Kusala yisyene, lilembali ngalikugopolela yeleyo. Mmalo mwakwe likusala ya mundu jwakusasimana ni yakusawusya yejinji mwakuwilisyawilisya, nambope jwalakwe akusapilila.

Kuti tujipikanichisye ngani josope kwende tulole ndime sine syasiŵandikene ni ndime 16. “Mkasimjuŵilila nyumba ja mundu jwambone, kutenda yachiswamba mpela mwakusatendala mundu jwakusakala, kasimputa kose ngondo panyumba jakwe. Mundu jwambone akusagwa kasano ni kaŵili ni akusajimukasoni, nambo ŵandu ŵakusakala yisawusyo yikusiyagwila. Mkasimsengwaga naga m’magongo jwenu asimene ni yisawusyo, mtima wenu mkasiwusangalalaga pati akuŵele jwalakwejo.”—Mis. 24:15-17.

Ŵandu ŵane akusati ndime 16 jikusasala ya mundu jwakusatenda yakulemwa ni kupitikukaga mtima kaneko ni kuŵasoni paunasi wambone ni Mlungu. Achimlongola ŵane ŵaŵili ŵadini ŵa ku England ŵasasile kuti “ŵakulalichila ŵamasiku agano soni ŵakala asakulilondesya lilembali” m’litala lyeleli. Achimlongolaŵa ŵajonjechesyesoni kuti “ŵakulalichilaŵa akusayiwonaga kuti mundu jwambone mpaka atendeje . . . yakulemwa yekulungwa nambo nikupitilisyaga kumnonyela Mlungu soni kuŵa najo paunasi ligongo akupitikuka mtima paulendo wuliwose.” Nganisyo syelesi mpaka siŵe syambone kwa ŵandu ŵakusanonyela kutenda yakulemwa. Jemanjaji mpaka aganisyeje kuti Mlungu mpaka ŵakululuchileje atamose ali mkutenda ulemwa mwakuwilisyawilisya.

Nganisyo syelesi sili syakulemwecheka, ligongo lilembali ngalikusagopolela yeleyi.

Maloŵe ga Chihebeli gaŵagagopolele kuti “kugwa” soni “kukuŵala” mu ndime 16 ni 17, gakusakamula masengo m’matala gejinji. Mpaka gagopolele kugwa kusyesyene. Mwachisyasyo ng’ombe mpaka jigwe pamsewu, mundu mpaka agwe pamsakasa soni tumaganga mpaka tugwile pasi. (Deut. 22:4, 8; Amo. 9:9) Nambotu liloŵeli mpaka likolesoni ngopolelo jine. Aganichisye ayi, “AMBUJE akusalongolela wende wa mundu jwagoloka ni kumchenjela mundu jwele matala gakwe gakuŵa gakumnonyelesya jwalakwe. Atamose agwe ngasawulala ligongo AMBUJE akusamkamula mkono.”—Sal. 37:23, 24; Mis. 11:5; 13:17; 17:20.

Nambo alolesoni yaŵaŵechete Professor Edward H. Plumptre. Jwalakwe jwatite, “Maloŵe ga Chihebeli gaŵagagopolele kuti [“kugwa”], ŵangagakamulichisyaga masengo pakwamba ya ulemwa.” Nombenajo jwamlijiganye mnope ya Baibulo jwine jwajilondesisye ndime 16 chamti myi, “Mpaka kuŵe kulilagasya kwatendela yindu yangali chilungamo ŵandu ŵa Mlungu, ligongo jemanjaji yindu yikusiyajendela chenene, nambo ŵakutenda yakusakala yangajendela.”

Myoyo, mmalo mwakusala ya “kugwa” kwa kutenda ulemwa, lilemba lya Misyungu 24:16 likugopolela kusimana ni yakusawusya kapena yipwetesi mwakuwilisyawilisya. M’masiku gambesiga mundu jwambone mpaka alajeje ni ulwele soni yakusawusya yine. Soni ndaŵi sine jwalakwe mpaka alagasidweje ni ŵaboma. Nambope jwalakwe mpaka akole chikulupi chakuti Mlungu chachimkamuchisya kuti akombole kupilila yakusawusyayi. Mwine wawojo pakwete payiweni kuti ŵandu ŵakusamtumichila Yehofa, yindu yikusiyajendela chenene. Ana pakwete paliwusisye ligongo lyakwe yikusaŵa myoyo? Tukusakulupilila kuti “AMBUJE akwakamuchisya wosope ŵakugwa m’yisawusyo ni akwajimusya ŵandu ŵagwile pasi.”—Sal. 41:1-3; 145:14-19.

Myoyo “mundu jwambone” ngakusasangalala ŵandu ŵane pakusimana ni yipwetesi. Mmalo mwakwe jwalakwe akusalimbikasidwa pakumanyilila kuti wosope ‘ŵakumpikanila Mlungu yindu tiyichajendela chenene.’—Jwak. 8:11-13; Yob. 31:3-6; Sal. 27:5, 6.