1. Ki i kapab arive ler nou dekouraze?

TOU le zour, nou fer nou mye pour fer fas avek bann difikilte ki nou rankontre. Me i difisil pour fer fas avek nou bann problenm ler nou dekouraze parski dekourazman, i kapab fer nou mank konfidans, perdi nou lazwa e napa okenn kouraz. Proverb 24:10 i dir: “Si ou montre ou dekouraze dan letan maler, alor, ou [pou] napa bokou lafors.” Ler nou dekouraze, nou kapab santi ki nou napa lafors pour fer fas avek nou bann problenm.

2. Kwa ki kapab fer nou dekouraze e ki nou pou vwar dan sa lartik?

² I annan plizyer keksoz ki kapab fer nou dekouraze. Par egzanp, bann fot ki nou fer, nou bann febles oubyen problenm lasante. Oubyen nou kapab dekouraze akoz nou pa’n ganny en responsabilite ki nou ti anvi dan servis Zeova ouswa akoz nou pe anons sa bon nouvel dan en landrwa kot bokou dimoun pa ekout nou mesaz. Dan sa lartik, nou pou vwar serten keksoz nou kapab fer pour fer fas avek dekourazman.

3. Kwa ki kapab ed nou ler nou annan en move pwennvi lo nou lekor akoz nou lenperfeksyon?

³ I fasil pour nou annan en move pwennvi lo nou lekor akoz nou lenperfeksyon ek nou bann febles. Nou kapab krwar ki akoz nou bann febles, Zeova pa pou zanmen aksepte nou dan nouvo lemonn. I kapab danzere pour nou mazin koumsa. Ki mannyer nou devret konsider nou bann fot? Labib i dir ki apard ki Zezi, tou dimoun i “fer pese.” (Rom. 3:23) Me Zeova pa konsantre lo nou bann fot e i pa ekspekte ki nou parfe. O kontrer, i en Papa ki kontan nou e i anvi ed nou. Zeova i annan pasyans.  I vwar ki nou pe lalit avek nou bann febles e ki nou fer bokou zefor pour pa annan en move pwennvi lo nou lekor. Alor i pare pour ed nou.​—Rom. 7:18, 19.

4-5. Ki 1 Zan 3:19, 20 i dir ki ti ed de ser sirmont dekourazman?

⁴ Annou vwar legzanp Deborah ek Maria. * Ler Deborah ti ankor zanfan, son fanmir pa ti tret li avek lanmour e i pa ti ganny felisite souvan. Alor ler i ti vin adilt, i ti annan en move pwennvi lo son lekor. Ler i ti fer en pti fot, i ti santi ki i pa ti kapab fer nanryen byen. Maria ti annan preski menm problenm. Son fanmir ti abes li e sa ti fer li santi ki i pa vo nanryen. Menm apre ki i ti batize, i ti krwar ki i pa ti diny pour vin en Temwen Zeova.

⁵ Kantmenm sa, sa de ser pa ti aret servi Zeova. Akoz? Zot ti priy Zeova e zot ti dir li ki mannyer zot santi. (Ps. 55:22) Zot ti aprann ki nou Papa ki dan lesyel ki kontan nou, i konnen ki bann move keksoz ki nou’n pas ladan i kapab fer nou annan en move pwennvi lo nou lekor. I osi vwar nou bann bon kalite menm si nou krwar ki nou napa bann bon kalite.​—Lir 1 Zan 3:19, 20.

6. Ki en dimoun ki pe esey aret en move labitid i kapab fer si i repet menm fot?

⁶ Parfwa en dimoun ki pe esey aret en move labitid, i kapab repet menm fot e sa i kapab fer li dekouraze. Byensir, i normal pour nou santi nou koupab apre ki nou’n fer pese. (2 Kor. 7:10) Me nou pa devret santi nou sitan mal ki nou mazinen ki nou pa vo nanryen e ki Zeova pa pou zanmen pardonn nou. Sa i pa vre e i kapab fer nou aret servi Zeova. Rapel ki Proverb 24:10 i dir ki ler nou dekouraze, nou pou napa bokou lafors. Alor, “aranz keksoz” avek Zeova dan lapriyer e demann li pour pardonn nou. (Iza. 1:18, NWT) Ler Zeova i vwar ki ou’n vreman repantir, i pou pardonn ou. Osi al kot bann ansyen. Avek pasyans zot pou ed ou pour reganny ou lanmitye avek Zeova.​—Zak 5:14, 15.

