Ha xiqisee yootiyoobay hegaa gidenna. Ha xiqisee daro metoy gakkikkokka gencciya uraabaa yootees.

Ane ha xiqisiyaa yuushuwan deˈiya qofaa beˈoos: “Xilluwaa keettaanne aquwaa bonqqanau qoppiya iita asadan hanoppa. Xillo asi laapputoo kunddikkokka denddees; shin iitati metuwan xayana. Ne morkkee kunddiyo wode ufaittoppa; i xubettiyo wodekka, ‘Hashshu!’ gooppa.”—Lee. 24:15-17.

Issoti issoti paydo 16y, zaari zaaridi nagaraa oottikkokka Xoossaara loˈˈo dabbotaa medhdhana danddayiya uraabaa yootees giidi qoppoosona. Leemisuwawu, haymaanootiyaa kaalettiya Inggilize biittan deˈiya naaˈˈu asati “sabaaketi beni wodekka haˈˈikka ha xiqisiyaa” hegaadan qonccissiyoogaa xaafidosona. Haymaanootiyaa kaalettiya he asati “loˈˈo asi gita nagaraa oottidikka ba nagaraappe simmiyo gishshawu, Xoossaa siiqananne A ufayssana danddayiyoogaakka” he qofay bessiyoogaa yootoosona. Nagaraa oottiyoogaa dosiya uri he qofaa dosana danddayees. I zaari zaaridi nagaraa oottinkka Xoossay maarees giidi qoppana danddayees.

SHin hegee paydo 16y yootiyooba gidenna.

Paydo 16⁠ninne 17n ‘kunddikko’ qassi “kunddiyo” geetettida Ibraawetto qaalaa dumma dumma ogiyan goˈettana danddayettees. Leemisuwawu, he qaalaa birshshettay, issi mehee ogiyan kunddiyoogaa, woy issi uri kaaraappe kunddiyoogaa bessiyaaba gidana danddayees. (Zaa. 22:4, 8; Amo. 9:9) SHin he qaalay hegaappe dummabaa yootana danddayees: “Asai baanau bessiya ogiyaa GODAI kaalettees. I bana ufaissiya asata minttees. Eti xubettikkokka kunddokkona; aissi giikko, GODAI eta kushiyaa oiqqidi kaafees.”—Maz. 37:23, 24; Lee. 11:5.

He xiqisiyan kunddiyoogaa giya Ibraawetto qaalay nagaran kunddiyoogaa qonccissanawu mule geli erennaagaa issi Profeeseree yootiis. Hegaa gishshawu, issi eranchchay paydo 16 hagaadan giidi qonccissiis: “Xoossaa asawu ubbatoo injjetiyo gishshawu eta qohiyoogawu waagi baawa; shin iitatussi injjetenna!”

Yaatiyo gishshawu, Leemiso 24:16y nagaraa oottiyoogaa gidennan, metoy woy waayee darotoo gakkiyoogaa qonccissiyoogaa ha ubbabaappe akeekoos. Ha iita alamiyan xillo uraa harggee woy hara metoy gakkana danddayees. Kawotettaappekka yedetay A gakkana danddayees. SHin I genccanaadaaninne xoonanaadan Xoossay A maaddanaagaa ammanettana danddayees. Neeni Xoossaa asawu hanotay injjetiyoogaa aapputoo beˈidaakko ane qoppa. Aybissi? Nuuni ‘Goday hokkidaageeta ubbaa zemppissiyoogaa qassi kunddidaageeta ubbaa denttiyoogaa’ ammanettiyo gishshataassa.—Maz. 41:1-3; 145:14-19.

“Xillo asi” harati metootiyoogan ufayttenna. Hegaappe, “Xoossaassi yayyiyaageetussi sa7ai lo77anaagaa” I eriyo gishshawu ufayttees.—Era. 8:11-13; Iyy. 31:3-6; Maz. 27:5, 6.