1. Matoleday a falocoˈ sasamaan a mifiyor kitaanan han?

TO ROMIˈAMIˈAD misiˈayaway kita to masakenaay a pasangaray, misaˈicelho a misaysay. Ano matoled ko falocoˈ ita, wa pasangar a misiˈayaw to pasangaray. O matoleday falocoˈ malecaday o mariˈangay tandaw, wa miˈafas to timolo ita, pakasoˈlin ato lipahak. Itini Taneng 24:10 ato sapatongal a pihongyak sanay: ‘Tahalifa kiso to pasangaray ano malonay i, wa miming ko ˈicel iso.’ O matoleday falocoˈ mifasaway to ˈicel ita, awaayto ko pakayraan ita a misaysay to masakenaay a pasangaray i kaˈorip.

2. O maanan a lalangian o papakatoled kitaanan alatek? Oniya lalakaw wa milengo to maanan?

² O patoleday to falocoˈ ita a lalangian adihayay, iraay ko kemoday, ato potalay. Matoled ko falocoˈ ita, pakayniay raraw no niyah, dangoc anca tatiih ko tireng, alatek awaay ko kaolahan noniyah a saaroˈan i likakawa ni Yihofa, anca itiniay i awaay ko maolahay to kimad a kilac mitosil. Oniya lalakaw wa milengo, wa ngaˈay midemak kita to maanan a pakalowid to matoleday falocoˈ.

3. Saka tatodongaw a minengneng to dangoc ato raraw noniyah, haharatengen ita ko maanan?

³ Pakayni i dangoc ato raraw no niyah, madoloay kita ira ko cowa ka tatodong a harateng. Telocto, o miharateng kita samanen cowa ka ngaˈay ko demak ita, cowa ko mamakahi ci Yihofa pacomod kitanan i faelohay hekal. O mahaenay a harateng tada katalawanto! Mihaenay, sasamaan ko pinengneng ita to dangoc ato raraw no niyah hani? Haratengen ita, sowal no Fangcalay Cudad edengan ci Yis Kristo, ‘ciraraway ko polong no tamdaw.’ (Loma 3:23) Kawra o kasadakan no Fangcalay  Cudad ci Yihofa cowa ka mikilim to raraw ita, cowa pisaali Cingra kitaanan malo malefotay. O sidaˈitay a Wama Cingra, makalimay padama kitanan, mihadidiayho kitaanan. Mafanaˈay Cingra pakayni ˈalomanay, sapiremoaw to dangoc no niyah, ira ko matatodongay a harateng to niyah, cowa ka madoloay, mansa miceriday Cingra misaday padama kitaanan.—Loma 7:18, 19.

4-5. O saka 1 Yohani 3:19, 20 samanay padama to tatosaay fafahiyan salikaka pakalowid to matoleday falocoˈ?

⁴ Nengnengen ko tinakoan ni Tepora aci Mariya. * Kaemangho, cowa ka ngaˈay ko paro no lomaˈ ci Teporaan, marariday pakangodo cingranan. Cowa picada to sapakahemek, telocto misakahmaway toniyah, soˈlin miming ko raraw, tada pasokiyaway ko niyah sanay miharateng. Malecaday ko pakayraan ni Mariya. Misasamsamay ko salawina cingranan, telocto awaay ko kapo noniyah sanay miharateng. Soˈlin maharekayto cingra micada to paputisem, awaay ko tatodong noniyah malo Misawacayay Tamdaw ni Yihofa sanay miharateng.

⁵ Kawra, oniya tatosaay fafahiyan salikaka cowa pisawad a midoko ci Yihofaan. Misamanay hani? Cecay lalangian i, fanekfekay cangra a mitolon ci Yihofaan, mifanaˈ Cingranan to roray no nafalocoˈan. (ˈOlic 55:22) Ikor mahapinangay nangra, mafanaˈay ko sidaˈitay a kakarayan Wama to pisakahmaw nangra toniyah a nalifetan, cipinangayho to kemoday falocoˈ nangra, pakaˈaraway to cowa ka hapinang noniyah a kangaˈayan.—ˈOsien ko 1 Yohani 3:19, 20.

