Tuir loloos, neʼe laʼós versíkulu neʼe nia signifikadu. Maibé bainhira versíkulu neʼe temi kona-ba ema neʼebé monu, neʼe koʼalia kona-ba ema neʼebé hasoru susar beibeik. Liafuan “nia sei hamriik fali” koʼalia kona-ba tahan susar sira-neʼe.

Hanoin toʼok kona-ba versíkulu neʼe nia kontestu: “Keta hanoin aat hodi subar an besik ema laran-loos nia uma atu ataka; keta harahun ninia fatin atu deskansa. Maski karik ema laran-loos bele monu ba dala hitu, nia sei hamriik fali, maibé ema laran-aat sei sidi ba nafatin tanba hasoru susar. Keta haksolok bainhira ó-nia inimigu monu, no keta sente kontente iha ó-nia laran bainhira nia sidi.”​—Prov 24:15-17.

Ema balu hanoin katak versíkulu 16 koʼalia kona-ba ema neʼebé monu ba sala maibé arrepende an no Maromak fó perdua ba nia. Ulun-naʼin relijiaun naʼin-rua husi rai-Inglaterra hakerek katak ema iha tempu uluk no mós ohin loron esplika versíkulu neʼe iha dalan hanesan neʼe. No esplikasaun neʼe loke dalan ba “ema diʼak atu halo beibeik sala neʼebé sériu, maibé sira kontinua hadomi Maromak, no Maromak nafatin simu sira tanba sira arrepende an”. Ema neʼebé lakohi kontrola ninia hakarak neʼebé sala karik gosta esplikasaun neʼe. Karik nia hanoin katak maski nia halo sala beibeik, Maromak sei sempre fó perdua ba nia.

Maibé neʼe laʼós versíkulu 16 nia signifikadu.

Liafuan Ebraiku neʼebé tradús nuʼudar “monu” iha versíkulu 16 no 17 bele uza iha dalan oioin. Porezemplu, karau neʼebé monu iha dalan, ema neʼebé monu husi uma-kakuluk, ka fatuk neʼebé monu ba rai. (Deut 22:4, 8; Amós 9:9) Liafuan neʼe mós bele uza iha dalan simbóliku hanesan tuirmai: “Hahalok loos husi ema neʼebé laran-metin sei halo ninia dalan sai loos, maibé ema aat sei monu tanba ninia hahalok aat sira.”​—Prov 11:5; 17:20.

Maibé Profesór Edward H. Plumptre esplika katak liafuan Ebraiku “monu” nunka uza atu refere ba monu ba sala. Tan neʼe, matenek-naʼin seluk halo konkluzaun kona-ba versíkulu 16 hodi dehan: “Saugati deʼit atu trata aat Maromak nia povu, tanba sira sei hetan susesu, maibé ema aat sei la hetan susesu.”

Ida-neʼe hatudu katak Provérbios 24:16 la koʼalia kona-ba ema neʼebé monu ba sala, maibé koʼalia kona-ba ema neʼebé hasoru beibeik problema ka susar. Iha mundu aat neʼe, ema laran-loos karik hasoru problema saúde ka problema seluk. Karik governu fó-terus ba nia tanba ninia fiar. Maibé nia bele iha konfiansa katak Maromak sei apoia nia no ajuda nia atu tahan no hetan susesu. Ita haree beibeik katak Maromak nia atan sira sempre hetan susesu. Tanbasá? Tanba Bíblia promete katak “Jeová apoia ema hotu neʼebé atu monu no hametin ema hotu neʼebé kbiit-laek”.​—Sal 41:1-3; 145:14-19.

Maski “ema laran-loos” la kontente tanba ema seluk hasoru problema, maibé nia sente kmaan tanba hatene katak “ema neʼebé hamtaʼuk Maromak loos, ikusmai sei hetan buat diʼak, tanba sira hamtaʼuk [Maromak]”.​—Ecle 8:11-13; Job 31:3-6; Sal 27:5, 6.