1. Ano an puwedeng mangyari sa sato kun pinangluluyahan kita nin buot?

KADA aldaw napapaatubang kita sa mga problema asin ginigibo ta an satong pinakamakakaya para makayanan iyan. Pero bako daw na mauyon ka na mas nakakayanan ta an mga problema pag dai kita pinangluluyahan nin buot? Kaya isipon ta na an pangluluya nin buot garo baga parahabon na puwedeng makahali kan satong kumpiyansa, kusog nin buot, asin kaugmahan. An Talinhaga 24:10 nagsasabi: “Kun pangluyahan ka nin buot sa aldaw nin kasakitan, an saimong kusog magigin diit na lang.” (NWT) Iyo an pangluluya nin buot puwedeng makaubos kan kusog na kaipuhan ta para makayanan an mga problema sa buhay.

2. Ano an mga puwedeng magin dahilan na pangluyahan kita nin buot, asin ano an pag-uulayan ta sa artikulong ini?

² Dakul na bagay an puwedeng makapaluya kan satong buot arog kan pagkabakong perpekto, mga kaluyahan, asin problema sa salud. Tibaad pangluyahan man kita nin buot dahil dai ta nakua an sarong asignasyon na gustong-gusto ta sa paglilingkod ki Jehova o nagpapatotoo kita sa sarong teritoryo na dai nagdadangog an kadaklan na tawo sa satong mensahe. Sa artikulong ini, pag-uulayan ta an nagkapirang magigibo ta tanganing malabanan an pangluluya nin buot.

3. Ano an makakatabang sa sato na magkaigwa nin balanseng pagmansay sa satong pagkabakong perpekto?

³ Madali sana sato na magin bakong balanse an pagmansay sa satong pagkabakong perpekto asin mga kaluyahan. Kaya tibaad isipon ta na dahil sa mga sala ta, dai na nanggad kita aakuon ni Jehova sa saiyang bagong kinaban. Peligrosong marhay an siring na pagmansay. Paano ta dapat mansayon an satong pagkabakong perpekto? Ipinapahiling kan Bibliya na apuwera ki Jesu-Cristo,  an gabos na tawo “nagkasala.” (Roma 3:23) Pero an awtor kan Bibliya bakong parahanap nin sala o perpeksiyonista. Imbes, saro siyang mamumuton na Ama na gustong tabangan kita. Mapasensiya man siya. Nahihiling niya an pagmamaigot ta na labanan an satong mga kaluyahan asin itanos an bakong balanseng pagmansay ta sa sadiri, asin andam siyang tabangan kita.—Roma 7:18, 19.

4-5. Kauyon kan 1 Juan 3:19, 20, taano ta dai nagpadaog sa pangluluya nin buot an duwang sister?

⁴ Isipa an halimbawa ni Deborah asin Maria. * Kan aki pa si Deborah, sa parati bakong marahay an pagtrato saiya kaya pagmati niya mayo siyang nagigibong tama. Bihira man siyang komendaran. Kaya nagin negatibo an pagmansay niya sa saiyang sadiri. Pag nakakagibo siya nin sadit na sala, grabe an pagkadisganar niya sa sadiri. Arog man kaiyan an nangyari ki Maria. Ipinapasupog siya kan mga paryente niya. Kaya pagmati niya mayo siyang halaga. Dawa kan nabawtismuhan na siya, pagmati niya bako siyang angay na magdara kan pangaran nin Diyos.

⁵ Alagad, an duwang sister na ini dai nagpundo sa paglilingkod ki Jehova. Taano? Ipinasa ninda ki Jehova an saindang pasan paagi sa udok sa pusong pagpamibi. (Sal. 55:22) Narealisar ninda na aram kan satong mamumuton na Ama sa langit an epekto sato kan mga inagihan ta asin kan satong negatibong kaisipan. Pero nahihiling niya man an karahayan sa satong puso—mga kuwalidad na tibaad dai ta nahihiling sa sadiri ta.—Basahon an 1 Juan 3:19, 20.

6. Ano an tibaad na magin reaksiyon nin saro kun magibo niya giraray an sarong maraot na gibo-gibo?

⁶ An saro na nagmamaigot na ipundo an sarong maraot na gibo-gibo tibaad magibo giraray iyan asin madisganar sa sadiri. Siyempre, normal sanang makonsiyensiya pag nagkasala kita. (2 Cor. 7:10) Pero dai man dapat na magin sobra an satong pagkakonsiyensiya asin kondenaron ta an satong sadiri na iniisip: ‘Mayo na talaga akong pag-asa. Paano pa ako mapapatawad ni Jehova?’ An siring na negatibong kaisipan bakong basado sa katotoohan asin puwedeng magin dahilan na magpundo kita sa paglilingkod ki Jehova. Tandaan an sinasabi kan Talinhaga 24:10—pag pinangluluyahan kita nin buot, magigin diit lang an satong kusog. Imbes, ‘makipaghusay’ ki Jehova paagi sa pagdulok saiya sa pamibi asin paghagad saiya nin tawad. (Isa. 1:18) Pag nahiling ni Jehova an saimong sinserong pagsulsol, papatawadon ka niya. Dugang pa, magdulok sa mga elder. Mapasensiya ka nindang tatabangan na maumayan sa espirituwal.—Sant. 5:14, 15.