6. Ano latekay mararaw ko tamdaw to malecaday a raraw i, wa ira ko masamanay a harateng hani?

⁶ O cecay tamdaw misaˈicelay misawad to tatiihay nanaman, mataˈlif ko cecay liyad pasokiyaway, tada matoleday to niyah alatek. Manaokaniw, ikor no mararaw makesem ko falocoˈ o matatodongay. (2 Korinto 7:10) Kawra, cowa ka ngaˈay pakidem ko pirikec to niyah, miharateng: “Awaay to ko kapo ako, sasamaan ci Yihofa misodod takowanan hani?” O mahaenay harateng cowa ka tatodong, o mamiocor kitaanan misawad midoko ci Yihofaan alatek. Haratengen, sowal i Taneng 24:10 ano matoled ko falocoˈ ita i, mimingayto ko ˈicel ita. Mihaenay, papasayra kita ci Yihofaan a mitolon. Micangacang to sasodod Ningra. Malecad o sowal i Isaya, malacafay Cingranan ‘misaysay to pasangaray i kalalaˈed.’ (Isaya 1:18) Maˈaraw no Kawas mikifalocoˈ a pasasiyor kita, o mamisodod kitaanan. Roma i, ngaˈayay misaali kita to sadama no malohemay malitengay, wa mihadidi cangra a padama kitanan misalof to kalalaˈed ita aci Yihofaan.—Yakop 5:14, 15.

7. Ano pasangaray kita miremo to cecay dangoc i, hano aka matoled ko falocoˈ?

 ⁷ Itini Frans cecay malohemay malitengay ci Langrike, pasowalan ningra ko misaˈicelay miremo to dangoc a tamdaw: “Itini pinengneng ni Yihofa, o moecelay tamdaw cowa ka eca ka mararaw, ano mararaw i makesemay ko falocoˈ, hanaca misaˈicelay a misalof.” (Loma 7:21-25) Mihaenay, ano pasangaran kiso miremo to cecay dangoc, awaayto ko kapo noniyah aka mahaen ko harateng. Haratengen, ngaˈay kita malo moecelay tamdaw i pinengneng no Kawas, o pakayniay sapatefoc, pakayniay mikiriwiˈay a sidaˈit ni Yihofa, cowa ko noniyah a ˈicel ko mitiˈeran.—Ifiso 1:7; 1 Yohani 4:10.

8. Ano matoled ko falocoˈ ita i, cima ko kakilimen to papadama hani?

⁸ Wa ngaˈay rihaday kita a misaali to sapadama no salikaka, samanen sahtoay o paro no lomaˈ kita. Makahiyay cangra mitengil to sowal ita, somowalho to padihkoay to falocoˈ a sowal, palipahak kitaanan. (Taneng 12:25; 1 Tisalonika 5:14) Itini Naiciliya fafahiyan salikaka ci Ciyawi marariday a matoled ko falocoˈ, sanay: “Ano awaay ko salikaka, cowato ko mamafanaˈ kako to sasamaan. O sapadama no salikaka mahapinangay ako, soˈlinay pacaˈof ci Yihofa to satolon ako. Mikitini cangranan mananamay ako sasamaan pakalalok to matoleday ko falocoˈ a tamdaw.” Kawra o haharatengen ita, awaay ko pinang no salikaka hahacowa misaali kita to sapakalalok. Ano misaali kita to sapadama i, talaˈayaw kita mikilim to matenesay a salikaka, mihadak to nafalocoˈan cangranan.