7. Akoz nou pa devret dekouraze si nou pe lalit avek en move labitid?

⁷ En ansyen ki apel Jean-Luc e ki reste Lafrans, i dir bann ki pe esey aret en move labitid: “Pour Bondye, en dimoun drwat i pa en dimoun ki pa zanmen fer fot me i en dimoun ki regret son bann fot e i esey fer son mye pour li sanze.” (Rom. 7:21-25) Alor si ou pe lalit avek en move labitid, pa kondann ou lekor. Parski nou  tou nou fer fot e nou tou nou bezwen labonte ekstraordiner Bondye ki i donn nou atraver sa ranson.​—Efe. 1:7; 1 Zan 4:10.

8. Ler nou dekouraze, avek lekel nou kapab rod led?

⁸ Nou kapab al kot nou bann frer ek ser dan kongregasyon pour ganny lankourazman. Zot kapab ekout nou ler nou bezwen koze e zot kapab ankouraz nou. (Prov. 12:25; 1 Tesa. 5:14) Joy, en ser ki reste Nizerya e ki soufer akoz dekourazman i dir: “Ki mon ti pou fer san led mon bann frer ek ser! Zot en laprev ki Zeova i reponn mon bann lapriyer. Mon’n menm aprann avek zot ki mannyer pour ankouraz lezot ki dekouraze.” Kantmenm sa, nou bezwen gard antet ki nou bann frer ek ser pa toultan konnen ler nou bezwen lankourazman. Alor, petet nou pou bezwen al kot en frer oubyen ser matir e dir zot ki nou bezwen led.

9. Ki mannyer Psonm 41:3 ek 94:19 i ankouraz nou?

⁹ Rod led avek Zeova. Ler nou pa santi nou byen e sirtou ler nou malad pour en kantite letan, i kapab difisil pour nou reste pozitif. Ozordi, Zeova pa fer mirak pour geri nou me i rekonfort nou e donn nou sa lafors ki nou bezwen pour andire. (Lir Psonm 41:3, NWT *; 94:19.) Par egzanp, i kapab motiv nou bann frer ek ser pour ed nou fer serten travay kot nou lakour oubyen pour fer konmisyon. I kapab osi motiv nou bann frer pour priy ansanm avek nou. Oubyen i kapab fer nou rapel bann verse rekonfortan dan Labib, parey bann verse ki koz lo sa lespwar ki nou annan pour viv dan en nouvo lemonn kot napa maladi ek soufrans.​—Rom. 15:4.

10. Kwa ki ti fer Isang aret dekouraze apre son aksidan?

¹⁰ Isang, en frer ki reste Nizerya ti fer en aksidan ki ti fer li paralize. Son dokter ti dir li ki i pa pou zanmen mars ankor. Isang i dir: “Mon ti vreman sagren e mon ti dekouraze.” Me eski i ti kontinyen dekouraze? Non! Kwa ki ti ed li? I dir: “Mwan ek mon madanm pa ti zanmen aret priy Zeova e etidye son Parol. Nou ti osi anvi demontre nou rekonesans pour bann bon keksoz ki nou annan e sa i enkli sa lespwar pour viv dan nouvo lemonn.”

