1. Ka ladügübei maguraasuni woun?

SUN wagía gaturobulintiwa, ani sagü weyu áfaaguatiwa lun wagagibudagun luma. Gama lumoun, hénrengubei lun wagagibudagun luma waturobulin dan le weferidiruni waguraasun. Ítara liña maguraasuni kei aban híweruti le íweruhabalin ichouruni le wawagubei, ganigi luma ugundani le wemegeirubei lun wageindagun luma turobuli. Kei lariñaguni Ariñawagúni 24:10: “Anhein ábürüha barüna dan le lidan ban lénrengunga, lóuguarügü liña bere”.

2. a) Ka katei gayaraabei ladügün lun weferidiruni waguraasun? b) Kaba wariha lidan arütíkulu le?

² Anihein saragu katei le gayaraabei ladügün lun weferidiruni waguraasun. Anihein burí ladüga ligaburi wasandiragun woungua luma burí le asuseredubei woun. Ani laganagua, anihein wachara guánarügü, wadebilin, luriban wátuadi, michugún lan somu dasi woun le hínsiñebei hamuga woun lun wibihin lidan weseriwidun lun Heowá o mosu lan wapurichiha lidan somu fulasu le ñein lubéi lougua lan waganbún. Lidan arütíkulu le, wayanuhaba luagu ka lan gayaraabei wadügüni lun wageindagun luma maguraasuni.

3. Ka gayaraabei líderaguniwa dan le wasandiragun woungua wuriba ladüga wachara?

³ Ánhawa ásiñaragua woungua lau wachara luma wadebilin, gayaraabei ladügün katei le lun wasandiragun woungua wuriba darí lun wasaminarun maweiyasunbei lan Heowá ígira lun webelurun lidoun iseri ubóu. Gayaraati ladügün ligaburi saminaü le dañu woun. Ida luba warihini wachara? Ariñagatu Bíbülia, ‘afigouhaaña lan sun gürigia’ luéidügü Hesusu (Rom. 3:23). Íbini ítara, meteniti Heowá lun wachara magurabun ligía lun machararun wamá. Aban Úguchili hínsiñehabuti ani gaguraasunti Heowá. Subuditi lun áfaagua wamá saragu lun wadügüni le buídubei ani áfaagua wagía lun míchaagun wamá saragu duru wawougua,  ani aranseñu liña lun líderaguniwa (Rom. 7:18, 19).

4, 5. Ka lariñagunbei 1 Huan 3:19, 20, le íderagubaliña bián íbirigu würiña iñuragua lídangiñe maguraasuni?

⁴ Ariha waméi le asuseredubei tun Deborah tuma María. * Dan meha ñǘraügiru Deborah mouserún hamutu meha tiduheñu lau ínsiñeni ani adügatiña meha lun tasandiragun tungua lau busiganu. Dan le meha buidu lan tadügün somu katei anihein meha dan mariñawagúnti tun buidu lan tadügüni. Ligíati, dan le taweiridunbei Deborah wuribati meha tasaminarun tuougua. Íbini dan le tachararun murusunraü sandiguatu meha tungua ibidiougua lan tau. Genegeguati le asuseredubei tun Deborah luma le asuseredubei tun María. Adügatiña meha tiduheñu María lun tasandiragun tungua lau busiganu darí lun tasaminarun mouni tan lun ni kata. Íbini lárigiñe tabadiseirun masandiraguntu meha tungua gadüna tan lariñawagúniwa tuagu gefentu lan luagu Heowá.

⁵ Meberesenga le meha asuseredubei houn íbirigu ha mígirun hamuti heseriwidun lun Heowá. Ka íderagubaliña? Aban katei le hadügübei, aba hígiruni hadiheri lun Heowá dan le habahüdahabalin lun lidan furíei ka lan hasandirunbei (Sal. 55:22). Aba hafurendeirun subudi lumuti lan Wáguchi le siélubei gayara lan ladügün katei le meha asuseredubei woun lidan dan le sügühalibei lun wasandiragun woungua wuriba. Lau sun lira, ariha lumuti buiti le tídanbei wanigi, íbini anhein marihin wabalin (aliiha huméi 1 Huan 3:19, 20).