9. O ˈOlic 41:3 ato 94:19 hano taˈangay ko pakalalok kitaanan hani?

⁹ Pasayra ci Yihofaan a micangacang to sadama. Ano caka ngaˈay ko tireng ita, anca halafinto adada, wa pasangar a tawlik ko harateng. Soˈlin cowa ko mamidemak ci Yihofa to kafahkaan miadah kitaanan, kawra o mamihinom Cingra kitaanan, pafeli to ˈicel kitaanan, ho ngaˈay padotoc a mihadidi kita. (ˈOsien ko ˈOlic 41:3; 94:19.) Wa ocoren Ningra ko salikaka alatek, tayni i lomaˈ ita mipadang a dademak, mipadang micakay to dafong, anca malacafay kitaanan a mitolon. Papiharatengen Ningra kita to mihinomay a sinael alatek, tinakoen o roma sinael milengoay to faelohay hekal noikor, o lalipahakto ko kaˈorip no kahacecay tamdaw, cowato ko mamisemsem to adada.—Loma 15:4.

10. Tahalifa ci Isang to latiih hano caka padotoc a matoled hani?

¹⁰ Itini Naiciliya cecay faˈinayan salikaka ci Isang, malatiihay hato maˈepiay cingra, sowal no ising cowato ko ngangaˈay romakat cingra. Sowal ningra: “Matengil koniya lihaf, saka pelengaw sanay kako.” Padadotocay ci Isang a matoled han? Cowa! Samanay ko demak ningra hani? Sanay cingra: “Padotocay kako ato fafahi a mitolon to Kawas, padotocayho micekiw to Fangcalay Cudad. Misetekay kami to falocoˈ, mamiakoˈid to Kawas, miharateng to sapalemed Ningra tamiyanan, tinakoen paira to hatokel niyam itini faelohay hekal tahadaˈoc a maˈorip.”

11. Pakidem ko adada no fafahiyan salikaka ci Sinti i, hano kamayanho a lipahak hani?

¹¹ Itiniay i Mesiko fafahiyan salikaka ci sinti pakidemay ko adada. Samanay cingra misiˈayaw hani? Itini picada to saadah a tatokian, misaˈosiay cingra to patosokan, miceriday misawacay to tamdaw. Sanay cingra: “Mihaenay, o kaciharatengan ako o tao, cowa ko niyah aca, cowa ka haharateng sa mamatokad, adada, ato tada kasiniˈadaan ko niyah. O pakayraan ako i, ano masasowal to ising ato kangkofo licayan samanay ko paro no lomaˈ nangra, ato hano mipiliˈ to taˈangayay ko saroero a  katayalan. Mihaen wa mahapinang ako o maanan a sasowalen o kaolahan nangara. O roma ising sanay ko sowal, cowa ka pilicay ko adadaay a tamdaw cangranan: ‘Anini ngaˈayho kiso han?’ ˈAlomanay tamdaw pakayni ka ciharateng ako cangranan miakoˈiday takowanan, o roma tamdaw pafeliay to sapirinnak to niyah. Itini tada pasangaray a tatokian i nokaˈorip ako, pakahemekay ci Yihofa takowanan, cowa ka harateng ako konini.”—Taneng 15:15.

12-13. O adadaay anca malonayay ko tireng a matoˈasay salikaka tano maanan pakayraan misawacay to tamdaw? Samanay ko minaroˈan hani?

¹² O adadaay anca malonayay ko tireng a matoˈasay salikaka ecato ka adihay ko mitosilay a tayal matoleday ko falocoˈ alatek. Kawra mahelaayho no ˈalomanay salikaka ko pakayraan a misawacay to tamdaw. Itini Padaka, cecay fafahiyan salikaka ci Lawlie *. 37 miheca a tatokian, matiˈnangay i cecay kikay, tiˈer sanay toniya kikay a saselaˈ. O ekang ko adada ningra, kinapinaay a tokaden, ciadadaayho tono fanges. Soˈlin pasangar ko kaˈorip, cowa paselaˈ a mitosil. Misawacayan ningra ko miadahay cingranan a ising, telocto 17 ko mapadamaay ningra a tamdaw mafanaˈ ci Yihofaan.

