ICIPANDE CA KUSAMBILILAMO 52
Ifyo Mwingacita Pa Kuti Tamutwalilile Ukuba Abafuupuka
“Poosa icisendo cobe pali Yehova, na o akakukosha.”—AMALU. 55:22.
ULWIMBO 33 Pooseni Icisendo Cenu Pali Yehova
IFYO TWALASAMBILILA *
1. Finshi nalimo fingacitika nga twafuupuka?
CILA bushiku tulaba na mafya kabili tulesha apo twingapesha ukuyashipikisha. Lelo taca-anguka ukushipikisha amafya nga ca kuti natufuupuka. Kanshi tufwile ukulaibukisha ukuti ukufuupuka kuti kwalenga twalamona kwati tatwacindama, kabili kuti kwalenga twaleka ukuba ne nsansa. Baibolo pa Amapinda 24:10 itila: “Bushe ulanenuka mu bushiku bwa macushi? Awe ninshi amaka yobe yanono.” Kanshi nga natufuupuka, nalimo kuti twaba abanaka ica kuti twafilwa no kukwata amaka ya kushipikisha amafya.
2. Finshi fimo ifingalenga twafuupuka, kabili finshi twalasambilila muli cino cipande?
2 Kwaliba ifintu ifingi ifingalenga twafuupulwa. Inshita shimo kuti twaifuupula fye fwe bene, e lyo inshita shimbi abantu kuti bacita ifingalenga twafuupulwa. Pa fintu ifingatufuupula paba ukukanapwililika, ifyo tushicita bwino e lyo no kulwala. Na kabili kuti twafuupuka nga tabatupeele umulimo uo twalefwaisha mu cilonganino ca kwa Yehova, nelyo nga tushimikila mu cifulo umo abantu abengi bashifwaya ukukutika imbila nsuma. Muli cino cipande twalasambilila pali fimo ifyo twingacita ifingatwafwa ukukanatwalilila ukufuupuka.
UKUKANAPWILILIKA NO KULUFYANYA
3. Finshi fingatwafwa ukuleka ukulamona kwati tatwacindama no kuleka ukumfwa sana ububi nga twalufyanya?
3 Calyanguka ukutendeka ukulaimona kwati tatwacindama e lyo no kulaumfwa ububi pa fyo tulufyanya. Nalimo ici kuti calenga twalatontonkanya ukuti Yehova te kuti atusuminishe ukwingila mu calo cipya pa mulandu wa kuti tulalufyanya. Ukutontonkanya kwa musango uyu kwalibipa icine cine. Nomba bushe tufwile ukulaumfwa shani nga twalufyanya? Baibolo itila abantu bonse “babembu” ukufumishako fye Yesu Kristu. (Rom. 3:23) Nomba umwine wa Baibolo tafwailisha ifilubo nelyo ukutwenekela ukuba abapwililika. Lelo ni Shifwe uwatutemwa uufwaya ukutwafwa. Kabili alitekanya. Alishiba ukuti fwe bengi cilatukosela ukucita icalungama no kukanalaumfwa ububi pa fyo tulufyanya, kabili ali-iteyanya ukutwafwa.—Rom. 7:18, 19.
Yehova alebukisha ifisuma ifyo twalecita kale kabili alamona ne fisuma ifyo tucita pali ino nshita (Moneni paragrafu 5) *
4-5. Finshi fyaba pe lembo lya 1 Yohane 3:19, 20 ifya-afwile bankashi babili ukukanatwalilila ukuba abafuupuka?
4 Lekeni tulande pa fyo cali kuli ba Deborah na ba Maria. * Ilyo ba Deborah bali abaice, ilingi line aba mu lupwa tabalebalanga ukutemwa kabili ici calelenga baleumfwa ububi. Ilingi tabalebatasha. Kanshi ilyo bakulile balemona kwati bacabecabe. Nga balufyanya mu tuntu utunono, balemona kwati te kuti bacitepo icisuma. Ifi fine e fyo cali na kuli ba Maria. Balupwa lwabo balebacusha. Ici calengele balemona kwati bacabecabe. Na lintu basambilile icine balemona kwati tabalingile ukulaitwa ukuti Inte ya kwa Yehova!
