1. Met epwe fis ngenikich ika sia letipechou?

LÓN eú me eú rán sia kúkkúna osukosuk nge sia achocho úkúkún ach tufich le likiitú faar. Nge a weires ach sipwe kan likiitú fán ach kewe osukosuk ika sia letipechou. Ina popun a lamot ach sipwe chechchemeni pwe letipechou a usun emén chón solá, mi tongeni solásenikich ach meefi lúkúlúk, pwora me pwapwa. Än Salomon Fos 24:10 a apasa: “Are ka apilükingau lon fansoun riaföü, om pöchökül a kisikis.” Ewer, letipechou a tongeni ekisikisaaló ewe péchékkúl mi lamot ngenikich pwe sipwe sópwéch le likiitú fán ach kewe osukosuk.

2. Met a tongeni efisi ach sipwe meefi letipechou, me met sipwele káé lón ei lesen?

² A chómmóng mettóch a tongeni áletipechowukich. Ekkóch ra pop seni pwisinkich, áwewe chék ren ekkewe mettóch sia mwáálliló wóór, úkúngawach, are apwangapwangen inisich. A pwal tongeni pop seni met a fis lón manawach, áwewe chék ren ach sise wiseni eú wis sia fókkun mochen wiseni lón án Jiowa angang, are ren an ese uwaéch ewe angangen afalafal ikewe sia nóm ie. Lón ei lesen sipwe káé ekkóch mettóch sia tongeni féri pwe sipwe likiitú fán letipechou.

3. Met a tongeni álisikich le eáni ekiek mi pwúng usun pwisinkich me minne kewe sia mwáálliló wóór?

³ A mecheres ach sipwe letipechou ren pwisinkich pokiten met ekkewe sia mwáálliló woor, me ren ach kewe apwangapwang. Iwe eli sipwe ekieki pwe sisap ketiw me ren Jiowa lón ewe Paratis pokiten sia kan mwámmwáálliló. Nge ena sókkun ekiek a mmen efeiengaw. Nge itá epwe ifa ach ekiek usun met ekkewe sia kan mwámmwáálliló woor? Ewe Paipel a erá pwe  aramas meinisin “ra tipis” chilóón chék Jesus Kraist. (Rom 3:23) Nge Jiowa ese nefótófót wóón ach kewe mwáál, are kútta senikich ach sipwe unuséch. Nge fen i emén Sam mi tong mi mochen álisikich. A pwal mosonottam. A silei úkúkún ach achocho le fiu ngeni ach kewe apwangapwang me ach eáni ekiek mi pwúng usun pwisinkich, iwe a chék mommochen álisikich.​—Rom 7:18, 19.

4-5. Met 1 Johannes 3:19, 20 a apasa mi álisi ekkewe rúúemén Chón Kraist fefin le fiu ngeni letipechou?

⁴ Sipwe nengeni pwóróusen Deborah me Maria. * Lekúkkúnún Deborah, fán chómmóng chón an we famili rese tongei, me ra ámmeef ngeni pwe ese wor aúchean. Rese kan akkapúnga. Ina popun a mááritá lón an meefi pwe ese wor aúchean. Atun a ekis mwáálliló, a meefi pwe a unusen sópwongaw. Pwal ina usun meefien Maria. Chón an we famili ra efisi an epwe meefi pwe i emén mi ássáw. Pokiten ena, a weires an epwe fiu ngeni an meefi pwe ese wor aúchean. Pwal mwo nge mwirin an papatais, a chúen meefi pwe ese fich ngeni an epwe emén Chón Pwáraatá Jiowa!

⁵ Nge ekkena rúúemén Chón Kraist fefin, rese úkútiw le angang ngeni Jiowa. Pwata? Pokiten ra maneetá wóón Jiowa ar kewe aúrek lón ar sié ngeni lón iótek. (Kölf. 55:22) Ra káé pwe Semach we mi tong lón láng, a silei pwe ekkewe mettóch mi ngaw mi fis ngenikich me lóóm, ra tongeni efisi ach sipwe eáni ekiek ese pwúng usun pwisinkich. Nge a pwal kúna ekkewe napanap mi múrinné sia eáni, inaamwo ika kich pwisin sise tongeni kúna.​—Álleani 1 Johannes 3:19, 20.