6. Ka gayaraabei ladügün aban gürigia ánheinya éiguada lidoun ladügǘn wuribani?

⁶ Másiñati láfaaguña lan aban gürigia lun lígiruni ládügün somu wuribani. Gama lumoun, ábaya léiguadun lidoun wuribani ligía ani aba leferidiruni luguraasun. Mama aban katei wuribati wasandirun duru dan le wachararun (2 Ko. 7:10). Íbini ítara, moun lumuti wasandiragun woungua wuriba darí hamuga lun wasaminarun: “Máraninadina; ida luba feruduna lánina Heowá?” Wuribati ligaburi saminaü le ani gayaraati ladügün lun wígiruni weseriwidun lun Heowá. Haritagua waméi le lariñagubei Ariñawagúni 24:10: ánhawa eferidirei waguraasun lóuguarügü liña were. Lubaragiñe lira, ‘adimureha wamá libügürü katei le’ luma Heowá lidan furíei lun feruduna lani wachara (Isa. 1:18). Larihibei Heowá asakürihadiwa lan tídangiñe sun wanigi ani feruduna lubadiwa. Lanwoun lira, lunti wayanuhan hama wéiyaaña lidan afiñeni ani lau gurasu híderagunbadiwa lunya gamadagua wamá luma Heowá (Sant. 5:14, 15).

7. Anhein wageindaguña lubéi luma wadebilin ka uagu moun lumuti lubéi lun weferidiruni waguraasun?

⁷ Ariñagati aban wéiyaali lidan afiñeni faransuna le gíribei Jean-Luc houn ha ageindagubaña luma hadébilin: “Lun Heowá, mama  aban gürigia le macharabei richabei, gürigia le asakürihabei ladüga lichara ani áfaagua ligía lun madügündigia lani, ligía richabei ligibugiñe Bungiu” (Rom. 7:21-25). Ligíati, anhein hageindaguña lubéi luma hídebilin masaminara humá mouni humá lun ni kata. Haritagua huméi sun lan wagía charatiwa, lau sun lira ladüga lareini Heowá gayaraati feruduna lani wachara ladüga lani liráü sákürifisiu (Efe. 1:7; 1 Huan 4:10).

8. Kaba uma woudin áluaha gurasu danme le wemegeiruni?

⁸ Dan le megei wamá gurasu, gayaraati wibihini hámagiñe wábirigu, ha ítarabaña woun kei waduheñu. Gayaraabei haganbuniwa ru hagíame dǘgüdaguaü woun danme le wemegeiruni (Ari. 12:25; 1 Tesa. 5:14). Ariñagatu aban íbiri niheriana to gíriboun Joy, to ageindaguboun luma maguraasuni: “Ida nuba hamuga san sin níbirigu? Arufudati gurasu le híchugunbei níbirigu nun óunaba lani Heowá nafurieidun. Ani arufudahaña giñe nun ida luba lan níchugun gurasu houn ha hírubaña”. Chóuruti aniheinbei lan dan míchugunbaña lan íbirigu fe danme le megei wamá gurasu. Ligíati gayaraabei woudin ayanuha hama íbirigu derebuguti hafiñen lun wariñaguni houn mégeitiwa lan ídemuei.

9. Ida liña líchugun Sálumu 41:3 luma 94:19 dǘgüdaguaü woun?

⁹ Áluaha waméi lídehan Heowá. Hénrenguti warufudun aban igaburi buiti dan le sandi wamá, dántima láuñadiwa lan aban sandi máraninati. Chóuruti mareidaguagüdün lubadiwa lan Heowá lau aban milaguru, gama lumoun ruti gurasu woun ani ru lumuti giñe erei le wemegeirubei woun lun wawandun (aliiha huméi Sálumu 41:3; 94:19). Ida liña ladügüni? Másiñati línchahaniña wábirigu lun híderaguniwa lidan lagañeinhoun katei múnadoun o híderaguniwa lau dasi múnada. Gayaraati giñe línchahaniña wábirigu lun hafurieidun wawagu. Lanwoun lira, gayaraati giñe líderaguniwa aritagua somu bérusu tídangiñe Lererun le íchugubei dǘgüdaguaü, kéiburi, lubuidun emenigini lun wawinwandun aban ibagari sin figóu, sin gáriti, sin sandi lidan iseri ubóu (Rom. 15:4).