5 Na lyo line aba bankashi babili tabalekele ukubombela Yehova. Cinshi calengele? Cimo icalengele ni co balepoosa ifisendo fyabo pali Yehova, e kutila balitwalilile ukupepa kuli Yehova no kumweba ifyo baleumfwa. (Amalu. 55:22) Balisambilile ukuti Shifwe wa ku muulu uwatutemwa alishiba ifyo tumfwa pa fyabipa ifitucitikila. Lelo alamona imibele iisuma iyo twakwata nangu ca kuti nalimo fwe bene kuti twalamona kwati tapali ifyo twaba.—Belengeni 1 Yohane 3:19, 20.
6. Finshi nalimo umuntu engalaumfwa nga abwekeshapo ukucita icilubo ico acitile kale?
6 Limo umuntu kuti aesha na maka ukuleka ukucita ifyabipa, lelo inshita shimo kuti abwekeshapo ukucita ifyo fine kabili kuti afuupuka. Ca cine ukuti tulomfwa ububi nga twacita ulubembu. (2 Kor. 7:10) Na lyo line tatulingile ukucilamo ukumfwa ububi ica kuti twalatontonkanya no kuti: ‘Ndi wacabecabe. Yehova te kuti anjelele.’ Ifi te fyo Baibolo ilanda, kabili ukutontonkanya kwa musango uyu kuti kwalenga twaleka ukubombela Yehova. Ibukisheni ifyo Amapinda 24:10 yalanda. Yatila amaka yesu yalaba ayanono nga twafuupuka. Kanshi tufwile ‘ukulanshanya’ na Yehova mwi pepo no kumulomba ukuti atubelele uluse. (Esa. 1:18) Yehova nga amona ukuti namulapila icine cine akamubelela uluse. Na kabili mufwile ukweba baeluda ukuti bamwafwe. Bakamutekanishisha no kumwafwa ukwishiba ifyo mwingacita pa kuti mube abakosa mu fya kwa Lesa na kabili.—Yako. 5:14, 15.
7. Cinshi tushilingile ukulamwena kwati tuli bacabecabe nga ca kuti tule-esha na maka ukuleka ukucita ifyabipa?
7 Ba Jean-Luc, ba eluda aba ku France, balilandile amashiwi ayengakoselesha abesha na maka ukuleka ukucita ifyabipa. Batile: “Abo Yehova amona ukuti balungami te balya abashilufyanya, lelo ni balya abomfwa ububi nga balufyanya, kabili abesha na maka ukukanabwekeshapo ifyabipa ifyo bacitile.” (Rom. 7:21-25) Kanshi nga mule-esha na maka ukuleka ukucita ifyabipa, mwilamona kwati muli bacabecabe. Muleibukisha ukutila takuli uwingaba uwalungama kuli Yehova. Lelo bonse tulakabila icilubula ico Yehova Lesa wesu atupeela pa mulandu wa cikuuku cakwe ica bupe fye.—Efes. 1:7; 1 Yoh. 4:10.
8. Ni bani twingeba ukuti batukoseleshe nga twafuupuka?
8 Kuti twaeba bamunyinefwe na bankashi ababa lupwa lwesu ulwa ku mupashi ukuti batukoseleshe! Kuti bakutika ilyo tulebalondolwela ifyo tuleumfwa kabili kuti batwebako na mashiwi ayengatukoselesha. (Amapi. 12:25; 1 Tes. 5:14) Nkashi Joy uwa ku Nigeria uwafuupwikepo inshita imo atile: “Akubula aba bwananyina nga nshashipikishe. Ifi bamunyinefwe na bankashi bangafwa filanga fye ukuti Yehova alasuka amapepo yandi. Kabili ifi aba bwananyina bangafwa fyalilenga nasambililako ifya kukoselesha abantu bambi nga bali no bulanda.” Tufwile ukulaibukisha ukuti te lyonse bamunyinefwe na bankashi bengeshiba ukutila tulefwaya ukutukoselesha. Kanshi kuti cawama nga twaebako Umwina Kristu munensu umukalamba mu fya kwa Lesa ukuti atwafwe.
NGA NATULWALA
9. Bushe ifyaba pa Amalumbo 41:3 na 94:19 fitukoselesha shani?
9 Tufwile ukweba Yehova ukuti atwafwe. Nga tatuleumfwa bwino, maka maka nga twalilwala pa nshita iitali, kuti catukosela ukulatontonkanya pa fisuma. Nangu ca kuti Yehova tatuposha mu cipesha amano, alatusansamusha kabili kuti atupeela amaka ya kushipikisha. (Belengeni Amalumbo 41:3; 94:19.) Ku ca kumwenako nalimo kuti alenga Abena Kristu banensu batwafwako imilimo ya pa ng’anda nelyo ukuyatushitilako fimo. Kabili kuti alenga aba bwananyina batupepelako. Nelyo nalimo kuti alenga twaibukisha amashiwi ayengatusansamusha ayaba mu Cebo cakwe, pamo nga ifyo atulaya ukuti tatwakalelwala no kucula mu calo cipya.—Rom. 15:4.
