1. Wojeya onnipatta dhavi?

SIKU na siku ninogumanana makattamiho ottiyana-ttiyana. Vina ninowanana mpaka apale vanwodhelihu. Mbwenye nigakala awojeyene ninorutxiwa owanana makattamiho ehu na mukalelo wofwanyelela, kanidduwale wi wojeya onowinda guru dhehu vina onovugula wagalala wehu. Nona Gano 24:10 onloga: ‘Ogendeya guru vanfwanyiwewe segedho, murima wawo onodeba.’ Txibarenen wojeya ononinda guru ofiyedha ohikana ewodhelo yowanana makattamiho ehu.

2. Dhilobo gani dhinnitotela wojeya vina txini dhinasunze iyo mwari mwa mutoma obu?

² Iyo ninowojeya sabwa ya dhilobo dhinji dhinkosihu na esile dhinnikosela attu enna. Dhilobo esi dhintoteya sabwa ya ohiligana, maredda na dhawobana dhinna dhinnifwanya. Masaka meena okumuwa oku ondaga akala kanithomeliwe mabasa afunihu wi nikose mmutugumanoni mwa Nabuya Yehova obe olaleya murudda wa attu ahinfuna onivuruwa. Mwari mwa nsunzo ntti ninela wona mikalelo dhinanikamihedhe owanana wojeya, nigawanagana ohiligana vina dhawobana dhehu.

3. Txini enanikamihedhe okaana dhubuwelo dholigana muviriganani mwehu?

³ Enowodheya iyo okana dhubuwelo dhovirigana sabwa ya ohiligana vina dhawobana dhehu. Dhottega dhehu dhinofiyedha onubuweliha wi Yehova txipo kananittiye ovolowa mwilaboni eswa. Dhubuwelo esi sawopiha vaddiddi. Dhubuwelo gani dhinfwanyelihu okana mwari mwa dhovirigana dhehu?  Bibilia onologa wi mottiyana na Yezu iyo notene nili “athegi.” (Rom. 3:23) Yehova kanag’ana dhottega dhehu. Iyene onoziwa wi kinwodheya attu ottega wira dhotene dholiganavi. Ottiya ejo iyene Babi wokwela ontamela onikamihedha. Iyene ddovilela. Mulugu onowona guru enkosihu wi nipemberhe monlelo abure vina oli womala nawale wi anikamihedhe.—Rom. 7:18, 19.

4-5. Mowiwanana na 1 Joau 3:19, 20, txini yakamihedhile arogora aba eli owanana ekalelo ya wojeya?

⁴ Katanalela dhotagiha dha Debora na Maria. * Debora valiye mwana kaviwona ninga muttu-wene sabwa ya esile dhakosiwiye na attu ena. Iyene vina kasibiwa. Munuwiliye waviwona ninga muttu ohina ttima masiki akosaga dhilobo dhig’ono dhabure. Iyene waviwona ninga muttu onttega vopitta. Maria wahikana makattamiho akakene. Anamudhi aye amona ninga kaiye elobwene. Omamalelowa iyene wavyona ninga muttu wotowa ttima. Masiki mmaleliye osunza ebaribari, iyene waviwonavi ninga muttu ohifwanyela okala munamoona wa Yehova!

⁵ Arogora aba eli kattiyile omulabela Yehova. Sabwaya? Sabwani awene anperhekela Yehova makattamiho awa munlobeloni. (Masal. 55:22) Awene afiyedha ononelamo wi Babi wehu wokwela wa wirimu onoziwa makattamiho angumanihuna vina onoziwa mubuwelo wabure onnipatta. Ottiya ejo iyene vina onowona dhilobo dhaderetu dhili—mmirimani mwehu.—Kengesa 1 Joau 3:19, 20.

6. Txini enfwanyela okosa muttu oniyelela okosa yottega yakakene?

⁶ Masaka mena muttu onokosa guru dhotene wi anyanyale obure onkosiye, mbwenye sabwa yohiligana, agadha ogwela mubureni wakakene onokumuwa vaddiddi. Ebaribari wi ninokubanya nigakosa yottega. (2 Kor. 7:10) Mbwenye, masiki dhawene kaninfwanyela ovipwatteliha muladdu w’ovittonga nanya nubuwelaga wi: ‘Ddili muttegi wottabwaya; Yehova txipo kanaddilevele.’ Sabwani mobuwelo obu wopipirhiheya onodha onittukulela ottiya omulabela Yehova. Ninofwanyelela otanalela mazu alebiwe va Gano 24:10—‘ogendeya guru vanfwanyiwewe segedho, murima wawo onodeba. Ottiya ejo ninofwanyela “ologela omodhawene” na Yehova, modhela okosa nlobelo, vowi iyene onele onilevelela. (Iza. 1:18) Agona wi weyo otxinuwa na murima wotene onele owulevelela. Vina onofwanyela watamela anddimuwa a mmulogoni. Na ofwaseya awene anele oukamihedha ovadda wili mpaddi womuyani.—Tia. 5:14, 15.

