Nôno. A vers disi e taki fu wan sma di e kisi furu problema, ma a e horidoro.

Luku san den tra vers e taki: „No de leki wan ogri sma di seti luru fu kan teki a tanpresi fu wan reti-ati sma. No fufuru sani tyari gowe fu en oso, bika awinsi wan reti-ati sma fadon seibi tron a o opo tanapu, ma den ogri sma o fadon, fu di ogri miti den. No prisiri te yu feanti fadon. Te a naki futu yu no musu breiti.”​—Odo 24:15-17.

Son sma e denki taki vers 16 e taki fu wan sma di sondu, ma a e sori berow èn a e meki sani bun baka nanga Gado. Tu kerki fesiman fu Ingrisikondre ben skrifi taki den kerki fesiman fu fosi èn fu a ten disi e fruklari a vers disi na a fasi dati. Den taki tu dati disi wani taki dati efu wan bun sma du wan seryusu sondu, ma a lobi Gado ete, dan Gado o feni en bun ete efu a sori berow. Wan sma di e du wan sani di Gado no lobi, o lobi a denki disi. Kande a e denki taki awinsi a sondu ibri tron baka, Gado o gi en pardon.

Ma a no dati vers 16 wani taki.

Wi kan frustan a Hebrew wortu di vertaal nanga „fadon” na ini vers 16 nanga 17 na difrenti fasi. A kan abi fu du nanga wan sma noso wan sani di fadon trutru. Fu eksempre, wan kaw di e fadon na pasi, wan sma di e fadon komoto fu wan daki, noso wan ston di e fadon na gron (Deut. 22:4, 8; Amos 9:9). Ma a wortu disi kan abi fu du tu nanga wan sma di e fadon na wan agersifasi. Fu eksempre: „Na Yehovah e sori wan man fa a musu waka èn a e prisiri nanga a pasi di a man disi teki. Awinsi a sma fadon, toku a no o tan didon leki na fringi sma fringi en na gron, bika Yehovah e hori en anu fu a opo tanapu.”​—Ps. 37:23, 24; Odo 11:5.

Professor Edward H. Plumptre e taki dati noiti den e gebroiki a Hebrew wortu di vertaal nanga „fadon” gi wan sma di sondu. Dati meki wan tra sabiman vertaal vers 16 na a fasi disi: „Awinsi sortu ogri sma e du nanga Gado pipel den no o man wini den. Na den ogrisma o tron lasiman!”

Sobun, Odo 24:16 no e taki fu wan sma di sondu, ma a e taki fu wan sma di e kisi furu problema. Na ini na ogri grontapu disi wan sma di e dini Yehovah kan kon siki noso a kan kisi tra problema. Kande a e tan na ini wan kondre pe lanti e frufolgu den anbegiman fu Yehovah. Ma a kan abi a frutrow taki Yehovah o yepi en fu horidoro. Furu tron wi si fa Yehovah meki sani waka bun gi en pipel. Fu san ede? Fu di „Yehovah e yepi ala den wan di de fu fadon èn a e opo ala sma di e didon na gron, fu di den brokosaka.”​—Ps. 41:1-3; 145:14-19.

„Wan reti-ati sma” no e prisiri te trawan abi problema. A sabi taki „a o go bun nanga den sma di abi lespeki gi a tru Gado”.​—Preik. 8:11-13; Yob 31:3-6; Ps. 27:5, 6.