10. Cinshi calengele ba Isang betwalilila ukuba no bulanda pa numa ya kuba mu busanso?
10 Ba Isang aba ku Nigeria bali mu busanso ubwalengele ifilundwa fyabo ifingi ifya mubili fyaleka ukubomba. Dokota wabo abebele ukuti tabakabale abendapo na kabili. Batile: “Nali sana no bulanda kabili nalisakamikwe nga nshi.” Nomba bushe balitwalilile ukuba no bulanda? Awe! Cinshi cabafwile? Balandile ukuti: “Ine no mwina mwandi tatwalekele ukupepa kuli Yehova no kuisambilisha Icebo cakwe. Na kabili twalebika sana amano ku fisuma ifyo Lesa atupeela pamo nge subilo lya kuti tukaba no bumi ubusuma mu calo cipya.”
Na balwalilila kuti basanga inshila ishisuma isha kubililamo imbila nsuma kabili kuti balaba ne nsansa (Moneni paragrafu 11 ukushinta ku 13)
11. Finshi fyalengele ba Cindy baleba ne nsansa ilyo balwele?
11 Ba Cindy abekala ku Mexico balibasangile no bulwele ubwabipisha. Cinshi cabafwile ukushipikisha? Ilyo balebondapa, balipangile ukuti cila bushiku balebilako imbila nsuma. Batile: “Ukucita ifi kwalengele ndebika amano ku bantu ukucila ukubika sana amano ku kundepula, ku fyo naleumfwa ubukali, nelyo ku fyo nalwele. Ifyo nalecita ni ifi: Nga natendeka ukulanda na badokota nelyo banasi, nalebepusha ifyo indupwa shabo shili. Lyena nalebepusha ico basalila ukulabomba iyi incito iyakosa. Pa numa ya kwipusha ifi, calenyangukila ukwishiba ilyashi ilyo ningalanshanyapo nabo. Abengi balelanda ukuti tacasekele umulwele ukubepusha ifyo bena bali ne ndupwa shabo. Kabili abengi balentasha pa fyo nalebabikako amano. Bamo balenanga fye napo baleikala nelyo ukumpeela inambala yabo iya foni. Kanshi nangu ca kuti iyi nshita yali iya-afya nga nshi, Yehova alensansamusha ukucila na pa fyo nale-enekela!”—Amapi. 15:15.
12-13. Bushe aba bwananyina abalwala nangu abalwalilila bacita shani pa kuti balebombako umulimo wa kubila imbila nsuma, kabili finshi fifumamo?
12 Umuntu nga nalwala nelyo nga alalwalilila, nalimo kuti afuupuka pa mulandu wa kutila te kuti alebombesha mu mulimo wa kubila imbila nsuma nge fyo alebomba kale. Na lyo line, abengi balisanga inshila ishisuma isha kubililamo imbila nsuma. Nkashi Laurel uwa ku America balimubikile muli cimashini icalemwafwa ukupeema pa myaka 37! Uyu nkashi aleshipikisha ubulwele bwa kansa, balimulepwile imiku iingi, kabili alilwele amalwele na yambi aya pa nkanda. Nangu ca kuti alilwele aya amalwele ayabipisha, talekele ukubila imbila nsuma. Ba Laurel baleshimikila kuli banasi na ku baleya ku ng’anda ku mwabo mu kubasakamana. Finshi fyafuminemo? Balyafwile abantu nalimo 17 ukusambilila Baibolo! *
13 Ba Richard ba eluda aba ku France, balilandile ifingafwa aba bwananyina abalwala abashifuma pa ng’anda nelyo abekala mu fikuulwa fya kusakamaninamo abalwele. Batile: “Kuti cawama nga nabakwata apa kubika impapulo pa kuti abaleisa mu kubapempula baleshimona. Abantu nga bamona ishi impapulo kuti bafwaya ukwishibilapo na fimbi kabili ici kuti calenga batendeka ukulanshanya. Ukucita ifi kuti kwakoselesha sana bamunyinefwe na bankashi abashingaya ku ng’anda ne ng’anda mu kubila imbila nsuma.” Aba bwananyina abashifuma pa mayanda pa mulandu wa kuti balilwala, kuti babombako umulimo wa kubila imbila nsuma ukubomfya amakalata na mafoni.