7. Taano ta dai kita dapat pangluyahan nin buot kun nadidipisilan kitang gibuhon an tama?

⁷ Kun manungod sa mga may pinaglalabanan na kaluyahan, sinabi nin sarong elder sa Pransia na si Jean-Luc: “Para ki Jehova, an sarong matanos na tawo bakong saro na dai nasasala,  kundi saro na nagbabasol sa mga sala niya asin pirming nagsusulsol.” (Roma 7:21-25) Kaya dai pagkondenaron an sadiri kun may pinaglalabanan kang kaluyahan. Tandaan na gabos kita nakakagibo nin sala kaya kaipuhan ta gabos kan daing kapantay na kabuutan ni Jehova na itinatao niya sato paagi kan pantubos.—Efe. 1:7; 1 Juan 4:10.

8. Pag pinangluluyahan kita nin buot, kiisay kita puwedeng magdulok para sa tabang?

⁸ Mapapakusog kita kan satong mga tugang sa kongregasyon! Puwede sindang magdangog sato pag kaipuhan ta nin kaulay asin mapapakusog ninda an satong buot. (Tal. 12:25; 1 Tes. 5:14) Si Joy na sarong sister na taga Nigeria na nakamati nin pangluluya nin buot nagsabi: “Ano daw an gigibuhon ko kun mayo an mga tugang? An mga tugang patunay na talagang sinisimbag ni Jehova an mga pamibi ko. Nanudan ko pa ngani sainda kun paano papakusugon an iba na pinangluluyahan nin buot.” Pero kaipuhan tang tandaan na dai pirming aram kan mga tugang na kaipuhan ta nin pampakusog nin buot. Kaya tibaad kaipuhan na kita na mismo an mag-inot na magdulok sa sarong maygurang na kapagtubod tanganing sabihon na kaipuhan ta nin tabang.

9. Paano kita napapakusog kan Salmo 41:3 asin 94:19?

⁹ Manarig ki Jehova para sa tabang. Pag bakong marahay an pagmati ta asin lalo na kun may nagdadanay kitang hilang, tibaad masakitan kitang magdanay na positibo. Dai kita ngunyan milagrosong pinapaumayan ni Jehova, pero rinaranga niya kita asin tinatawan kan kusog na kaipuhan ta para makatagal. (Basahon an Salmo 41:3; 94:19.) Halimbawa, tibaad pahiruon niya an mga kapwa Kristiyano na tabangan kita sa mga gibuhon sa harong o sa pananaod. Tibaad pahiruon niya an satong mga tugang na mamibi kaiba ta. O tibaad ipagirumdom niya sa sato an nakakarangang mga punto na nasa saiyang Tataramon, arog kan magayunon na paglaom na perpektong buhay na mayong hilang asin kulog sa maabot na bagong kinaban.—Roma 15:4.

10. Taano ta dai nagdanay na pinangluluyahan nin buot si Isang pagkatapos na maaksidente siya?

¹⁰ Si Isang, na sarong brother na taga Nigeria, naaksidente kaya nagin paralisado siya. Sinabi saiya kan doktor na dai na siya makakalakaw giraray. “Talagang munduon ako asin pinangluyahan nin buot,” an sabi ni Isang. Pero nagdanay daw siyang arog kaiyan? Dai. Ano an nakatabang saiya? “Nungka kaming nagpundo ni agom sa pagpamibi ki Jehova asin sa pag-adal kan saiyang Tataramon,” an sabi ni Isang. “Determinado man kami na magin mapagpasalamat sa mga bendisyon na inaako mi, kaiba na an paglaom ta na mabuhay sa bagong kinaban nin Diyos.”