6. Met emén a tongeni ekieki ika a ttursefál lón ewe féffér mi mwáál a fen mwáálliló wóón me lóóm?

⁶ Eli emén a fókkun achocho le úkú seni eú féffér mi ngaw. Nge eli epwe ttursefál me lichippúng ren pwisin i. Ewer, sia kan mengiringir lupwen sia tipis. (2 Kor. 7:10) Iwe nge, sisap kon essenúkú ach lichippúng ren ach kewe mwáál me apwúngú pwisinkich me ekieki: ‘Ese wor aúcheai. Jiowa esap tongeni fókkun omusaeiló.’ Ena esin ekiek ese pwúng, ese lóngólóng wóón minne mi enlet me a tongeni efisi ach sipwe kaúló le akkangang ngeni Jiowa. Chemeni met sia álleani lón Än Salomon Fos 24:10, pwe ika sia letipechou, ach péchékkúl epwe kisikisiló. Nge sipwe fen “kakkapas” ngeni Jiowa lón ach iótek me kútta an úméúméch. (Ais. 1:18, Kapasen God) Atun Jiowa a kúna pwe ka enletin aier, me achocho le siwil, iwe epwe omusakóló. Pwal och, chuuri ekkewe mwán mi ásimaw. Fán mosonottam, repwe álisuk le péchékkúlsefál lón pekin ngún.​—Jas. 5:14, 15.

7. Pwata sisap meefi letipechou ika a weires ngenikich ach sipwe féri minne mi pwúng?

 ⁷ Iei alon Jean-Luc emén mwán mi ásimaw lón France ngeni chókkewe mi weires ren ar kewe mwáál: “Emén aramas mi pwúng me ren Jiowa, ina emén mi niamamesini met ekkewe a mwáál wóór me achocho le siwil, nge esap emén ese mwámmwáálliló.” (Rom 7:21-25) Iwe kosap ekieki pwe ese wor aúcheaom ika ka weires ren óm fiffiu ngeni óm apwangapwang. Pokiten kich meinisin sia kan mwámmwáálliló, iwe a lamot ngenikich án Kot úméúméch mi somwoló, mi pwá ren an awora ewe méén kepich.​—Ef. 1:7; 1 Joh. 4:10.

8. Ié kewe sipwe seppitiir ika sia letipechou?

⁸ Chienach kewe lón ewe mwichefel ra tongeni apéchékkúlakich! Ra tongeni aúseling ngenikich atun a lamot ngenikich ach sipwe iinaawu meefiach kewe, me ra tongeni apéchékkúlakichetá. (SalF. 12:25; 1 Tes. 5:14) Iei alon Joy, emén Chón Kraist fefin lón Nigeria, mi fiu ngeni an meefi letipechou. “Chiechiei kewe lón ewe mwicheich ra álisiei le likiitú. Ar apéchékkúlaei, a ánneta ngeniei pwe Jiowa a pélúweni ai kewe iótek. Ua pwal mwo nge káé seniir ifa usun upwe pwal apéchékkúla ekkewe ekkóch iir mi letipechou.” Iwe nge mi lamot ach sipwe chemeni pwe esap iteitan pwiich kewe repwe silei pwe a lamot ngenikich apéchékkúl. Iwe eli mi lamot ach sipwe pwisin ereni emén chienach mi ásimaw pwe a lamot ngenikich álillis.