NGA CA KUTI TABATUPEELE UMULIMO UO TWALEFWAYA
14. Finshi ifisuma ifyo Davidi acitile ifyo tulingile ukupashanya?
14 Nalimo kuti bakana ukutupeela imilimo imo mu cilonganino ca kwa Lesa pa mulandu wa kuti natukula, pa mulandu no bulwele twalwala, nelyo pa mulandu wa fintu fye fimbi. Nga ca kuti ifi e fyo caba, kuti twasambililako ku ca kumwenako ca Mfumu Davidi. Ilyo Davidi bamwebele ukuti te wali no kubomba umulimo alefwaisha uwa kukuula itempele lya kwa Lesa, alitungilile uo Lesa asalile ukubomba uyu mulimo. Alisangwilileko ne fyalefwaikwa kuli uyu mulimo. Ifyo Davidi acitile fyaliweme sana kabili tulingile ukulamupashanya!—2 Sam. 7:12, 13; 1 Imila. 29:1, 3-5.
15. Bushe munyinefwe Hugues acitile shani pa kuti aleke ukumfwa ububi?
15 Pa mulandu no bulwele ubo munyinefwe Hugues uwa ku France alwele, alilekele ukubomba bueluda, kabili alefilwa fye no kubomba imilimo iinono iya pa ng’anda. Alembele ukuti: “Pa kubala nalemona kwati nshacindama kabili nalifuupwike nga nshi. Lelo mu kupita kwa nshita, nalimwene ukuti nalingile ukuleka ukumfwa ububi pa fintu ifyo nalefilwa ukucita. Lyena naleba ne nsansa pa milimo iyo nalekumanisha ukubomba mu mulimo wa kwa Yehova. Nshifwaya ukunenuka. Nga filya Gideone na baume 300 abo ali nabo bacitile nangu ca kuti balinakile, nkatwalilila ukushipikisha!”—Abapi. 8:4.
16. Finshi twingasambilila ku fyo bamalaika bacitile?
16 Kuti twasambililako na fimbi kuli bamalaika aba cishinka. Mu nshita lintu Imfumu Ahabu yaleteka, Yehova aebele bamalaika ukuti balande inshila iyo balemona ukuti e yali no kubomba bwino pa kubeepa Imfumu Ahabu iyali iyabipa. Bamalaika bamo balilandile inshila ishalekanalekana isho balemona ukuti e shingabomba. Lelo Yehova asalilepo fye inshila iyo malaika umo alandile. (1 Isha. 22:19-22) Bushe bamalaika bambi aba cishinka balifuupwike, nelyo ukulatontonkanya ukuti, ‘Kanshi naci-icusha fye ukulandapo?’ Awe tabafuupwike. Bamalaika bali-icefya icine cine, kabili bafwaya umucinshi onse uleya kuli Yehova.—Abapi. 13:16-18; Ukus. 19:10.
17. Finshi tufwile ukucita nga ca kuti tuleumfwa ububi pa mulandu wa kuti tabatupeelako imilimo imo mu cilonganino ca kwa Yehova?
17 Muleibukisha ukuti icacindama sana kuba Inte ya kwa Yehova no kulabila pa Bufumu bwakwe. Inshita shimo kuti batupeela imilimo mu cilonganino ca kwa Yehova e lyo inshita shimbi kuti batupoka imilimo tubomba. Nomba ici te cilenga tube abacindama kuli Lesa. Nga tuli abafuuka kabili abaicefya, e lyo Yehova na ba bwananyina bengatutemwa. Kanshi mulelomba Yehova ukuti alemwafwa ukutwalilila ukuba abafuuka kabili abaicefya. Muletontonkanya pa babomfi ba kwa Yehova abengi abalembwa mu Baibolo abali abafuuka kabili abaicefya abo tulingile ukulapashanya. Muleitemenwa ukubombela aba bwananyina ukufika apo mwingapesha.—Amalu. 138:6; 1 Pet. 5:5.
NGA CA KUTI ABANTU TABAFWAYA UKUKUTIKA IMBILA NSUMA MU CIFULO MUBOMBELA
18-19. Finshi fingamwafwa ukutwalilila ukulasekelela ilyo mulebila imbila nsuma nangu ca kuti abantu mu cifulo mushikilamo tabafwaya ukukutika?