10. Ka uagu meferidirun lubalin Isang luguraasun lárigiñe lasufurirun aban danaguaü?

¹⁰ Isang aban íbiri le awinwandubei Niheria, aba lerederun méibugunga lárigiñe aba danaguaü, aba lariñagun surusia lun leredera lan méibugunga lun sun libagari. Ariñagati: “Bulesei lumutu uganu le nanigi ani aba neferidiruni nuguraasun”. Ka íderagubalin? Ariñagati: “Súnwandan meha nafurieidun lun Heowá úara tuma nani weiriou ani aturiaha wamutu meha giñe Bíbülia úara. Lanwoun lira, aranseñuwaña meha lun wíchugun seremei lun Heowá luagu katei buiti le wámabei laganagua lira emenigini lun wawinwandun lidan iseri ubóu le lani Bungiu”.

11. Ka adügübei lun tasandirun Cindy ugundani, lau sun sandi tan?

¹¹ Aba ladarirún aban sandi máraninati tuagu Cindy to awinwanduboun Méhiku. Ida liña tagagibudagun luma turobuli le? Lidan anuhán lan eresibira árani lun tisandi, le meha tabusenrubei tapurichihan sagü weyu. Ariñagatu: “Adügati le lun netenirun houn amu lubaragiñe netenirun lun nibugún, lun gáriti luma luriban nadariragun nungua. Aniha meha le nadügübei: lidan anaha lan meha ayanuha hama surusiagu luma hama anosuhatiña aba meha nálügüdüniña hawagu haduheñu. Lárigiñe, aba meha nálügüdüniña ka lan uagu hanúadira aban wadagimanu ítarati. Ligíati, ménrengunti meha nun lun nadarirun kaba lan uagu nayanuhan hama. Ariñagatiña saragu gürigia nun ua lan kamani lan lun hálügüdüniña gürigia ha háspitalirugubaña ida haña lan, ani saragu hádangiñe rútiña seremei nun ladüga narufudun berese nan hau. Hádangiñe ariñaga hamuti nun halía lan heredera añahein amu ru hamuti linumerun hagagamurun nun. Lidan dan  hénrenguti le lidan nibagari, adügati Heowá lun nasandirun aban óunwenbu ugundani le meha magurabun numuti” (Ari. 15:15).

12, 13. Ka hadügübei fiu íbirigu ha sándihaña lun gayara lan hapurichihan, ani ka buiti lanügübei le houn?

¹² Añahein íbirigu ladüga hasandi o ladüga harumudiri siñati hadügün saragu kei habusenrun lidan hani ministeriu ani adügati lira lun heferidiruni haguraasun. Lau sun lira, saragu hádangiñe daritiña ida luba lan hapurichihan. Anuhoun aban íbiri gíritu Laurel to awinwanduboun Meriga, sügütu 37 irumu lidan aban máhina le íderagubarun lun tawaragun. Dagati meha giñe kánserü tuagu, biwaguatu saragu wéiyaasu, ani dagati meha giñe saragu sandi luagu tura. Lau sun lira, madügünti ni aban lídangiñe sandi le lun terederuni tapurichihan. Apurichihatu houn anosuhatiña luma houn amu gürigia ha meha ñǘdünbaña óunigiroun túbiñe. Íderaguaaru kéiburi 17 gürigia lun hadügagun houngua gefentiña luagu Heowá. *