9. Ifa usun Kölfel 41:3 me 94:19 a apéchékkúlakich?

⁹ Seppiti Jiowa ren álillis. Atun sia semmwen nge ákkáeúin ika sia fen sessemwen ren langattam fansoun, eli a weires ach sipwe eáni ekiek mi pwúng. Inaamwo ika Jiowa esap echikarakich iei ren eú manaman, nge a oururukich me ngenikich ewe péchékkúl mi lamot pwe sipwe tongeni likiitú. (Álleani Kölfel 41:3; 94:19.) Áwewe chék, a tongeni amwékútú chienach kewe Chón Kraist le atawekich lón ach kewe angangen leimw are shopping lón sitowa. A pwal tongeni amwékútú pwiich kewe le fitikich le iótek. Are a tongeni áchchema ngenikich ekkewe pwóróus mi oururukich seni an we Kapas, áwewe chék ren ewe ápilúkúlúk mi amwarar usun eú manaw mi unuséch lón ewe ótót sefé, ikewe ese wor semmwen are metek ie.​—Rom 15:4.

10. Met a álisi Isang an esap chék lelletipechou mwirin an ákseten?

¹⁰ Isang, emén chienach Chón Kraist seni Nigeria, a ákseten me a paralyze. Néún we tokter a ereni pwe esap chúen tongeni fetálsefál. Isang a erá: “Ua luketatakis me ápilúkúngaw.” Nge itá Isang a chék ikkina usun? Aapw! Met a álisi? A erá: “Ám me pwúlúwei we ause úkútiw le ikkiótek ngeni Jiowa me kákkáé an we Kapas. Aua pwal chék kikkilisou ren ekkewe feiéch mi nóm rem, kapachelong ám ápilúkúlúkún manaw lón án Kot we ótót sefé.”

11. Ifa usun Cindy a kúna pwapwa atun an úri eú semmwen mi fókkun chou?

¹¹ Cindy, seni Mexico, néún we tokter a ereni pwe a úri eú semmwen mi tongeni an epwe má ren. Met a álisi le likiitú? Atun a kan sássáfei, a achocho ngeni an epwe kan afalafal ngeni emén iteiten rán. A makkeei: “Ena mettóch, a álisiei le nefótófót wóón ekkewe ekkóch nge esap wóón ai reirei, ai metek, are úkúkún semmweni. Iei met ua kan féri: Atun ua kan fós ngeni nei kewe tokter are kangof, ua eisiniir usun chón ar kewe famili. Mwirin ua pwal eisiniir ika pwata ra fili le eáni ei sókkun angang mi weires. Mwirin ena, a mecheres ai upwe silei met sókkun pwóróus epwe achchúngú letiper. Chómmóng me leir ra erá pwe lape ngeni néúr kewe patient rese kan eisiniir ika ifa usur. Me chómmóng me leir ra kilisou  ngeniei ren ai áfánniir. Ekkóch ra pwal mwo nge ngeniei nampaan néúr phone are ar address. Iwe atun ei fansoun mi áweires lón manawei, Jiowa a fang ngeniei eú úkúkún pwapwaan letip mi pwal mwo nge ámáirú ngeniei!”​—SalF. 15:15.

12-13. Ifa usun chókkewe iir mi semmwen are apwangapwang ra tufichin afalafal ngeni ekkewe ekkóch, me met mwirilóón?

¹² Ekkewe mi semmwen me apwangapwang, eli ra meefi letipechou pokiten a aúkúk met ra tongeni féri lón ewe angangen afalafal. Iwe nge chómmóng me leir ra tufichin afalafal ngeni aramas. Laurel emén Chón Kraist fefin seni Merika, a chék itiló wóón eú mwesin mi álisi le ngasangas ren úkúkún 37 ier! A pwal likiitú fán an úri kanser, an reirei fán fitu, me an úri semmwenin únúch. Ekkena weires mi fókkun ssenúk, rese eppeti le afalafal. A afalafal ngeni ekkewe kangof me ekkewe chón túmúnú, iir mi kan etto lón imwan we. Met mwirilóón? A álisi 17 aramas le silei ewe enlet seni Paipel! *

