l’osasa.’​—Woo. 24:15-17.

Anto amɔtshi nfɛnyɛka ambɔ vɛrse kɛ 16 kɛnɛ ntepelaka nkambo dj’onto wɔkfɔ l’ovunga koko nkokaka nkalɔ ndjala la djokanelo djɛ wɔlɔ la Yehova. Ewandji epe wɛ nkɛlɛsiya welá Anglɛtɛrɛ wafunaka ambɔ: “Esambisha w’etsho wɛ ntondo kana w’etsho wɛnɛ, nkambaka la vɛrse djɛnɛ la lɛdji lɔsɔ.” Ewandji wɛ nkɛlɛsiya wɛso, wakotshɛ ambɔ ikanyi yɛ nghɔsɔ nsakisolaka ante, “onto wɔ wɔlɔ nkoka nkfɔ . . . l’ovunga w’ekekete, koko nde apatshutshɛka ngandji kɛnde te Ndjambe, edjinge nde mbetshɔka wina onkfumɔ w’oyapɛlande.” Ikanyi yɛ nghɔsɔ nkoka nsaasangɛ onto wopakɔpe mpikama djɛ ntshika nangha evunga. Nde nkoka nkanela ante kaanga angonanghaka evunga mbala la mbala, Ndjambe angowimeyɛka ngo ndo wimeyɛ.

Koko kɛsɔ apalekɔ kɛnɛ kɛkɔpa ntepela vɛrse djɛ 16.

Itepela yɛ Hebero yɛlá vɛrse djɛ 16 la 17 yekadjimola “nkfɔ” kana “ambɔkfɔ” nkoka nkambema lá topo totshikitanyi. Itepela yɛsɔ nkoka nsakisola edjingela kɛ nsɔsɔlɔ. Ndjɔmbɔmba nyama, ngɔmbɛ kana mpunda kɛmbɔkfɔ lá mboka, onto ambɔkfɔ má nsamba, kana lɔwɔkɔ lɔmbɔkfɔ lá looko. (Mvu. 22:4, 8; Amɔ. 9:9) Itepela yɛsɔ nkoka nkambema lonkina lá yopo yɛ djingingi, ndjɔmbɔmba l’etepela wɛwɔlama wɛnɛ: ‘Yehova ndɔndjɛka wina w’onto ntsha nde ambɔkɔpa mboka kɛnde. Kaanga ambɔkfɔ nde apangohela looko, ladjikɛnde Yehova nsukaka lɔwɔ lɔnde.’​—Yee. 37:23, 24; Woo. 11:5; 13:17; 17:20.

Koko, kolenda kɛnɛ kɛ wetsha welá inivɛrsite, Edward H Plumptre ndatepela ante: “Itepela yelá Hebero isakisola [‘nkfɔ’] ipakambema djɛ nsakisola onto wɔkfɔ l’ovunga.” Djɛkondeke, ondjewi onkina wɔ wayi atepelaka lá yopasɛ nkambo djɛ vɛrse 16 djɛnɛ ante: “Nyɛnyɛ enkambi wɛ Ndjambe ndjolo, oyɛwɔnde ndaananghela nghɔmɛlɛ nyɛtshi edjinge nkambo dj’enkesa, ladjikɛnde iwɔ wangokindjɛka ndjala la lowiko, koko anto wa nyɛtshi, iwɔ wangovɔ!”

Djɛkondeke, Woongo 24:16 ntepelaka nkambo dj’onto wopomana l’ekakasano kaanga mbala la mbala, koko ape nkambo dj’onto wɔkfɔ l’evunga. Lá andja wa nyɛtshi wanɛ, onto wɔ wɔlɔ nkokaka mpomana l’ekakasano lá demba kana enkina. Nde nkoka mpomana kaanga l’ɛhɛnyɔhɛnyɔ me ewandji wɛ lɛɛta. Koko, nde nkoka ndjala la eshikikelo ante: Ndjambe nkoka ndjala osukɔ wɔnde, nde angokotshɛ djɛ nde mba nkando edjinge ndonga. Koyawopola ente, ‘lemi hanɛ ntɛnyi wopo woheta akambo wɔlɔ le enkambi wɛ Ndjambe?’ Lamo? Iso tolekɔ la eshikikelo kɛnɛ ente: ‘Yehova nsukaka anto ankfumɔ wambɔkfɔ edjinge nde mbetsholaka anto ankfumɔ wambomunama.’​—Yee. 41:1-3; 145:14-19.

‘Onto wɔ wɔlɔ’ apayalaka l’osasa wina wopomana anto ankina l’ekakasano. Koko, nde nkeketshamaka wina w’ewande ante ‘akambo wangoyala wɔlɔ le wanɛ woka Ndjambe kɛ nsɔsɔlɔ wɔma ladjikɛnde iwɔ ndowokaka wɔma.’​—Los. 8:11-13; Djɔ. 31:3-6; Yee. 27:5, 6.