The truth be say, that one no be wetin this verse de talk. But this verse de talk about person wey de face many problem but e de endure everytime.

Make we see wetin other verse them wey dey before and after Proverbs 24:16 talk. “Make you no hide de wait near the house of righteous person to do the person bad; make you no destroy the place wey e de rest. Because good person fit fall seven times, and e go get up again. But problem go make wicked person fall. When your enemy fall, make you no happy. And when e fall, make you no allow your heart de glad.”​—Prov. 24:15-17.

Some people de talk say that verse 16 de talk about person wey sin but e repent and get good friendship with God again. For example, two leader for religion for England talk say, people wey de preach, both olden days and for our time, don explain this verse like that. They still talk say this one go mean say, “e dey possible for good person to put hand for serious sin, but e continue to love God and be friend of God because e repent.” Person wey no want stop to sin fit like this kind explanation. The person fit think say even if e continue to sin, God go always de forgive-am.

But this one no be wetin that verse 16 mean.

They fit use the Hebrew word wey they translate as “fall” for verses 16 and 17 for different ways. For example, they fit talk say animal fall for road, person fall from roof, or stone fall for ground. (Deut. 22:4, 8; Amos 9:9) But this word fit still mean another thing. For example, Bible talk say: “Jehovah de direct the way person de waka when e like wetin the person de do. Even if e fall, e no go fall reach ground because Jehovah de hold e hand.”​—Ps. 37:23, 24; Prov. 11:5; 13:17; 17:20.

But notice wetin Professor Edward H. Plumptre talk. E talk say: “They no ever use the Hebrew word for fall to mean sin.” So another person wey study Bible matter for school explain verse 16 like this: “E dey useless to treat God people for bad way because they go always succeed, but wicked people no be like that!”

So, all this one show say Proverbs 24:16 no de talk about the sin wey person de commit, but na about problems wey person de face everytime. For this wicked world wey we dey, righteous person fit sick or face other problems. Government people fit even suffer-am because of the things wey e believe. But this kind person fit trust say God go support-am and help-am to face the problem well and succeed. Ask yourself say, ‘I no de see say many times, servants of God de manage to handle their problem well?’ Why e be like that? We dey sure say “Jehovah de support all the people wey de fall and e de raise all the people wey problem don bend.”​—Ps. 41:1-3; 145:14-19.

Righteous person no dey happy because other people get problem. Instead e mind go come down because e know say things “go better for people wey de fear the true God, because they fear-am.”​—Eccl. 8:11-13; Job 31:3-6; Ps. 27:5, 6.