¹³ Richard, emén mwán mi ásimaw lón France, a wor an pesepes mi álilliséch ngeni chókkewe mi mwenilóng lón imwer kewe are lón ekkewe imwen túmúnún chinnap. A erá: “Ua ekieki pwe a éch ika epwe wor eú ar leenien ékúna ngeni aramas néúch kewe puk. Atun aramas repwe kúna, repwe kapas eis usun me epwe emmwen ngeni ar repwe afalafal ngeniir. Ena mettóch a tongeni apéchékkúla chienach kana mi áchengicheng rese chúen tongeni afalafal imw me imw.” Chókkewe iir mi mwenilóng lón imw ra pwal tongeni afalafal ren ar mak taropwe are kékké wóón phone.

14. Ifa ewe leenien áppirú mi fókkun múrinné King Tafit a isetiw?

¹⁴ A wor chómmóng popun eli sisap eáni eú wis sia mochen eáni lón án Jiowa angang. Áwewe chék, eli sia kon chinnap are a apwangapwang inisich, are eli ren pwal ekkóch popun. Ika a ina usun nónnómuch, sia tongeni káé seni pwóróusen King Tafit. Atun a silei pwe ese kefil pwe epwe aúetá án Kot we imwenfel, ewe wis a fókkun áneánei an epwe eáni, a unusen álisatá ewe emén Kot a filatá an epwe eáni ena wis. Tafit a pwal mwo nge kisáseú le fangóló watteen álillis ngeni ena angang. A ifan me múrinnéén an na leenien áppirú fán itach!​—2 Sam. 7:12, 13; 1 Kron. 29:1, 3-5.

15. Ifa usun Hugues a pworacho ngeni letipechou?

¹⁵ Hugues, emén Chón Kraist mwán lón France, ese chúen wiseni wisan mwán mi ásimaw pokiten an semmwen, ese pwal mwo  nge tongeni féri ekkewe angang mi mecheres lón imwan we. A makkeei: “Akkomwan, ua meefi pwe ese wor aúcheai me ua fókkun letipechou. Nge ló, ló, ló, ua kúna lamoten ai usap chúen letipechou ren minne use tongeni féri. Iwe ua tongeni chék pwapwa ren met ua tufichin féri lón án Jiowa angang. Ua úppós ai usap fangetá. Upwe chék sópweló le fiffiu usun chék Kition me ekkewe úlúpúkú mwán, ra mélúlúló nge ra chúen sópweló le fiu!”​—Souk. 8:4.

16. Met sia tongeni káé seni ekkewe chónláng?

¹⁶ Ekkewe chónláng mi tuppwél ra isetiw leenien áppirú mi múrinné. Lemwúún King Ahap, Jiowa a etiwa ekkewe chónláng ar repwe memmeef wóón ifa usun repwe otupu ena king mi ngaw. Ekkóch me leir ra memmeef. Nge Kot a fili emén chónláng me ereni pwe meefian wóón minne a mochen epwe sópwéch. (1 King 22:19-22) Itá ekkena ekkóch chónláng ra letipechou, are ekieki, ‘Pwata ua pwal asolapa ai fansoun le watiw meefiei?’ Ese wor popun ach sipwe lúkú pwe a ina usun meefier. Ekkena chónláng ra enletin tipetekison me mochen pwe unusen ewe ling epwe ló ngeni Jiowa.​—Souk. 13:16-18; Pwär. 19:10.

17. Met sipwe féri ika sia letipechou pokiten sise kewis ngeni eú angang lón án Jiowa mwicheich?

¹⁷ Chemeni pwe ewe feiéch mi lap seni meinisin ina ach wiliti emén Chón Pwáraatá Jiowa me afalafala usun Mwúún we. Sia tongeni eáni eú wis are a pwal tongeni péút senikich eú wis, nge esap ikkena ekkewe popun Kot a aúcheanikich. Lupwen sia tipetekison sia aúchea me ren Jiowa me pwiich kewe. Ina popun, tingormaú ngeni Jiowa an epwe álisuk óm kopwe chék tittipetekison. Ekilonei usun ekkewe chómmóng leenien áppirú mi múrinné usun chókkewe mi tipetekison mi mak lón an we Kapas. Tipemecheres le angang fán iten chienom kewe Chón Kraist úkúkún óm tufich.​—Kölf. 138:6; 1 Pet. 5:5.

