Teenziwaamba pe vesi eeyi. Yaamba muntu uukkala kachitikilwa amapenzi miingi asiyene-siyene pesi kalisimya mumapenzi aayo.

Atulange makani azyungulukide vesi eeyi aati: “Utayubilili afwaafwi aŋanda yamululami kojisi makanze mabi; utanyonyooni busena bwakwe bwakulyookezyela. Nkaambo mululami ulakonzya kuwa ziindi zili ciloba, nokuba boobo ulanyamuka alimwi, pele ibabi balalebwa amapenzi. Ikuti sinkondonyoko wawa, utasekeleli pe, alimwi ikuti naa walebwa, moyo wako utakkomani pe.”—Tus. 24:15-17.

Bamwi bayeeya kuti vesi 16 yaamba muntu uyindulula kuchita zibi mpawo walekelelwa. Muchikozyano, bapati bazikombelo babili bakuEngland bakaamba kuti: “Kuzwa chiindi bayiisi bazikombelo bayipandulula oobo vesi eeyi.” Baalumi aaba babili bakayungizya kuti: “Kwiipandulula oobu vesi eeyi kulikozyenie akwaamba kuti zilachita kuti mululami akkale kachita zibi zipati pesi azumanane kuyanda Leza mpawo Leza amulekelele akaambo kakuti nga wakumbila lulekelelo.” Muzeezo ooyu ulakonzya kumubotezya muntu uutayandi kuleka kuchita zibi. Ulakonzya kuyeeya kuti nikuba kuti wabisya kwaziindi zyiingi Jehova ulamulekelela.

Eezi teenziwaamba pe vesi 16.

Bbala lyachiHebbrayo lyakuti “kuwa” lijanika muvesi 16 a17 lilakonzya kubelesegwa munzila zisiyene-siyene. Bbala eeli lilakonzya kwaamba kuwa kwakuwa. Muchikozyano, ng’ombe yawida munzila, muntu wawa kuzwa achiluli chang’anda naakuti bbwe lyawida aansi. (Dt. 22:4, 8; Am. 9:9) Bbala eeli lilakonzya kubelesegwa munzila yakukozyanisya mbuli mbulibelesedwe aawa: “Jehova ulasololela ntaamu zyamuntu ikuti naa nzila yamuntu ooyo yamukonda. Nokuba kuti wawa, takonzyi kulipwaila ansi, nkaambo Jehova ulimujatilide kujanza.”—Int. 37:23, 24.

Atubone zyakaambwa aPulofesa Edward H. Plumptre. Wakati: “Bbala lyachiHebbrayo lyakuti [“kuwa”] talibelesegwi kwaamba muntu wachita chibi pe.” Umwi sikulanga-langa makani amuBbayibbele wakapandulula vesi 16 kuti: “Takugwasyi pe kubajata munzila iitali kabotu bakombi baLeza nkaambo bayoozwidilila pesi babi tabakazwidilili pe.”

Bbala lyakuti “kuwa” talyaambi kuchita chibi pe. Lugwalo lwaTusimpi 24:16 lwaamba muntu uswaanana amapenzi naakuti buyumu-yumu. Munyika eeyi mbi muntu mululami ulakonzya kuchiswa naakuti kuswaanana abumwi buyumu-yumu. Alubo ulakonzya kupenzegwa amfulumende. Pesi ulasyoma kuti Leza uyoomugwasya kuti alisimye akuti azwidilile. Eezi tatuli kuzibona na kazili kuchitika kubakombi baJehova? Tulikuzibona. Nkamboonzi nibali kuzwidilila? Nkaambo “Jehova ulabajatilila boonse aabo bayanda kuwa alimwi ulababusya boonse aabo bavwunteme akaambo kakulemenwa.”—Int. 41:1-3; 145:14-19.

“Mululami” tabotelwi pe kuti bamwi banjila mumapenzi. Pesi ulawumbulizigwa akaambo kakuziba kuti zintu “ziyoobeendela kabotu aabo bayoowa Leza mwini-mwini, akaambo kakuti balamuyoowa.”—Muk. 8:11-13; Job. 31:3-6; Int. 27:5, 6.