18 Bushe inshita shimo mulafuupuka pa mulandu wa kuti abantu mu cifulo mubilamo imbila nsuma tabafwaya ukukutika, nelyo pa mulandu wa kuti abantu fye abanono e basangwa pa mayanda? Ifi nga e fyo caba, finshi mwingacita pa kuti mutwalilile ukuba ne nsansa nelyo ukulabelako ne nsansa ilyo mulebila imbila nsuma? Fimo ifyo mwingacita fili mu kabokoshi akaleti “ Ifyo Mwingacita pa Kuti Mulebombesha mu Mulimo wa Kubila Imbila Nsuma.” Calicindama ukwishiba ico tubilila imbila nsuma. Cinshi tubilila imbila nsuma?
19 Muleibukisha ukuti icikalamba icilenga tulebila imbila nsuma kulenga abantu baishiba ishina lya kwa Lesa no Bufumu bwakwe. Yesu alilandile ukwabula ukupita na mu mbali ukuti abantu fye abanono e bakasanga inshila ya ku bumi. (Mat. 7:13, 14) Ilyo tulebila imbila nsuma tulakwata ishuko lya kubombela pamo na Yehova, Yesu e lyo na bamalaika. (Mat. 28:19, 20; 1 Kor. 3:9; Ukus. 14:6, 7) Yehova akula abantu abafwaya ukumubombela. (Yoh. 6:44) Kanshi umuntu nga talefwaya ukukutika imbila nsuma pali ino nshita, nalimo inshita imbi kuti aisakutika.
20. Bushe ilembo lya kwa Yeremia 20:8, 9 kuti lyatwafwa shani pa kuti tatufuupwike?
20 Kuti twasambililako ifingi kuli kasesema Yeremia. Abantu mu cifulo alebilamo imbila nsuma tabalekutika. Balemutuka no kumuseka “akasuba konse.” (Belengeni Yeremia 20:8, 9.) Inshita imo alifuupwike sana ica kuti alefwaya no kuleka ukubomba umulimo uo Lesa amupeele. Lelo talekele. Cinshi calengele? Yeremia atile “icebo ca kwa Yehova” cali kwati mulilo mu mutima wakwe kabili alifililwe ukucisunga! Ifi fine e fyo na ifwe twingomfwa nga ca kuti tuleisambilisha Icebo ca kwa Lesa lyonse no kulatontonkanyapo sana. Ukucita ifi kukalenga tukalebelako ne nsansa ilyo tulebila imbila nsuma kabili abantu abengi bakalakutika.—Yer. 15:16.
21. Kuti twacita shani pa kuti twitwalilila ukuba abafuupuka?
21 Ba Deborah abo tulandilepo batile: “Ukufuupuka canso icikali ico Satana abomfya.” Lelo Yehova Lesa alikwata amaka ukucila Satana ne fyanso fyakwe. Kanshi te mulandu ne cilengele mufuupuke, mufwile ukupepa kuli Yehova ukuti amwafwe. Nangu ca kuti tamwapwililika kabili mulalufyanya, Yehova akulamwafwa. Akalamwafwa ilyo mulwele. Akalamwafwa ukukanafuupuka nga tabamupeele imilimo nelyo nga bamupoka umulimo mubomba mu cilonganino cakwe. Kabili akulamwafwa ukulatontonkanya pa co tubilila imbila nsuma. Mulepepa kuli Shinwe uwamutemwa no kumweba mu kulungatika ifyo muleumfwa. Yehova nga amwafwa, kuti mwaleka ukufuupuka.
ULWIMBO 41 Umfweni Ipepo Lyandi
^ para. 5 Bonse fye inshita shimo tulafuupuka. Muli cino cipande twalalanda pali fimo ifyo twingacita nga twafuupuka. Kabili twalamona ne fyo Yehova engatwafwa pa kuti tatutwalilile ukufuupuka.
^ para. 4 Amashina yamo nabayalula.
^ para. 12 Kuti mwabelenga ilyashi lya ba Laurel Nisbet muli Loleni! ya ciNgeleshi iya January 22, 1993.
^ para. 69 UBULONDOLOSHI BWA CIKOPE: Nkashi alifuupwike pa nshita imo, lelo aletontonkanya pa fisuma ifyo alebomba mu mulimo wa kwa Yehova kabili alepepa. Taletwishika ukuti Yehova alebukisha ifyo alebomba kale kabili alamona ne fyo abomba pali ino nshita.