7. Sabwaya jani kaninfwanyela wojeya akala ninowanana okosa ejile eli yaderetu?

 ⁷ Jean-Luc wa elabo y’o França, oli munddimuwa wa mulogo ohiloga mwaha wa abale anwanana wojeya, na mazu awi: “Muttu woligana vamentoni va Yehova kaiye oddule ohinvonya, mbwenye dduddule ontxinuwa dhottega dhaye bagana ohiyelela yottega yakene, vina ohinvipwatteliha muladdu.” (Rom. 7:21-25) Akala weyo onowanana dhawobana dhawo kunfwanyela ovipwatteliha muladdu. Kudduwale wi iyo notene nili attegi. Iyo notene ninotamela mahala a Yehova modhela mukutto wa yobolo.—Ef. 1:7; 1 Jo. 4:10.

8. Iyo nigojeya ninfwanyela omutamela ani wi anipangaraze?

⁸ Ninofwanyela watamela abali na arogora ehu—ali amudhihu omuyani—wi anilibihe! Iyo nigatamela ologa na awene anele onivuruwana nofwasa vina anele ologa mazu onipangarazana wi nikale olibene. (Gano 12:25; 1 Tes. 5:14) Joy murogora w’o Nigeriya onwana na makattamiho a wojeya ohiloga dhahi: “Miyo ddigagomeli wuvi kohikala abali omuyani? Nikamihedho ninddivaha abali na arogorha, nlagiho ninoniha wi Yehova onowakula malobelo aga. Ddisunza na awene wi ddinofwanyela walibiha attu ena ojeyile.” Masaka mena abali na arogorha kanziwa akala iyo ninufuna nipangarhazo. Nona ninofwanyela okala wotapuwa nawaddelaga dhinnizuzumiha vina nawaddele nikamihedho ninfunihu.

9. Masalmo 41:4 na 94:19 onilibiha dhavi?

⁹ Nimukumbirhe nikamihedho Yehova. Akala iya kaniniwamo deretu obe nina eredda ehiniwa murobwe, enorutxa okala wohagalalene. Masiki Yehova vahinkosiye matikiniho wi anivulumutxe masaka abano, iyene ononilibiha vina ononipamgarhaza wi nidhowegevi nimulabelaga. (Kengesa Masalmo 41:4; 94:19.) Motagiha iyene onowalabihedha abali wi anikamihedhe na mabasa ehu, obe anidhowele omusika. Vina onowalabihedha abali wi nikose nlobelo vamodha. Iyene onowodha onubuweliha dhilobo dhisunzilihu wale, obe okaana muyubuweloni mazu anfwanyeya mBibiliani; iyene onoruviha mmirimani mwehu njedhelo nowagalaliha n’okala mwilaboni eswa.—Rom. 15:4.

10. Txini emukamihedhe Isang ohikana murima w’osuveya mufwanyeliweyi ngovi?

¹⁰ Isang, w’o Nigeria wahifwanyiwa ngovi emuthukuleli oragala. Dotoro wahimwaddela wila kagawodhile vina wedda wili. Iyene ohiloga dhahi: “Miyo ddahisuveya murima vina ddahojeya.” Txini emukamihedhile ohikalavi wawojeyene? Iyene ohilogavi w, “Miyo na mwadhaga kanittiyile omulobelela Yehova vina omusunza Bibilia. Iyo ninotamaalela dhotene dhinnikosela Yehova, otaganyiha na nipikirhelona nikosile Yehova n’okala mwilaboni eswa.”