¹³ Ruti aban wéiyaali lidan afiñeni faransuna le gíribei Richard aban lubuidun adundehani houn ha siñabei háfuridun hábiñegiñe luma houn ha tídanbaña muna to ñein lubéi hóunigirua wéiyaaña, ariñagati: “Gayaraati híchugun fiu íbirigu ha agumeiraguagüdüni luagu aban dábula lun harihinu gürigia dan le hásügürün. Dánmeti hásügürün gürigia másiñati busenbaña lan hadügün álügüdahani. Ladügüba lira lun hapurichihan wábirigu ha siñabei háfuridun apurichiha tidan burí muna, ani líchuguba hadügüni katei le dǘgüdaguaü houn”. Ha giñe siñabei háfuridun hábiñegiñe, gayaraati giñe hapurichihan lau habürühan gárada o hagúaha luéigiñe gágamuru.

14. Ka lubuidun hénpulu líchugun urúei Dawidi woun?

¹⁴ Másiñati busén wamá wibihin aban dasi lidan damuriguaü o lidan sirkuitu le ñein wabéi. Gama lumoun másiñati siñabei lan wibihini ladüga warumudiri, luriban wátuadi o ladüga amu burí katei. Anhein ligía lubéi waturobulibei gayaraati wafurendeirun lúmagiñe lani urúei Dawidi hénpulu. Tídangiñe sun lanigi, busenti meha lun ligía lan ábunaguoun litenpulun Bungiu, gama lumoun aba lanúadirun Heowá amu gürigia lun ligía lan ábunaguoun litenpulun. Ídehati meha Dawidi luma le lunbei lábunagunu ténpulu lau líchugun saragu golu luma pülata lun tabunún ténpulu. Aban lubuidun hénpulu le lun wafalaruni (2 Sam. 7:12, 13; 1 Kro. 29:1, 3-5).

15. Ida liña liñuragun Hugues lídangiñe maguraasuni?

¹⁵ Ladüga luriban látuadi aban íbiri faransuna le gíribei Hugues, mosu meha lígiruni leseriwidun kei wéiyaali lidan afiñeni. Siñá meha ladügün ni kata múnada, nírügü dasi le ménrenguntimabei.  Ariñagati: “Furumiñe sandiguatina meha nungua meseriwín nan lun ni kata. Gama lumoun, lau lásügürün dan, aba narihini súdini lan lun mírudagun nan ladüga le siñá nubéi adüga. Ladüga lira, gayaraati meha nagundaarun lau le gayara nubéi adüga lidan neseriwidun lun Heowá. Mígiraguagüdün báadina nungua lun lábürühan narüna. Ítaraniña kei Hedeón hama 300 luwügüriñanigu: Lau sun buchá lan nuagu, nasigiruba ageindagua luma luriban nátuadi” (Ali. 8:4).

16. Ka larufudubei hani ánheligu hénpulu woun?

¹⁶ Aban giñe lubuidun hénpulu ánheligu. Luagu aban dan, aba lamuriahan Heowá hama ánheligu lun hariñaguni hasaminan libügürü ida luba lan heyeeduni Aabü aban urúei wuribati. Saragu hádangiñe ariñaga hamuti hasaminan, gama lumoun aba lanúadahan Heowá aban hádangiñe ani aba lariñagun lun buiti lan le lariñagubei ani ligíaba asusereda (1 Uru. 22:19-22). Féridi hamuti san ha híbiri ánheligu haguraasun? Ariñagatiña san, “mariñaguntina hamuga ni kata”? Úati ni kata arufuduti lau ítara liña lan. Inarüni ǘnabugu hamá ánheligu ani busentiña lun lan Heowá lidin sun uéiriguni (Ali. 13:16-18; Aruf. 19:10).

17. Ka lunbei wadügüni ánhawa eferidirei waguraasun ladüga mibihin wamá, ítaga dasi?

¹⁷ Gabaroun waméi, lubuidun lan chansi le wámabei, gefén wamá luagu Heowá luma lun wapurichihan luagu Larúeiha. Ñübuin liña burí dasi ñüdün. Gama lumoun létima adügübei lun gebegi wamá lun Bungiu luma houn wíbirigu, ǘnabugu wamá mama dasi. Ligíati, furíei wamá lun Heowá lun ǘnabugumeme wamá. Ráramagua wamá asaminara luagu sun lubuidun hénpulu lánina ǘnabuguni le tídanbei Bíbülia, ani aranseñu wamá lun wíderaguniña wábirigu dan le gayara lan wadügüni (Sal. 138:6; 1 Fe. 5:5).

