1. Kai akibatna adi kitik ukurta?

TIAP wari siadapi melala masalah janah siusahaken asa ngasupta ndungi masalah e. Tapi adi kitik ukurta mesera siakap ndungi masalahta e. Emaka, sianggaplah perasan kitik ukur e bagi sekalak pinangko si atena muat kinitekenta, semangatta, bage pe keriahen ukurta. Nina Kuan-kuanen 24:10, “Kalak si mintes bene ukurna tupung paksa gawat, kalak si bage tuhu-tuhu lemah kal.” Arah ayat e teridah maka adi kitik ukurta, banci kita lemah janah lanai banci sidungi masalahta.

2. Kai saja si banci erban kitik ukurta? Janah kai kari sibahas bas artikel enda?

² Lit piga-piga keadan si banci erban kitik ukurta. Misalna, perukuren si negatif, kesalahen si pernah siban, ras pinakit. Selain si e, banci saja kitik ukurta perban la sidat tugas si enggo ndekah siarapken bas ngelayani Jahwe. Ntah arus kita erberita bas daerah si teremen kalakna la nggit megiken berita si meriah. Bas artikel enda sibahas kari kai saja si banci silakoken gelah lanai kitik ukurta.

3. Kai si banci nampati kita gelah lanai negatif perukurenta bage pe gelah la lalap siakap salah banta?

³ Perban kita la sempurna, pasti lit kelemahenta janah rusur siban kesalahen. Adi la kita hati-hati banci kari lalap salah siakap banta janah la siakap meherga banta. Perukuren si bage erban kita erpengakap maka asa ndigan pe labo ibereken Jahwe kita masuk doni si mbaru. Bahaya kel perukuren si bage. Jadi, uga arusna perukurenta? Ikataken Pustaka maka kerina manusia selain Jesus Kristus “nggo erdosa.” (Rom. 3:23) Amin pe bage, labo idaram-darami  Jahwe kesalahenta ntah pe ipaksaNa kita gelah la ngelakoken kesalahen. Tapi, perban Ia Bapak si perkeleng janah sabar, isampatiNa ateNa kita. ItehNa maka mesera siakap ngelakoken kai si mehuli janah ngelawan perukuren si negatif. Emaka pasti nggit Ia nampati kita.​—Rom. 7:18, 19.

4-5. Menurut 1 Johanes 3:19, 20, kai si erbanca maka lanai kitik ukur dua turang seninata?

⁴ Cuba ukuri kerna Debora ras Maria. * Kitik-kitik nari rusur kel la mehuli perbahanen keluarga Debora man bana janah jarang kel ia ipuji. E erbanca negatif rusur perukurenna kerna dirina. Bicara sitik saja pe ilakokenna kesalahen, mis gagal kel akapna bana. Maria pe bage ka masalahna. Perban rusur kel mela iakapna iban keluargana, dungna la akapna meherga bana. Emaka arus ia erjuang ngelawan perasan si bage. Kenca ia iperidiken pe, la iakapna ia cocok jadi Saksi Jahwe.

⁵ Tapi duana turang seninata enda terus ngelayani Jahwe. Kai si nampati kalak e? Rusur kalak e ertoto man Jahwe janah iturikenna uga perasanna. (Msm. 55:23) Selain si e, sadar kalak e maka situhuna iteh Bapakta si perkeleng si i surga maka kai si terjadi man banta banci erban negatif perukurenta kerna dirita. Janah idahNa ka sipat-sipat si mehuli bas dirita, aminna pe la lit siakap sipat si mehuli bas dirita.​—Baca 1 Johanes 3:19, 20.

6. Kai si perlu ilakoken kalak adi iulihina kesalahenna?

⁶ Kalak si sangana erjuang ngelawan kebiasan si la mehuli, banci saja iulihina ka kebiasanna e janah e erban ia kecewa man dirina. Memang kalak si ngelakoken kesalahen, pasti wajar adi salah iakapna bana. (2 Kor. 7:10) Tapi, ula erkiteken kesalahen e, negatif perukurenta kerna dirita, la siakap meherga dirita, janah lanai siakap mungkin kita iampuni Jahwe. Salah kel cara rukur si bage janah banci erban kita lanai ngelayani Jahwe. Ingetlah kai nina Kuan-kuanen 24:10 ndai, kitik ukur banci erban kita lemah. Adi siban kesalahen, ertotolah kita man Jahwe, sipindo perkuah ateNa gelah nggit Ia ngampuni kita. (Jes. 1:18) Adi tuhu-tuhu kita robah janah lanai siulihi kesalahenta e, pasti iampuniNa kita. Selain si e, pindo ka lah penampat pertua. Pasti sabar ia nampati kam gelah rembak mulihi ras Jahwe.​—Jak. 5:14, 15.