11. Cindy owodhile dhavi okaana wagalala bali muredda?

¹¹ Cindy onkala elabo yo Mexiko wahaaddeliwa na dotoro wila okana eredda egamuthukulele okwa. Txini ekosileyi? Valiye osipitale wahikosa yogana yaye ya olaleya miselu dhapama masiku otene. Iyene ohileba: “Olaleya wanddikamihedha wang’ana dha musogorho ottiya okala wubuwelavi oredda waga. Mudhidhi waloga miyo na adotoro ddannavuzela sabwa ya anamudhi awa, ottiya ejo ddanavuza yattukuleli ofuna okosa mabasa orutxa a olaba onumbani wa egumi. Omalelowa ddanveda mitoma dhoddiginyana mirima dhawa. Aredda ena kaana elemelelo ya wavuzela ‘Mweddelo wa mabasa awa?’ Adotoro enjene andditamalela sabwa ya watanalela, omamalelowa ena anddivaha manumero awa  a muttitto. Masiki na makattamiho a oredda miyo ddantikina venjene sabwani Yehova wanddikamihedha okaana wagalala wa mmirimani!”—Gano 15:15.

12-13. Abale ali aredda anawodhe dhavi okosa mabasa a olaleya, vina anapurelemo nni?

¹² Abale ali aredda anokala awojeyene vowi kanwodha okosa ninga mwafunelani mmabasani olaleya. Enji anofiyedha ovaha onamoona waderettwene. Murogora dhahi onkuweliwa Laurel w’o Estados Unidos wantabuwa ofiyedha vyaka 37, na fero yekiwe mmadhadhuni mwaye wila awodhege ovuma. Ottiya ejo wahikana eredda ya cancer; wahikosiwa operasau dila dhinjene vina wahikana makattamiho a meena a opa wa ttebe. Masiki na makattamiho aba otene agumaniyena iyene kakalile womalene wanalaleya anamalaba a numba ya egumi vamodha na abaleya adha vatakulu-vaye. Yopurelamoya? Iyene wahakamihedha attu ofiyedha 17 okana eziwelo yawakwana ya Bibilia! *

¹³ Richard munddimuwa wa mulogo w’elabo y’o França, ohavaha zelu dha malago vaddiddi abale ali aredda osipitale obe vatakulu. “Iyene ohakokomeza wila anofwanyela wika manivuru vego vanoneya, wi attu onege, enodha opadduwa awene ofuna oziwa dhilimo. Eji enowalibiha abali na arogora okweleya anbulela ahinwodha odhowa olaleya numba na numba.” Abale ahinwodha obudduwa vatakulu anowodha olaleya alabihedhaga majangara obe telefoni.

14. Yotagiha gani yapama enittiyedhi Mwene David?

¹⁴ Dhikalawo dhozuzumiha dhinnittukulela iyo ohittomeliwa mabasa mmulogoni, ninga motagiha, makattamiho a eredda, onakalaba na dhorutxa dhina. Noona ninofwanyela osunza na yotagiha ya Mwene David. Mwiweliye wi kahiye iyene agammagele Nabuya musana, wahimukamihedha oddule wafuna osogorhana mabasaya. Iyene wahifiyedha omukamihedha mwawakwana muttu wasakuliwe wi eddihe mabasaya. David wahikamihedha mabasaya, masiki aziwaga wi kahiye iyene ottomeliwe mabasa omaga musana wa Nabuya. Eji yotagiha yaderetu enfwanyelihu ofwara!—2 Sam. 7:12, 13; 1 Map. 29:1, 3-5.

15. Mbali Hugues owodhile dhavi okwaranya wobana waye?

¹⁵ Sabwa ya makattamiho a eredda Hugues mbali w’o França wahittiya okala munddimuwa wa mmulogoni, vina kawodha okosa mabasa aye a vatakulu. Iyene ohila: “Voroma-vene miyo ddahojeya vaddiddi vina ddavyona ninga muttu wahana ttima. Mbwenye mudhidhi mwina ddahitanalela wi ddanfanyela  ovoona na monelo waderetu sabwa ya makattamiho abale, vina ddahubuwela wi ninofiya siku ninamulabelege miyo Yehova s’emakattamiho. Miyo ddigana ohiyelela mundduni. Dhahene ninga Jedeau na anyakoddo aye mazana mararu—ali olemene mbwenye ahidhowavi awanaga—miyo vina ddinkosa yakakene!”—Anam. 8:4.

16. Ninsunzavo eni na yotagiha yapama ya anju ororomeleya?

¹⁶ Anju ororomeleya yotagiha yaderetu. Nsaka nalamulela Mwene Akabe Yehova wahalabihedha anju wi amunyengette mwene oddule wabure. Anju awinjiva ahiviperheka wi avahe zelu dhawa. Mbwenye Yehova wamusakulile anju mmodha, sabwa ya monelo waye wofanyelela. (1 Amwe. 22:19-22) Anju enna ororomeleya ahifiyedha okala awojeya; txino ahubuwela ‘Ddavahelani monelo waga?’ Iyo kaninfanyeelela wattonga anju abale. Anju otene ali oviyeviha vina afuna anvahe nttittimiho notene Yehova.—Anam. 13:16-18; Ovuh. 19:10.