¹³ O roma salikaka tatihay ko tireng cowa ka ngaˈay masadak, anca itiniay piniwingan. Itini Frans cecay malohemay malitengay ci Licate, mihadakay to ngaˈayay sapaini. Sanay cingra: “O mahaenay salikaka ngaˈayay paˈaraw to cudad ato casi, wa ngaˈay maˈaraw no mitaˈlifay a tamdaw, ngaˈayho mihadak to salicay. Pakayni i cowa ka ngaˈay pakalomalomaˈ mitosil a salikaka, o mahaenay ka sasowal pakalalokay cangranan.” Pakayni ka tatiih no tireng eca ka ngaˈay masadak a salikaka wa ngaˈay pakayni patikami ato patingwa a misawacay to tamdaw.

14. O taˈarawan ni Tafiti hano ngaˈay kita minanam hani?

¹⁴ Pakayni mihecaan, tatiih no tireng ato roma lalangian, awaay ko pakayraan ita itini kaolahan no niyah a saaroˈan matayal saki Yihofaan. Ano mahaenay, ngaˈayay minanam kita to hongti ci Tafitian. Makalimay ci Tafiti patado ci Yihofaan patireng to fangcalay sefi, kawra cowa ka piliˈen ni Yihofa cingra midemak tonini. Soˈlin mahaen, kamayan misarocod cingra midama to mipiliˈan no Kawas a tamdaw, pakiyahoayho to adihayay a dafong. O taˈarawan ni Tafiti ngaˈayay a nanamen ita!—2 Samuil 7:12, 13; 1 Rayray 29:1, 3-5.

15. Samanay ko salikaka ci Ike pakalowid to matoleday falocoˈ?

¹⁵ Itini Frans cecay faˈinayan salikaka ci Ike, tatiihay ko tireng ningra cowato kangaˈay padotoc malo malohemay malitengay, ano  kantangay a demak i lomaˈ caayto kangaˈay midemak. Sanay cingra: “Salakat awaayto ko kapo no niyah sanay miharateng, tada matoleday ko falocoˈ. Kawra, micadaan ako koniya pakayraan, mihai to cowa ko mamadangar ko roma a demak, kawra ngaˈayay misarocod kako to mamadangar a demak, lipahak a matayal saki Yihofaan. Cowa ko mamisawad kako, malecad ci Kitiyonan a toya 300 timoloay a sofitay, soˈlin maroray, tahatolasay a milood!”—Kakitaan 8:4.

16. Mikitini taˈarawan no coyoh mananam ita ko maanan hani?

¹⁶ O madimadiay a coyoh o ngaˈayay taˈarawan ita. Kinacecayay, sapilipalawaw ci Yihofa toya tatiihay hongti ci Ahapan, papihadakan ko coyoh to sapaini, ˈalomanay coyoh mihadakay to harateng noniyah. Ikor, misaka dademakan ni Yihofa ko sapaini no cecay coyoh, somowal to mamalaˈosi cingra. (1 Hongti 22:19-22) O romaroma coyoh matoleday, miharateng ‘na ecato ka somowal kako’ saan hokira? Cowa. Tada misapoeneray cangra, mitokel to papaˈdil ci Yihofaan.—Kakitaan 13:16-18; Paˈarawan 19:10.

17. Ano cowa ka ngaˈay matayal i cecay saaroˈan a matoled, sasamaan ko hademak hani?

¹⁷ Haratengen, ngaˈay malo laenoay no ngangan no Kawas a tamdaw, hanaca ngaˈay milasil to Hongti Kitakit Ningra o kalikoan a demak. Cowa ko saaroˈan ita ko piˈarawan no Kawas a minengneng to epoc ita, samanen o saaroˈan marariday mafalic. Ano misapoeneray kita, pakayni ci Yihofaan ato salikaka, o masakalimlaan kita. Mihaenay, cangacangen ci Yihofa padama kitaanan padotoc a misapoener ko falocoˈ, micerid miharateng to ngaˈayay taˈarawan no misapoeneray i Fangcalay Cudad. Roma i, mameten ita ko toki, makahi matayal saki salikaka.—ˈOlic 138:6; 1 Pitiro 5:5.