7. Engkai maka ula kitik ukurta adi sangana kita erjuang ngelakoken kai si benar?

⁷ Bagenda nina Jean-Luc sekalak pertua i Prancis man kalak si sangana erjuang  ngelawan kelemahenna, “Kalak si benar i lebe-lebe Jahwe, labo kalak si la pernah ngelakoken kesalahen, tapi kalak situhu-tuhu menyesal perban enggo ilakokenna kesalahen, janah lanai iulihina kesalahenna e.” (Rom. 7:21-25) Emaka, adi sangana kam erjuang ngelawan kelemahenndu, ula pernah iakapndu la meherga bandu. Ingetlah, kerina kita ngelakoken kesalahen. Jadi, kita kerina perlu lias ate Dibata si mbelin si iberekenNa arah korban tebusen Jesus.​—Ep. 1:7; 1 Joh. 4:10.

8. Man ise kita mindo penampat adi sangana kitik ukurta?

⁸ Turang seninata bas runggun banci mpegegehi kita! Sanga perlu kita teman ngerana, nggit kalak e megiken kita janah ipegegehina kita. (Kua. 12:25; 1 Tes. 5:14) Sekalak turang seninata bas Nigeria si gelarna Joy si erjuang ngelawan perasan kitik ukur ngataken, “Labo aku banci megegeh adi la kin isampati turang senina. Kai si ilakoken kalak e jadi bukti man bangku maka ijawap Jahwe totoku. Arah kalak e kupelajari uga carana nampati kalak si deban si sangana kitik ukurna.” Tapi, perlu siinget maka labo lalap iteh turang seninata perlu kita ipegegehi. Emaka, perlu sideheri turang seninata si paguh kinitekenna janah sikataken perlu kita penampat.

9. Uga Masmur 41:4 ras 94:19 mpegegehi kita?

⁹ Pindolah penampat Jahwe. Sanga kurang sehat siakap banta ntah pe nggo ndekah la malem-malem pinakitta si mekelek, banci saja mesera positif perukurenta. Memang gundari la iban Jahwe mukjizat guna mpepalem pinakitta, tapi iapuliNa kita janah iberekenNa gegeh gelah ngasup kita ngadapi pinakitta e. (Baca Masmur 41:4; 94:19.) Misalna, banci ibanNa tersuruh ukur turang seninata nampati kita ndahiken dahin rumah, belanja, ntah pe notoken kita. Ntah banci saja iingetkenNa kita ayat-ayat Pustaka si banci mpepalem pusuhta, bagi arapen si luar biasa kerna doni si mbaru, i je la lit kai pe si erban mesui siakap.​—Rom. 15:4.

10. Kai si erbanca maka lanai Isang stres?

¹⁰ Isang, si tading bas Nigeria lumpuh perban kecelakan. Ikataken dokterna maka asa ndigan pe lanai ia banci erdalan. Nina, “Stres kel aku janah lanai lit semangatku.” Tapi terus nge ia bage? Lang! Kai si nampati ia? Nina, “La erngadi-ngadi aku ras ndeharaku ertoto man Jahwe janah rajin kami mpelajari Pustaka. Ikira kami pasu-pasu si ibereken Dibata man kami, termasuk arapen nggeluh bas doni si mbaru.”

