1. Aha ma na masa anggo maretek ini uhur hita?

SAI adong do parsoalan ibagas goluhta. Anjaha marusaha do hita pasaloseihon ai. Tapi, anggo maretek ni uhur hita sanggah dong sitarononta, ra do mintor mandolei hita. Dingat ma anggo maretek ni uhur hita, gabe iahap hita ma soya-soya ganupan anjaha lang be martuah pangahapta. Podah 24:10 mangkatahon, “Anggo seng tahan ho bani panorang hasosakan, ai ma tandani na hurang do gogohmu.” Jadi anggo maretek ni uhur hita, gabe galek ma hita anjaha iahap hita ma lang tarsaloseihon be parsoalanta.

2. Aha ma na boi mambahen hita maretek ni uhur, janah aha ma na laho iulas hita bani artikel on?

² Bahat do na boi mambahen hita maretek ni uhur. Umpamani dong na maretek ni uhur halani mardingat hasalahan na ongga ibahen ia hinan, halani hagalekonni, atap halani borit-boritan ia. Na leganni maretek ni uhur halani lang mandapot tanggung jawab na iharosuhkon ia i kuria. Dong homa na maretek ni uhur halani lang dong halak na ra manangar sanggah ia marbarita. Bani artikel on iulas hita ma aha do na porlu ibahen hita sanggah maretek ni uhur.

3. Aha ma na boi mangurupi hita sanggah lalab idingat hita hasalahanta?

³ Halani ongga hita mambahen hasalahan, ra do iahap hita lang marguna be hita. Gabe iahap hita ma lang ra Jahowa mambere hagoluhan na sadokah ni dokahni hubanta. Tapi lang dear anggo sonai pingkiranta. Aha ma na boi mangurupi hita? Dingat ma, Bibel mangkatahon haganup do halak “mardousa”. (Rom 3:23) Hassi pe sonai, sedo hasalahanta na lalab itonggor Jahowa. Ibotoh Ia jolma na lang gokan dear do hita. Halani ai sabar do Ia hubanta. Ibotoh Ia do homa sasintongni domma marusaha hita mangkorjahon  na madear. Halani ai, sihol do uhur-Ni mangurupi hita.​—Rom 7:18, 19.

4-5. Aha do na ihatahon bani 1 Johannes 3:19, 20, na mangurupi dua botounta sanggah maretek ni uhur?

⁴ Pardiateihon ma pangalaman ni si Deborah pakon si Maria. * Humbani dakdanak si Deborah, lang ihargai kaluargani ia, janah jarang do homa ia ipuji. Halani ai dobkonsi magodang, iahap ia ma lang maharga dirini. Anggo ibahen ia hasalahan, age pe hasalahan na etek, iahap ia ma domma banggal tumang hasalahanni. Ai do homa na iahapkon si Maria. Gati do ia iapasi kaluargani. Halani ai iahap ia ma lang marguna dirini. Dobkonsi ididi pe ia, tong do iahap ia lang talup ia gabe Saksi Jahowa!

⁵ Hassi pe sonai, totap do sidea setia mangidangi Jahowa. Mase? Halani iompaskon sidea do ganup holsoh ni uhurni hubani Jahowa marhitei tonggo. (Ps. 55:23) Gabe ibotoh sidea ma Bapa na parholong do Jahowa ai. Iarusi Ia do aha na mambahen hita maretek ni uhur. Anjaha ibotoh Ia do paruhuranta na madear hassi pe iahap hita lang dong na marguna na ibahen hita.​—Basa 1 Johannes 3:19, 20.

6. Sonaha do ra pangahap ni sasada halak na mangulaki hasalahanni?

⁶ Dong do halak na mangulaki hasalahanni, hape domma marusaha ia ase ulang sonai. Ujungni, gabe maretek ni uhur ma ia. Tongon, dear do anggo manosal hita halani mambahen hasalahan. (2 Kor. 7:10) Tapi anggo lalab hita manolsoli diri, gabe sonon ma ninuhurta, ‘Lang ra Jahowa manasap hasalahanku.’ Tapi lang ai na iajarhon Bibel. Anggo lalab sonai pingkiranta, ujungni gabe soh ma hita mangidangi Jahowa. Dingat ma aha na ihatahon bani Podah 24:10​—anggo lalab hita maretek ni uhur, gabe hurang ma gogohta. Jadi pasaloseihon hita ma parsoalanta pakon Jahowa. Martonggo ma ase maidop uhur-Ni hubanta. (Jes. 1:18) Anggo tongon-tongon hita mambahen hamubahon, isasap Jahowa do hasalahanta ai. Leganni ai, pindo ma pangurupion ni sintua. Holi iurupi sidea do ham laho paorotkon parhasomananmu pakon Jahowa.​—Jak. 5:14, 15.