18-19. Itini cowa kaolah mitengil a kilac, samaan ngaˈ padotoc lipahak a mitosil?

¹⁸ Itini pitosilan iso a kilac ano awaay ko minaroˈan, anca awaay i lomaˈ ko ˈalomanay tamdaw, wa matoled kiso, maˈisang ko harateng han? Mahaen ko pakayraan, sasamaan kita padotoc a lipahak mitosil hani? Sapatongal lalakaw “ Samaan Mikitini Mitosilay Tayal Milifok to Taˈangayay Lipahak” iraay ko ngaˈayay sapaini. Roma i, pairaen ita ko matatodongay  pinengneng to mitosilay a tayal. O maanan ko matatodongay a pinegneng hani?

¹⁹ Haratengen, sakakaay a araaw ita mitosil i, o mamilasil to fangcalay ngangan no Kawas ato Hongti Kitakit Ningra. Ihkalay ko sowal ni Yis, cowa ka ˈaloman ko pakahelaay a tamdaw to saka tayra i ˈorip a lalan. (Matay 7:13, 14) Ano mitosil kita i, o malacafay ci Yihofaan, ci Yisan ato coyoh a matayal, tada kalikoan konini. (Matay 28:19, 20; 1 Korinto 3:9; Paˈarawan 14:6, 7) Ci Yihofa misolotay toya makalimay midoko Cingranan a tamdaw. (Yohani 6:44) Haratengen, ano caka olah mitengil ko tao anini to milasilan ita a lihaf, ano miliyaw i, o mamitengil alatek.

20. Mikitini kita i Yirimiya 20:8, 9 minanam, samaan ko demak ngaˈ pakalowid to matoleday falocoˈ?

²⁰ Mikitini taˈarawan no pairasolay a Yirimiya adihay ko mamananam ita. O mitosilan ningra a tamdaw tatiihay ko waywayan, marariday mapoˈi ato malikaf cingranan. (ˈOsien ko Yirimiya 20:8, 9.) Na matoleday cingra, sapisawadan nanay, kawra cowa pihaen ko demak ningra. Misamanay hani? Samanen ‘o sowal ni Yihofa’ malecaday o namal marengreng i falocoˈ ningra, caay ka ngaˈay eca ka sowalen ningra! Ano malecad kita ci Yirimiyaan, mitomes i falocoˈ ita to sowal no Kawas, wa malecad ko nafalocoˈan cingranan. Onini ko lalangian ita misongilaˈ a micekiw ato midotim to romiˈamiˈad. Mihaen ko demak ita, wa matongal ko lipahak, wa ciepoc ko mitosilay a tayal.—Yirimiya 15:16.

21. Hano pakalowid kita to matoleday falocoˈ hani?

²¹ O masowalay i fafekang ci Tepola sanay: “O matoleday o lalosidan ni Satan, ciˈicelay a midokaˈ.” Kawra palalinien to ˈicel ni Yihofa, cowa ka samaan ko lalosidan ni Satan. Mihaenay, ano o mananto a lalangian ko sakatoled ita, cangacangen ko sadama ni Yihofa. Wa padama Cingra kitaanan matatodong ko pinengneng to raraw ato dangoc noniyah. Ano adada kita i, wa damaen Ningra kita. Pakayni saaroˈan noniyah i likakawa no Kawas, papadama Cingra kitaanan matatodong ko pinengneng. Padamaho Cingra kitaanan tawlik a mirienang to mitosilay a tayal. Ano samaanto ko cariraw iso, ngaˈayay rihaday a mifowah to nafalocoˈan Cingranan. Ira ko sadama Ningra, wa pakalowid kiso to matoleday falocoˈ!