11. Kai si erban Cindy tetap ermeriah ukur aminna pe mekelek pinakitna?

¹¹ Bas Meksiko, lit sekalak turang seninata si gelarna Cindy. Ikataken dokter maka pinakitna banci dungna erban ia mate. Kai si erbanca maka ngasup ia ngadapi keadanna e? Sanga ia irawat, iusahakenna erberita tiap wari. Nina, “Alu erberita, lanai kuukuri kerna operasiku, uga suina kuakap, ntah pe kerna pinakitku. Si kuukuri eme kalak si deban. Bagenda me si kulakoken: Sanga aku ngerana-ngerana ras dokter ntah pe perawat, kusungkun uga keadan keluarga kalak e janah engkai maka ipilihna pendahin si mesera e. Alu bage kuteh topik kai si banci kena ku pusuhna. Piga-piga arah kalak e ngataken maka jarang lit pasien si nggit nungkun keadan kalak e. Melala si ngata bujur perban ermediate aku man bana. Emaka, lit piga-piga si mereken alamat ntah pe nomor teleponna bangku. Kuteh maka Jahwe si nampati aku gelah ngasup aku ngadapi  pinakitku enda. IberekenNa keriahen ukur si la kusangka-sangka!”​—Kua. 15:15.

12-13. Uga cara kalak si sakit ntah pe si lemah erberita? Janah kai asilna?

¹² Kalak si sakit ntah pe lemah banci saja kitik ukurna perban lanai melala si banci iberekenna bas pelayanen. Tapi iusahaken kalak e ndarami cara gelah banci tetap erberita alu cara si mehuli. Bas Amerika Serikat, lit sekalak turang seninata si gelarna Laurel. Enggo 37 tahun dekahna ia nggunaken paru-paru besi janah terus ampar bas ingan medem. Sakit kanker ka ia, enggo piga-piga kali ka ia operasi, janah mekelek ka pinakit kulitna. Aminna pe luar biasa kel tentangen si iadapina, terus ia erberita. Erberita ia man perawat ras man kalak si reh ndahi ia ku rumahna. Kai asilna? Silang-langna lit 17 kalak isampatina meteh kebenaren. *

¹³ Sekalak pertua bas Prancis si gelarna Richard mereken nasehat si erguna man kalak si la banci ndarat arah rumah nari ntah pe kalak si irawat bas panti jompo. Nina, “Kuiahken kalak e gelah ibanna gerai si kitik. Kalak si lewat banci ngidah gerai e janah tertarik ia nungkun. Percakapen si bage banci mpegegehi turang seninata si lanai banci erberita arah rumah ku rumah.” Kalak si la banci ndarat arah rumah nari pe banci ka erberita alu nulis surat ntah pe alu telpon.

14. Usihen si luar biasa kai si ibereken Raja Daud?

¹⁴ Melala alasen si erbanca maka la sidat tugas si sedekah enda enggo siarapken i bas ngelayani Jahwe. E banci saja perban kita enggo metuasa, kurang kesehatenta, ntah pe perban keadan si deban. Adi bage keadanta, banci kita erlajar arah Raja Daud. Merhat kel Daud mbangun rumah pertoton Dibata, tapi ipilih Jahwe kalak si deban guna mbangunca. Idukung Daud kel kalak si ipilih e, ibereken Daud melala emas ras pirak guna mbangunca. Tuhu-tuhu usihen si luar biasa kel ia man banta!​—2 Sam. 7:12, 13; 1 Kro. 29:1, 3-5.

15. Kai si erbanca maka lanai kitik ukur Hugues?

¹⁵ Sekalak turang senina si gelarna Hugues, si tading bas Prancis, ngadi ngelayani jadi pertua perban sakit. Ndahiken dahin si kitik saja pe bas rumahna la ia ngasup. Nina, “Tangtangna, kitik kel ukurku janah la meherga kuakap bangku. Tapi dungna, sadar aku maka sia-sia nge adi kuukuri kai si la banci kulakoken. Emaka, si kuukuri eme kai si banci kulakoken bas ngelayani Jahwe. Dungna, banci  meriah ukurku. Kuusahaken gelah la aku nyerah. Bali bagi Gideon ras telu ratus prajuritna si terus erjuang aminna pe latih iakap kalak e, aku pe kuusahaken terus erjuang!”​—Hak. 8:4.

16. Kai si banci sipelajari arah malekat-malekat?

¹⁶ Malekat-malekat si setia pe usihen si mehuli man banta. Contohna, pernah isuruh Jahwe malekat-malekat mereken pendapat kerna uga carana nipu Raja Ahap si jahat. Ibereken piga-piga malekat me pendapatna. Tapi, pendapat sada malekat ngenca si ipilih Dibata, janah ikatakenNa man bana pasti berhasil kari pendapatna e. (1 Raj. 22:19-22) Kitik nge ukur malekat-malekat si setia si debanna? Janah bagenda nge nina, ‘Engkai maka kupekeri-keri waktuku mereken pendapat?’ Pasti la bage nina. Meteruk ukur kel kerina malekat-malekat e, man Jahwe saja ngenca atena mereken kemulian.​—Hak. 13:16-18; Ket. 19:10.