17. Txini enfwanyelihu okosa akala kannittomeliwa ettomo mmulogoni?

¹⁷ Ninofwanyeela ovaha ttima mabasa ehu a otxeniha nzina na Mulugu vina ovuwiha Omwene waye. Iyo ninovahiwa ettomo veli-veli enodha opadduwa iyo ottiyihiwa, noona niziweni wi kahiye ettomo enikaliha a ttima vamentoni va Yehova. Nigakala attu oviyeviha Yehova onele oziveliwa na iyo vina abalihu na arogora. Kamukumbirhe Yehova wi okamihedhe okala ofiyedheya na abali vina arogoraya; katanalela dhotagiha dha attu enji a oviyeviha ali mmaleboni. Ninolagiha wi nili attu oviyeviha, nigakamihedha abali ehu.—Masal. 138:6; 1 Ped. 5:5.

18-19. Ninawodhe dhavi okana ottaba mmabasani mwa olaleya masiki akala attuya a murudda onlaleyihu kannivuruwana?

¹⁸ Weyo onowojeya akala attu a mmuruddani munlaleyiwe kanuvuruwana obe akala kunafwanyetxamo? Akala pumwenemo, onawodhe okosa eni wi ottaba wawo odhowegevi vasongorho? Kafwanya malago mang’onovi ali mwari mwa kasha enna mutoma “ Mikalelo Dhowunuwihana Mabasa a Olaleya.” Jamakamaka ovaha ttima mabasa awo olaleya. Onakose dhavi?

¹⁹ Kadhowagavi olaleyaga nzina na Yehova na Omwene waye. Yezu wahiloga wi attu ang’onovi a mwilaboni bananfware. (Mt. 7:13,  14) Iyo nigakala mmabasani a olaleya ninokaana gari yolaba na Yehova, Yezu vina anju. (Mt. 28:19, 20; 1 Kor. 3:9; Ovuh. 14:6, 7) Yehova onowafiyedha anfuna okana mandano na iyene vina anfuna omulabela. (Jo. 6:44) Akala muttu kanfuna oniwa obe ovuruwana miselu dha omwene mudhidhene obule, enodha opadduwa iyene ofuna mudhidhi mwina.

20. Jeremiya 20:8, 9 onisunziha eni sabwa ya owanana wojeya?

²⁰ Enowodheya osunza na yotagiha ya namavuhulela Jeremiya. Iyene wattomeliwe olaleya murudda worutxa vaddiddi. Attu a murudda waye annimbedda vina animusutta “masiku etene.” (Kengesa Jeremiya 20:8, 9.) Iyene wahifiyedha wojeya mpaka wubuwela wi kanawodhe olaleya. Mbwenye kakalile dhawene. Sabwaya? ‘Mazu a Mulugu’ ali ninga motto mmirimani mwa Jeremiya, nona iyene kawodha omaalana! Yakakene enopadduwa na iyo nigadhaleliwa muyubuweloni mwehu na mmirimani mwehu Mazu a Mulugu. Eji ji sabwaya enfanyeelelihu omusunza Bibilia malabo etene vina otanaalelaga. Yopurelamoya enakale yawi, mabasa ehu a olaleya anela wakamihedha attu enji.—Jer. 15:16.

21. Iyo ninawodhe dhavi owanana wojeya ofiyedha opemberha?

²¹ “Wojeya futti yawopiha enlabihedha Satana.” Kamubuwele Debora ologiwe mundduni. Yehova ddwa guru onowodha otolotxa mirega dha Satana, egali dhawene, nigojeya sabwa ya elobo-txilobo, ninofwanyeela omulobelela Yehova wi anikamihedhe. Iyene onele onikamihedha owanana ohiligana vina dhawobana dhehu. Ottiya ejo iyene onela onikamihedha nigakala aredda vina onela onikamihedha okaana mobuwelo wapama sabwa ya mabasa a olaleya. Kamulobelele babi wawo wa wirimu ompangaga makattamiho awo etene anupatta, na nikamihedho naye, owodhe owanana ofiyedha opemberha wojeya.