7. Mase lang pala maretek ni uhur hita porini iahap hita lang urah mangkorjahon na sintong?

⁷ Si Jean-Luc, sada sintua i Prancis mangkatahon hubani halak na mangahap dirini lang marguna, “Halak na pintor i lobei ni Jahowa ai ma halak na ra mambahen hamubahon, sedo halak na lang  ongga mambahen hasalahan.” (Rom 7:21-25) Jadi ulang ma ham lalab manguhumi diri halani hahuranganmu. Dingat ma jolma na mardousa do ganup hita. Hassi pe sonai, ipatuduh Jahowa do idop ni uhur-Ni marhitei tobusan.​—Ep. 1:7; 1 Joh. 4:10.

8. Ise ma na boi mangurupi hita sanggah maretek ni uhur hita?

⁸ Sanina botou i kuria boi mangurupi hita! Ra do sidea manangar saritanta janah ibere sidea do homa hata apoh-apoh na mambahen hinsah uhurta. (Pod. 12:25; 1 Tes. 5:14) Dong sada botou hun Nigeria na margoran si Joy, gati ia maretek ni uhur. Nini do, “Anggo lang dong sanina botou, lang boi martahan ahu. Humbani sidea do homa hubotoh sonaha carani mangapoh hasoman na maretek ni uhur.” Porlu do homa idingat hita, sanggah maretek ni uhur hita, ra do lang ibotoh hasoman i kuria ai. Halani ai, saritahon ma sonaha pangahapmu bani sidea, ase ibotoh sidea sonaha mangurupi ham.

9. Sonaha Psalmen 41:4 pakon 94:19 patoguhkon uhurta?

⁹ Jahowa boi mangurupi hita. Somalni gati do hita maretek ni uhur sanggah borit-boritan. Hassi pe lang ipamalum Jahowa hita sonari on marhitei halongangan, tapi ibere do hubanta hata apoh-apoh. Ipargogohi do homa hita ase boi totap martahan. (Basa Psalmen 41:4; 94:19.) Ra do igunahon Ia sanina botou laho mangurupi hita. Umpamani, iurupi do hita marbalanja atap pe mamborsihkon rumah. Itonggohon sidea do homa hita. Leganni ai, ra do iurupi Jahowa hita ase mardingat ayat-ayat na patugahkon pasal pangarapan i dunia na baru. Ijai lang adong be na boritan.​—Rom 15:4.

10. Aha ma na mangurupi si Isak ase lang lalab maretek ni uhur?

¹⁰ Si Isak na tading i Nigeria gabe lumpuh halani kecelakaan. Dokterni mangkatahon lang boi be ia mardalan. Nini si Isak ma, “Gabe galek do ahu janah gabe maropuk ma uhurhu.” Tapi totap do ia sonai? Lang! Aha ma na mangurupisi? Ia mangkatahon, “Tongtong do ahu pakon istringku martonggo hubani Jahowa. Anjaha iparlajari hanami do homa Bibel.” Nini use, “Martarima kasih do hanami bai ganup pasu-pasu na iahapkon hanami, tarmasuk ma ai pangarapan bani ari simagira.”

11. Aha ma na mangurupi si Cindy ase totap marmalas ni uhur hassi pe parah naboritni?

¹¹ Si Cindy na tading i Meksiko hona naborit na parah tumang. Tapi aha do na boi mangurupi ia totap martahan? Sanggah i rumah sakit, marusaha do ia ase marbarita bai ganup ari. Ibagas suratni ihatahon ia do, “Halani hubahen sonai gabe lang sai hudingat be sonaha boritni huahap tarlobih dobkonsi operasi. Sanggah marbuali ahu pakon dokter atap perawat, husungkun ma pasal kaluarga ni sidea. Dob ai, husungkun homa mase ipilih sidea gabe dokter atap perawat. Ujungni, gabe hubotoh ma topik na ija do na iharosuhkon sidea. Dong piga-piga na mangkatahon jarang do adong pasien na parduli bani sidea. Halani ai, martarima kasih do sidea hubangku. Dong homa na ra mambere nomor taleponni. Lang husangka iurupi Jahowa do ahu ase totap marmalas ni uhur ibagas sitarononku.”​—Pod. 15:15.