18-19. Ifa usun sipwe pwapwa lón ewe angangen afalafal inaamwo ika usun itá ese uwaéch ach angang lón ach we leenien afalafal?

¹⁸ Ka letipechou fán ekkóch pokiten usun itá ese uwaéch óm angangen afalafal lón leeniom we, are pokiten ese kon chómmóng aramas ka sereniir lón imwer kewe? Ika ewer, iwe ifa  usun sipwe tongeni chék pwappwapwa are ifa usun epwe lallapóló ach pwapwa? A makketiw ekkóch álillis mi álilliséch lón ewe pwóór itelapan, “ Usun Kalapólóón Ach Pwapwa lón ewe Angangen Afalafal.” A pwal fókkun lamot ach sipwe eáni ekiek mi pwúng usun ewe angangen afalafal. Met weween ena?

¹⁹ Chemeni pwe ewe ákkáeúin popun sia afalafal pwe sipwe esilei iten Kot we me pwóróusen Mwúún we. Jesus a affata pwe esap chómmóng repwe aleni ewe al ngeni manaw. (Mat. 7:13, 14) Lupwen sia fiti ewe angangen afalafal, sia feiéch pwe sia angangfengen me Jiowa, Jesus, me ekkewe chónláng. (Mat. 28:19, 20; 1 Kor. 3:9, NW; Pwär. 14:6, 7) Jiowa a panato chókkewe iir mi mochen angang ngeni. (Joh. 6:44) Ika emén ese mochen aúseling ngeni ewe pwóróus lón ena atun, eli lón en, epwap mochen aúseling.

20. Met Jeremaia 20:8, 9 a tongeni áiti ngenikich usun ach fiu ngeni letipechou?

²⁰ Sia tongeni káé chómmóng seni pwóróusen ewe soufós Jeremaia. A kewis pwe epwe afalafal lón eú leeni mi fókkun weires. Ekkewe aramas ra esiita me turunufasa “iteiten rän.” (Álleani Jeremaia 20:8, 9.) Lón eú atun a letipechou pwe iwe a mochen fangetá. Nge ese. Pwata? Pún án Jiowa “kapas” a usun ekkei lón leluken Jeremaia, me ese tongeni pwouru! A pwal ina usun ren kich, atun sia ouraló ekiekich me letipach ren án Kot Kapas. Pwal ina eú popun sipwe káé ewe Paipel iteiten rán me ekilon wóón. Iwe mwirin, epwe lapóló ach pwapwa, me eli aramas repwe mochen aúseling ngenikich.​—Jer. 15:16.

21. Ifa usun sipwe tongeni win lón ach fiu ngeni letipechou?

²¹ Deborah ewe sia fósun me mwan, a erá: “Letipechou, ina eú án Satan pisekin maun mi fókkun péchékkúl.” Nge Jiowa a fókkun péchékkúl lap seni Satan me an kewe pisekin maun. Iwe atun sia meefi letipechou ren ese lifilifil popun, sipwe tingormaú ngeni Jiowa an álillis. Epwe álisuk le likiitú fán met ekkewe ka mwámmwáálliló woor me apwangapwangom kewe. Epwe túmúnuk lón óm samau. Epwe álisuk le eáni ekiek mi pwúng usun ekkewe wis lón an angang. Me epwe álisuk le eáni ekiek mi múrinné usun óm angangen afalafal. Iótek ngeni Semom we mi tong me pwár ngeni meefiom kewe. Ren an álillis, ka tongeni win lón óm fiu ngeni letipechou.