11. Paano nagin maugma si Cindy dawa kan nagkahilang siya?

¹¹ Si Cindy, na taga Mexico, na-diagnose na may nakakagadan na hilang. Paano siya nakatagal? Mantang nagpapabulong siya, ginibo niyang pasuhan na makapagpatotoo kada aldaw. Sinabi niya: “Paagi kaiyan, nakakapagpokus ako sa iba imbes na sa operasyon, sa kulog, o sa kun gurano karaot kan pagmati ko. Arog kaini an ginigibo ko: Pag nakikipag-ulay ako sa mga doktor o nars, hinahapot ko sinda manungod sa pamilya ninda. Dangan hinahapot ko sinda kun taano ta pinili ninda an dipisil na trabahong iyan. Pagkatapos kaiyan madali na sanang maaraman kun sa anong tema sinda puwedeng magin interesado. Dakul an nagsabi na bihira sa mga pasyente na haputon sinda, ‘Kumusta ka?’ Asin dakul an nagpasalamat sako sa pagmalasakit sainda. May mga nagtao pa ngani sako kan saindang contact information. Kaya sa dipisil na panahon na ini sa buhay ko, dai ko lamang linauman na arog kaini kadakulang panglaog na kaugmahan an itatao sako ni Jehova!”—Tal. 15:15.

12-13. Paano nagigibo kan nagkapirang may hilang o maluya na an hawak na makikabtang sa ministeryo, asin ano an resulta kaiyan?

 ¹² Puwedeng mangluya an buot kan mga may hilang o kan mga maluya na an hawak huling limitado na an puwede nindang magibo sa ministeryo. Dawa arog kaiyan, dakul sa sainda an naghahanap nin mga paagi na makapagpatotoo. Sa Estados Unidos, an sister na si Laurel nasa laog nin iron lung (sarong aparato sa paghangos) sa laog nin 37 taon! Nagkaigwa siya nin kanser, nag-agi sa darakulang operasyon, asin nagtagal nin pabalik-balik na problema sa kublit. Pero sa ibong kan dipisilon na marhay na mga problemang iyan, dai siya nagpundo sa paghuhulit. Nagpapatotoo siya sa mga nars asin sa iba pang nagduduman sa saiyang harong. Ano an resulta kaiyan? Natabangan niya an kisiyera 17 katawo na magkaigwa nin tamang kaaraman sa Bibliya! *

¹³ Si Richard na sarong elder sa Pransia may praktikal na suhestiyon para sa mga dai na makahali sa saindang harong o sa mga nakaistar sa mga nursing home. “Puwede sindang maglaag nin sadit na displey nin mga literatura. Pag mahiling iyan kan mga tawong nag-aagi, tibaad maghapot sinda manungod diyan. Makakapakusog iyan sa satong namumutan na mga tugang na dai na kayang makapagharong-harong.” Puwede man na makikabtang sa ministeryo an mga dai na makahali sa harong paagi sa pagpapatotoo paagi sa surat asin telepono.

14. Ano an magayunon na halimbawa na itinao ni Hading David?

¹⁴ Huli sa mga limitasyon na dara kan edad, salud, o iba pang bagay, tibaad bako kitang kuwalipikado sa sarong asignasyon o pribilehiyo sa kongregasyon o sa sirkito. Kun nasa arog kita kaiyan na sitwasyon, may manunudan kita sa halimbawa ni Hading David. Kan sabihon saiya na bako siya an pinili para magtugdok kan templo nin Diyos—sarong bagay na gustong-gustong gibuhon ni David—itinao niya an saiyang bilog na suporta sa saro na pinili nin Diyos para sa asignasyon. Sa katunayan, dakulaon an ikinontribwir ni David sa proyekto. Magayunon nanggad na halimbawa para sa sato!—2 Sam. 7:12, 13; 1 Cron. 29:1, 3-5.

15. Paano napangganahan ni Hugues an pangluluya nin buot?

¹⁵ Si Hugues, na sarong brother sa Pransia, nagpundo sa paglilingkod bilang elder huli sa mga problema sa salud, asin maski ngani an simpleng mga gibuhon sa harong dai na niya magibo. Sinabi niya: “Kan primero, pagmati ko mayo akong serbi saka pinangluyahan na marhay nin buot. Paghaloy-haloy, narealisar ko na importanteng akuon ko an sakong mga limitasyon, asin nagin maugma ako sa paggibo kan mga puwede ko pang gibuhon sa paglilingkod ki Jehova. Determinado akong dai pumundo.  Si Gideon asin an 300 niyang suldados gabos kaidto pagal na—arog ninda ipagpapadagos ko an laban!”—Hok. 8:4.

16. Ano an manunudan ta sa halimbawa kan mga anghel?

¹⁶ Marahay na halimbawa an maimbod na mga anghel. Durante kan pamamahala ni Hading Ahab, hinagadan ni Jehova nin suhestiyon an mga anghel kun paano lolokuhon an maraot na hadi. Nagkapirang anghel an nagtao nin ideya. Pero pinili nin Diyos an sarong anghel asin sinabi saiya na magigin mapanggana an saiyang suhestiyon. (1 Ha. 22:19-22) Pinangluyahan daw nin buot an ibang maimbod na mga anghel asin tibaad inisip na, ‘Taano ta nagtao pa ako nin suhestiyon?’ Siyempre dai. Tunay na mapakumbaba an mga anghel asin gusto ninda na itao ki Jehova an gabos na onra.—Hok. 13:16-18; Kap. 19:10.