12-13. Sonaha halak na boritan boi totap marbarita, janah aha ma hasilni?

¹² Dong do halak na boritan gabe maretek ni uhur halani lang bahat na boi ibahen ia ibagas pangidangion. Hassi pe sonai marusaha  do sidea ase boi totap marbarita. Umpamani dong sada botou na margoran si Laurel na tading i Amerika Serikat. Halani naboritni, maningon ibahen ma ia hubagas mesin na mangurupisi ase boi totap marhosah. Sadokah 37 ma ia ibagas mesin ai! Leganni ai, hona kanker do homa ia, ongga ioperasi, anjaha dong homa masalah kulitni. Hassi pe parah tumang sitarononni, lang ongga ia soh marbarita. Marbarita do ia hubani perawatni ampa bani ganup halak na roh hu rumahni. Hasilni, dong hira-hira 17 halak na iurupi ia gabe Saksi Jahowa! *

¹³ Pardiateihon ma na ihatahon si Richard, sada sintua hun Prancis, hubani halak na lang boi kaluar halani naboritni. Nini do, “Huojur do sidea ase mambahen buku atap majallahta i rak atap meja ase boi ididah halak. Jadi anggo adong halak na montas, ididah sidea ma buku ai janah roh ma sidea manungkun pasal ai. Ujungni, gabe boi ma sanina botounta marbuali pakon sidea. Halani ai lang be maretek ni uhur sidea hassi pe lang boi kaluar rumah laho marbarita.” Sobali ai, dong ope cara na boi ibahen sidea laho marbarita. Umpamani, manulis surat atap martalepon.

14. Siusihan aha do na ibahen Raja Daud hubanta?

¹⁴ Halani domma matua hita, hurang sehat, atap halani alasan na legan, ra do lang ibere hubanta tugas ibagas pangidangion. Hape sihol uhurta mangkorjahon ai. Anggo sonai situasinta, pardiateihon ma pangalaman ni Raja Daud. Sihol tumang do uhurni pajongjongkon rumah bani Naibata. Tapi sedo ia na ipilih laho mangkorjahon ai. Hassi pe sonai, iurupi si Daud do halak na ipilih laho mandalankon tugas ai. Anjaha ibere ia do homa bahat sumbangan bani horja ai. Siusihan na jenges tumang do ai hubanta!​—2 Sam. 7:12, 13; 1 Kron. 29:1, 3-5.

15. Aha ma na ibahen si Heri ase ulang lalab maretek ni uhur?

¹⁵ Pardiateihon ma pangalaman ni saninanta hun Prancis na margoran si Heri. Halani boritan ia, lang be ia mangidangi gabe sintua. Anjaha aha pe lang boi tarhorjahon ia i rumah. Ia manulis, “Mulani, pusok tumang do uhurhu, anjaha huahap ma lang marguna be ahu. Tapi, husadari ma lang boi lalab sonai pangahapku. Jadi marusaha ma ahu mambahen na sidearan ibagas pangidangion. Halani ai gabe malas tumang ma uhurhu. Sihol do ahu maniru si Gideon pakon tolu ratus hasomanni.  Hassi pe loja sidea, tapi totap do sidea marporang!”​—Panguh. 8:4.

16. Aha ma na boi iparlajari hita humbani malekat-malekat?

¹⁶ Gabe siusihan na madear do homa malekat-malekat. Bani pamarentahan ni Raja Ahab, isungkun Jahowa ma bani ganup malekat sonaha carani mangoto-otoi si Ahab. Ibere sidea ma pandapotni bei. Tapi pitah sada dassa na ijalo Jahowa. Janah ihatahon Ia ma marhasil do na ibahen malekat ai. (1 Raj. 22:19-22) Ai dong do malekat na maretek ni uhur halani lang ijalo pandapotni? Tontu lang! Ibotoh hita toruh maruhur do ganup malekat ai. Anjaha sihol do sidea ase pitah Jahowa dassa na ipasangap.​—Panguh. 13:16-18; Pangk. 19:10.