17. Kai si arus silakoken adi kitik ukurta perban la lit hak istimewata i bas ngelayani Jahwe?

¹⁷ Ingetlah maka sada kehamaten si mbelin kel banci jadi Saksi-Saksi Jahwe janah mberitaken kerna Kerajan Dibata. Lit ntah lang hak istimewata i bas organisasi Jahwe labo e si erbanca kita meherga iakap Dibata. Tapi, si erbanca kita meherga iakap Dibata bage pe turang seninata eme adi kita meteruk ukur. Emaka, pindolah penampat Jahwe gelah banci kam tetap meteruk ukur. Ukurilah usihen si mehuli arah umat Jahwe si icatat bas Pustaka. Nggitlah kam ngelayani turang senina asa ngasupndu.​—Msm. 138:6; 1 Pet. 5:5.

18-19. Uga carana gelah banci kam ermeriah ukur sanga erberita aminna pe la lit kalak si nggit megiken?

¹⁸ Pernah nge kitik ukurndu sanga la lit kalak si megiken berita si meriah bas daerahndu ntah pe jarang ijumpaindu kalak bas rumah? Adi bage situasindu, kai si banci ilakokenndu gelah tetap kam ermeriah ukur ntah pe gelah tambah keriahen ukurndu? Lit piga-piga cara si banci ilakokenndu bas pelayanen. E banci nenndu bas kotak si erjudul, “ Kai Saja si Banci Ilakokenndu i bas Pelayanen?” Selain si e, perlu  seimbang carandu rukur kerna pelayanen. Kai maksudna?

¹⁹ Ingetlah tujun utamata erberita eme gelah itandai kalak gelar Dibata ras KerajanNa. Jelas-jelas ikataken Jesus maka sitik ngenca kalak si nggit ngikutken ia. (Mat. 7:13, 14) Sanga kita erberita, kita erdahin ras Jahwe, Jesus, bage pe malekat-malekat. Enda sada kehamaten kel man banta. (Mat. 28:19, 20; 1 Kor. 3:9; Ket. 14:6, 7) Idarami Jahwe kalak si nggit ngelayani Ia. (Joh. 6:44) Emaka, adi lit kalak la nggit megiken berita si meriah gundari, banci saja bas waktu si deban nggit ia megikenca.

20. Uga Jeremia 20:8, 9, banci nampati kita gelah lanai kitik ukurta?

²⁰ Melala si banci sipelajari arah Nabi Jeremia. Itugasken ia bas sada daerah janah melala kel tentangen si iadapina i je. Rusur ia ihina ras itokoh-tokohi “gedang-gedang wari.” (Baca Jeremia 20:8, 9.) I bas sada paksa, pernah kitik kel ukurna janah lanai atena erberita. Tapi tetap ia erberita. Engkai? ‘Kata Dibata’ bali bagi api si gurlah bas pusuhna janah e erbanca la ia banci ngadi erberita. Kita pe banci bagi Jeremia adi sipelajari Pustaka tiap wari janah siukuri alu mbages. Asilna, reh tambahna me keriahen ukurta janah banci saja reh teremna kalak si nggit megiken.​—Jer. 15:16.

21. Uga carana gelah lanai kitik ukurta?

²¹ Nina Debora si enggo iceritaken ndai, “Perasan kitik ukur eme senjata si megegeh si igunaken Setan guna nentang kita.” Tapi, ndauh gegehen Dibata Jahwe asangken Setan bage pe kerina senjata si igunakenna. Emaka, sanga kitik ukurndu erkiteken alasen kai pe, pindolah penampat Jahwe. Pasti isampatiNa kam gelah ngasup ngadapi perukuren si negatif, pinakit, bage pe gelah seimbang perukurenndu i bas ngelakoken tugasndu. Selain si e, isampatiNa ka gelah positif perukurenndu kerna pelayanenndu. Emaka, ertotolah kam man Bapakndu si perkeleng. Turiken kerina perasanndu man baNa. Alu penampatNa pasti lanai kitik ukurndu.