A si zwine heyi ndimana ya amba zwone. I khou amba muthu ane a ṱangana na thaidzo nnzhi, fhedzi a dzi konḓelela.

Kha ri vhale ndimana ya 15 na ya 17 henefha kha Mirero 24. Dzi ri: “U songo lalela tsini na muḓi wa muvhuya u tshi ṱoḓa u ita vhuvhi; u songo fhelisa fhethu hawe ha u awela. Ngauri muvhuya naho a wa lwa sumbe, u ḓo dovha a vuwa, fhedzi vhavhi vha ḓo wela khomboni. Musi swina ḽau ḽi tshi wa, u songo takala, musi ḽi tshi khukhulwa, u songo tenda mbilu yau i tshi takala.”—Mir. 24:15-17.

Vhaṅwe vhathu vha humbula uri ndimana ya 16 i khou amba nga ha muthu ane a ita tshivhi a rembuluwa a dovha a vha na vhushaka havhuḓi na Mudzimu. Sa tsumbo, vharangaphanḓa vhavhili vha vhurereli vha ngei England vho ṅwala uri “vhafunzi vha kale na vha zwino vho ṱalutshedza yeneyo ndimana nga u ralo.” Vhenevho vharangaphanḓa vho dovha vha ri yeneyo ṱhalutshedzo i nga dovha ya amba uri “muthu o lugaho a nga ita . . . zwivhi zwihulwane, a ḓi dzula a tshi funa Mudzimu na u funwa ngae ngauri u a rembuluwa.” Yeneyo ṱhalutshedzo i nga takadza muthu ane a takalela u ita zwivhi. A nga humbula uri naho a tshinya a tshi dovholola, Mudzimu u ḓo ḓi mu hangwela.

Fhedzi zwenezwo a si zwine ndimana ya 16 ya amba zwone.

Ipfi ḽa Luhevheru ḽi ambaho ‘u wa’ ḽi re kha ndimana 16 na 17 ḽi nga shumiswa nga nḓila dzi sa fani. Ḽi nga amba u wela fhasi. Sa tsumbo, mboho i nga wela fhasi nḓilani, muthu a nga wa e kha ṱhanga, kana tombo ḽi nga wela fhasi. (Dot. 22:4, 8; Amosi 9:9) Ḽeneḽi ipfi ḽi nga dovha ḽa amba zwiṅwe. Sa tsumbo: “Yehova u dededza ṋayo dza munna musi A tshi takalela nḓila yawe. Naho a suvha, a nga si we, ngauri Yehova u mu tika nga tshanḓa tshawe.”—Ps. 37:23, 24; Mir. 11:5; 13:17; 17:20.

Fhedzi ṱhogomelani zwo ambiwaho nga Muphurofesa ane a pfi Edward H. Plumptre, o ri: “Ipfi ḽa Luhevheru ḽi ambaho ‘u wa’ a ḽi ambi u ita tshivhi.” Nga zwenezwo, muṅwe mugudi u ṱalutshedza ndimana ya 16 nga heyi nḓila: “U tambudza vhathu vha Mudzimu ndi u ḓifhedzela tshifhinga, ngauri tshifhinga tshoṱhe vha a bvelela, hone vhavhi a vha bveleli.”

Nga zwenezwo, zwoṱhe zwi sumbedza uri Mirero 24:16 a i ambeli kha u ita tshivhi, fhedzi i ambela kha u ṱangana na dzithaidzo kana vhuleme lunzhi-lunzhi. Kha shango ḽivhi ḽa ṋamusi, muvhuya a nga sedzana na thaidzo dza mutakalo kana thaidzo dziṅwe-vho. A nga ita na u tovholwa nga muvhuso nga nṱhani ha lutendo lwawe. Fhedzi a nga fhulufhela uri Mudzimu u ḓo mu tikedza nahone u ḓo mu thusa uri a konḓelele. Ndi lunzhi ri tshi vhona vhashumeli vha Mudzimu zwi tshi vha nakela. Ndi ngani? Ri na vhungoho ha uri “Yehova u tika vhoṱhe vhane vha khou wa, u vusa vhoṱhe vho tsikeledzwaho.”—Ps. 41:1-3; 145:14-19.

“Muvhuya” ha takali musi a tshi vhona vhaṅwe vhe na dzithaidzo. Fhedzi u khuthadzwa nga u ḓivha uri “vhane vha ofha Mudzimu wa ngoho zwi ḓo vha tshimbilela, ngauri vha a mu ofha.”—Muh. 8:11-13; Yobo 31:3-6; Ps. 27:5, 6.