17. Aha ma na porlu ibahen hita anggo maretek ni uhur hita halani lang ibere banta tanggung jawab ibagas organisasi?

¹⁷ Dingat ma tugasta na sipontingan ai ma boi hita gabe Saksi Jahowa janah mambaritahon pasal Harajaon-Ni. Sai dong do parubahan tugas ibagas organisasi. Tapi sedo ai na mambahen hita maharga i lobei ni Jahowa. Anggo totap hita martoruh ni uhur, ai do na mambahen Jahowa ampa sanina botou marosuh hubanta. Halani ai, pindo ma bani Jahowa ase iurupi ham totap martoruh ni uhur. Rimangi ma homa contoh-contoh bani Bibel pasal juakjuak ni Naibata na totap martoruh ni uhur. Anjaha marusaha ma mambahen na sidearan hubani sanina botou.​—Ps. 138:6, Terjemahan Dunia Baru; 1 Ptr. 5:5.

18-19. Aha do na boi ibahen hita ase totap marmalas ni uhur hassi pe lang adong halak na ra manangar baritanta?

¹⁸ Sanggah marbarita, ongga do ham maretek ni uhur halani lang bahat halak na ra manangihon hita, atap halani pitah otik dassa halak i rumah? Anggo sonai, aha ma na boi mangurupi hita ase totap marmalas ni uhur? Pardiateihon ma ojur-ojur na dong bani kotak “ Carani ase Totap Marmalas ni Uhur ibagas Pangidangion”. Leganni ai, ponting do irimangi hita mase ra hita marbarita.

¹⁹ Dingat ma alasan na sipontingan hita marbarita ai ma laho mambaritahon pasal goran ni Naibata ampa Harajaon-Ni. Sasintongni, domma dokah ipatugah Jesus pitah otik dassa halak na ra gabe susianni. (Mat. 7:13, 14) Dingat ma, sanggah hita marbarita rap marhorja do hita pakon  Jahowa, Jesus, ampa malekat. (Mat. 28:19, 20; 1 Kor. 3:9; Pangk. 14:6, 7) Leganni ai, Jahowa do na manarik halak hubagas organisasi-Ni. (Joh. 6:44) Jadi, anggo lang dong halak na ra manangar baritanta, ulang ma maretek ni uhur. Ra i pudian ni ari dong do sidea na ra manjalo baritanta.

20. Domu bani Jeremia 20:8, 9, aha do na boi mangurupi hita ase ulang lalab maretek ni uhur?

²⁰ Boi do homa hita marlajar humbani nabi Jeremia. Ijia, bahat do homa halak na lang ra manangar baritani. Bai ganup ari irisai halak do ia. (Basa Jeremia 20:8, 9.) Halani ai gabe maretek ni uhur ma ia, anjaha ninuhurni lang ra be ia marbarita. Tapi lang saud ibahen ia sonai. Mase? Halani “hata ni Naibata” ai usih do songon apuy na gajag ibagas uhurni. Jadi lang tolap ia manahan ai. Hita pe, anggo iparlajari hita Bibel janah irimangi hita isini bai ganup ari, boi ma hita songon si Jeremia. Lambin marmalas ni uhur ma hita ibagas pangidangion, anjaha ujungni ra do gabe pajumpah hita pakon halak na ra manangihon baritanta.​—Jer. 15:16.

21. Sonaha hita boi totap martahan hassi pe dong na mambahen hita maretek ni uhur?

²¹ Si Deborah na ipatugah nongkan ai mangkatahon, “Sanggah hita maretek ni uhur, ai do sinjata na igunahon Sibolis laho mambahen hita gabe mandolei.” Tapi gogohan do Jahowa marimbangkon Sibolis. Halani ai, sanggah maretek ni uhur ham, pindo ma pangurupion humbani Jahowa. Iurupi Ia do holi ham ase totap toguh hassi pe dong hahuranganmu. Ipargogohi do ham sanggah boritan. Iurupi Ia do ham ase totap marmalas ni uhur hassi pe lang mandapot tanggung jawab na iharosuhkon ham. Anjaha iurupi Ia do ham ase totap ringgas marbarita. Halani ai, ompaskon ma ganup holsoh ni uhurmu hubani Jahowa, Bapa na parholong in. Pos ma uhurmu sai urupan-Ni do ham ase totap martahan hassi pe dong na mambahen ham maretek ni uhur.