Fundo ya pa vesi ili ni iyi yayi. Apa ŵakuyowoya za munthu uyo wakukumana na masuzgo mwakuwerezgawerezga kweni wakuzizipizga.

Tiyeni tiwone mavesi agho ghali pamanyuma na panthazi pa vesi 16. Mavesi agha ghakuti: “Ungajoŵeleranga nga ni muheni pafupi na nyumba ya murunji chara. Ungabwanganduranga yayi malo ghake ghakupumulirapo. Pakuti murunji wangawa kankhondi na kaŵiri ndipo wawukengeso, kweni muheni wakhuŵarenge na soka. Para mulwani wako wawa, ungasekeleranga chara, ndipo para wakhuŵara, mtima wako ungakondwanga chara.”—Zinth. 24:15-17.

Ŵanthu ŵanyake ŵakuyowoya kuti vesi 16 likuyowoya za munthu uyo wakunanga kweni wakulapa na kuŵaso paubwezi uwemi na Chiuta. Mwachiyelezgero, ŵalongozgi ŵavisopa ŵaŵiri ŵa ku England ŵakalemba kuti ŵanthu awo ŵakupharazga, ŵasono na ŵakale wuwo, wose ndimo ŵakulongosolera vesi ili. Ŵakayowoyaso kuti kalongosolero aka kangalongora nga kuti “munthu muwemi wangachita kwananga kukuru, kweni wangalutilira kuŵa paubwezi na Chiuta chikuru nyengo zose wakulapa.” Munthu uyo wakutemwa kale kuchita kwananga, wangayitemwa fundo iyi. Wangaghanaghana kuti nanga wangananga mwakuwerezgawerezga, Chiuta wamugowokerenge nyengo zose.

Kweni ivi ndivyo vesi ili likung’anamura yayi.

Mazgu Ghachihebere agho ghali kung’anamulika kuti “kuwa” mu vesi 16 na 17 ghangang’anamura fundo zakupambanapambana. Nyengo zinyake ghangang’anamura kuwa kweneko. Mwachiyelezgero, ng’ombe yawa mu msewu, munthu wawa kufuma pachanya panyumba, panji libwe lawa pasi. (Doto. 22:4, 8; Am. 9:9) Kweni lizgu ili lingaŵaso na ng’anamuro linyake, nga umo viliri pa lemba lakulondezgapo ili, ilo likuti: “Yehova wakulongozga mendero gha munthu, para wakukondwa na nthowa zake. Nanga wangakhuŵara, wawirengethu yayi pakuti Yehova wakumukora pa woko.”—Sal. 37:23, 24; Zinth. 11:5; 13:17; 17:20.

Ndipouli, wonani ivyo wakayowoya Purofesa Edward H. Plumptre, wakati: “Lizgu Lachihebere ilo lili kung’anamulika kuti [“kuwa”], likung’anamura kwananga yayi.” Ndipo nkhwantha yinyake yikalongosora vesi 16 munthowa iyi: “Mbuchindere kusuzga ŵanthu ŵa Chiuta chifukwa nyengo zose ŵatondenge. Kweni ŵanthu ŵaheni ŵatondenge yayi.”

Ntheura “kuwa” uko kukuyowoyeka pa Zintharika 24:16 kukung’anamura kuchita zakwananga yayi, kweni kukumana na masuzgo mwakuwerezgawerezga. Mu charu chiheni ichi, munthu murunji wangalwara panji kukumana na masuzgo ghanyake. Ndipo nyengo zinyake wangatambuzgika na boma. Kweni wangagomezga kuti Chiuta wali nayo ndipo wamovwirenge kuzizipizga na kutonda masuzgo. Jifumbani kuti: ‘Kasi nkhujiwonera nekha yayi kuti kanandi ŵateŵeti ŵa Chiuta vinthu vikuŵayendera makora?’ Chifukwa wuli? Chifukwa tikugomezga kuti “Yehova wakufighilira wose awo ŵawa, wakuwuska wose awo ŵasindama.”—Sal. 41:1-3; 145:14-19.

“Munthu murunji” wakukondwa yayi para ŵanji ŵakusangana na masuzgo. Kweni wakupembuzgika chifukwa wakumanya kuti “awo ŵakopa Chiuta waunenesko vinthu viŵayenderenge makora, chifukwa ŵakumopa.”—Muph. 8:11-13; Yobu 31:3-6; Sal. 27:5, 6.