17. Ano an dapat tang gibuhon kun pangluyahan kita nin buot dahil dai ta nakua an sarong pribilehiyo nin paglilingkod?

¹⁷ Tandaan na an satong pinakadakulang pribilehiyo iyo an magdara kan pangaran ni Jehova asin ihulit an saiyang Kahadian. Tibaad magbago an mga asignasyon, pero bako iyan an dahilan kun taano ta mahalaga kita sa Diyos. Pag mapakumbaba kita, nagigin kawili-wili kita ki Jehova saka sa mga tugang. Kaya makimahirak kita ki Jehova na tabangan kitang magdanay na mapakumbaba. Hurop-hurupon an gabos na halimbawa nin kapakumbabaan na mababasa sa saiyang Tataramon. Gikan sa buot na paglingkudan an mga tugang sa ano man na paaging magigibo mo.—Sal. 138:6; 1 Ped. 5:5.

18-19. Paano kita magigin maugma sa satong ministeryo dawa garo baga bakong interesado an mga tawo sa satong teritoryo?

¹⁸ Pinangluyahan ka na daw nin buot dahil bakong interesado sa maugmang bareta an mga tawo sa saindong teritoryo o kaya bihira mo sindang maabutan sa harong? Kun arog kaiyan, ano an magigibo ta tanganing mapagdanay o madagdagan an satong kaugmahan? May praktikal na mga suhestiyon sa kahon na “ Mga Paagi Para Magin Mas Mabunga an Saimong Ministeryo.” Mahalaga man na magkaigwa nin tamang pagmansay sa ministeryo. Ano an buot sabihon kaiyan?

¹⁹ Magdanay na nakapokus sa pagbalangibog kan pangaran nin Diyos asin kan Kahadian. Malinaw na sinabi ni Jesus na dikit sana an makakakua kan dalan pasiring sa buhay. (Mat. 7:13, 14) Sa ministeryo, pribilehiyo niyatong makipagtabangan ki Jehova, ki Jesus, asin sa mga anghel. (Mat. 28:19, 20; 1 Cor. 3:9; Kap. 14:6, 7) Irinarani  ni Jehova idtong mga tawong maninigo. (Juan 6:44) Kaya kun an sarong tawo dai magdangog sa satong mensahe ngunyan, tibaad magdangog na siya sa sunod na makaulay ta siya.

20. Tanganing malabanan an pangluluya nin buot, ano an manunudan ta sa Jeremias 20:8, 9?

²⁰ Dakul kitang manunudan ki propeta Jeremias. Iinasignar siya sa dipisilon na marhay na teritoryo. “Bilog na aldaw” siyang tinutuya asin kinakantiyawan kan mga tawo. (Basahon an Jeremias 20:8, 9.) * May pagkakataon na pinangluyahan siyang marhay nin buot kaya gusto na niyang magpundo sa paghuhulit. Pero dai niya ginibo iyan. Taano? An “tataramon ni Jehova” nagin garo kalayo sa laog ni Jeremias asin dai niya mapugulan iyan! Iyan man an namamati ta pag pinapano ta an satong isip asin puso kan Tataramon nin Diyos. Saro pang dahilan iyan para pag-adalan ta an Bibliya aroaldaw asin hurop-hurupon iyan. Bilang resulta, padagos na madadagdagan an satong kaugmahan asin mas dakul na tawo an tibaad magdangog sa maugmang bareta.—Jer. 15:16.

21. Ano man an dahilan kan satong pangluluya nin buot, paano ta mapapangganahan iyan?

²¹ “An pangluluya nin buot puwedeng magin mapuwersang armas ni Satanas,” an sabi ni Deborah, na sinambit kasubago. Pero mayo lamang sa Diyos na Jehova an mga armas ni Satanas. Kaya ano man an dahilan kan satong pangluluya nin buot, makimahirak ki Jehova para sa tabang. Tatabangan ka niyang maatubang an saimong pagkabakong perpekto asin mga kaluyahan. Tatabangan ka niya pag may hilang ka. Tatabangan ka niyang mapagdanay an balanseng pagmansay sa mga pribilehiyo sa paglilingkod. Asin tatabangan ka niyang magin positibo sa saimong ministeryo. Dugang pa, mamibi sa saimong mamumuton na ama sa langit asin sabihon saiya an mga ikinakahadit mo. Sa tabang niya, mapapangganahan mo an pangluluya nin buot.