18, 19. Ida luba gúndaameme wamá lidan wani ministeriu dan le mabusenrun hama gürigia haganbuniwa lidan fulasu le ñein lubéi wapurichiha?

¹⁸ Anihein san dan weferidiruni waguraasun ladüga mabusenrun hamá gürigia haganbuniwa o madarirun wamutiña lan gürigia hábiñe dan le wáfuridun apurichiha? Anhein ítara liña lubéi, ka lunbei wadügüni lun gúndaameme wamá lidan wani ministeriu? Wadariruba fiu adundehani lidan rekuáduru “ Ida luba gúndaatima wamá lidan wani ministeriu”. Súdiniti giñe  lun buidu lan ligaburi warihini wani ministeriu. Ka mini lubéi lira?

¹⁹ Gabaroun waméi le lan súdinitimabei, lun wapurichihan luagu liri Bungiu luma luagu Larúeiha. Ariñagati Hesusu furangu míbebaña lan gürigia adarirei üma le anügübei lidoun ibagari le magumuchaditi (Mat. 7:13, 14). Dan le awanhán lan lidan wani ministeriu, aban lubuidun chansi wámabei lun wawadigimaridun úara luma Heowá, Hesusu luma hama ánheligu (Mat. 28:19, 20; 1 Ko. 3:9; Aruf. 14:6, 7). Lanwoun lira, Heowá ayarafadagüdübaliña gürigia luouguoun lun heseriwidun lun (Huan 6:44). Háfuga mabusenrun lan aban gürigia laganbuni uganu buiti guentó, gama lumoun másiñati laganbuniwa amu dan.

20. Según Heremíasi 20: 8, 9, ka gayaraabei líderaguniwa iñuragua lídangiñe maguraasuni?

²⁰ Gayaraati wafurendeirun saragu katei lúmagiñe profeta Heremíasi. Apurichihati meha lidan aban fulasu le ñein lubéi maha hamá gürigia haganbuni. Anaba hamuti meha gürigia ani adüga hagía bula lau “sun dan” (aliiha huméi Heremíasi 20:8, 9). Aba meha leferidiruni luguraasun darí lun mabusenrun hali lan lun lapurichihan. Íbini ítara merede lumuti lapurichiha. Ka uagu? Ariñagati aba lan lasandirunu Lererun Bungiu lídangua kei aban watu gemeti le meha siñá lubéi awanda. Gayaraati lasuseredun ligiaméme woun ánhawa aturiahoun Lererun Bungiu sagü weyu ráramagua wagía asaminara luagu le tariñagubei. Ligíati, anhein wadüga le, gúndaatimabadiwa lidan wani ministeriu ani másiñati buídutimabei lan lidin woun danme le wapurichihan (Her. 15:16).

21. Ida luba wiñuragun lídangiñe maguraasuni?

²¹ Ariñagatu Deborah to uáguboun wayanuha lidan párafu 4: “Ítara liña lan maguraasuni kei áruma gabafutu lúhaburugu Mafia”. Gabafutimati Heowá sügǘ luéi Mafia ani sügǘ tuéi sun burí áruma to layusuruboun Mafia. Ligíati, ánhawa eferidirei waguraasun ayumuragua wamá lun Heowá lun líderaguniwa. Líderagubadiwa agagibudagua luma wachara luma wadebilin. Líderagubadiwa giñe dan le sandi wamá. Ani líderagubadiwa arihei ka lan dasi gayara wabéi adüga o ka lan siñá wabéi adüga, ani líderagubadiwa giñe arihei wani ministeriu lau aban lubuidun igaburi. Lau lídehan Heowá, gayaraati wiñuragun lídangiñe maguraasuni.