11. Ki mannyer Cindy ti gard son lazwa ler i ti vreman malad?

¹¹ Cindy, en ser ki reste Meksiko ti ganny dir par son dokter ki i annan en maladi ki kapab touy li. Ki mannyer i ti fer fas avek sa sityasyon? Ler i ti kot dokter, i ti fer li son lobzektif pour rann temwannyaz toulezour. I dir: “Sa ti ed mwan pour konsantre lo lezot dan plas konsantre lo mon loperasyon, lo mon douler oubyen lo mon soufrans. Ler mon ti koz avek bann dokter oubyen ners, mon ti demann zot konsernan zot fanmir. Apre mon ti demann zot akoz zot in swazir en travay sitan difisil. Apre sa, i ti pli fasil pour swazir en topik ki kapab enteres zot. Plizyer zot ti dir ki normalman bann pasyan pa demann zot konman zot sava. Zot ti remersye mwan pour sa lentere ki mon ti demontre dan zot. Serten zot ti menm donn mwan zot ladres oubyen nimero kontak. Mon ti konnen ki Zeova ti pou ed mwan  pandan sa moman difisil. Me mon ti sirprann avek sa kantite lazwa ki i ti donn mwan!”​—Prov. 15:15, NWT.

12-13. Ki mannyer bann frer ek ser aze oubyen ki malad i kapab anons sa bon nouvel e avek ki rezilta?

¹² Bann frer ek ser ki aze oubyen ki malad i kapab dekouraze akoz zot pa kapab anons sa bon nouvel parey zot ti ava kontan. Kantmenm sa, bokou zot in trouv bann fason pour anons sa bon nouvel. En ser ki apel Laurel e ki reste Leta-z-ini ti bezwen reste alonze pour 37 an dan en masin ki ed li respire. I ti osi ganny kanser, maladi lapo e i ti fer plizyer loperasyon. Me kantmenm i ti annan tou sa bann problenm, sa pa ti anpes li anons sa bon nouvel. I ti rann temwannyaz avek bann ners ek lezot travayer lasante ki ti vin kot son lakour. Ki ti rezilta? I’n ed omwen 17 dimoun pour aprann konn Zeova! *

¹³ Richard, en ansyen Lafrans i donn en bon sizesyon pour bann dimoun ki pa kapab kit zot lakour oubyen ki reste dan en lenstitisyon pour bann dimoun aze. Richard i dir: “Mon sizere ki zot met serten nou bann liv ek magazin lo en prezantwar. Ler dimoun i pase, zot pou vwar sa prezantwar e zot pou demann kestyon lo la. Sa bann konversasyon i kapab ankouraz nou bann frer ek ser ki nepli kapab al kazankaz.” Bann ki pa kapab kit zot lakour i kapab anons sa bon nouvel atraver bann let ek temwannyaz par telefonn.

14. Ki bon legzanp Lerwa David in kit pour nou?

¹⁴ I annan plizyer rezon akoz petet nou pa kapab ganny en serten privilez dan servis Zeova. Par egzanp, i kapab ki nou annan problenm lasante, nou tro vye oubyen i annan lezot rezon. Si nou dan en sityasyon parey, nou kapab aprann avek legzanp Lerwa David. David ti vreman anvi konstri tanp Bondye me Zeova ti swazir en lot dimoun pour konstri tanp. David ti donn tou son sipor sa enn ki Zeova ti’n swazir. I ti kontribye en kantite lor ek larzan pour sa proze. David i vreman en bon legzanp pour nou!​—2 Sam. 7:12, 13; 1 Kron. 29:1, 3-5.

15. Ki mannyer Hugues ti sirmont son dekourazman?

¹⁵ En frer Lafrans ki apel Hugues, ti aret servi konman en ansyen akoz problenm lasante. I pa ti ni menm kapab fer bann senp pti louvraz kot son lakour. I dir: “O konmansman, mon ti santi ki mon pa vo nanryen e mon ti vreman dekouraze.  Me apre en serten letan, mon ti vwar ki i ti vreman enportan pour mwan aret sagren akoz bann keksoz ki mon ti nepli kapab fer e mon ti trouv lazwa dan sa ki mon kapab fer dan servis Zeova. Mon determinen pour kontinyen fer sa ki mon kapab. Zis parey Gideonn ek son trwa san zonm ki ti byen fatige, mwan osi mon pou kontinyen lalit!”​—Ziz 8:4.

16. Ki nou kapab aprann avek legzanp bann lanz?

¹⁶ Bann lanz fidel i en bon legzanp pour nou. Par egzanp, pandan renny Lerwa Aab, Zeova ti demann bann lanz pour donn bann sizesyon lo ki mannyer pour anbet sa lerwa. Serten lanz ti donn zot sizesyon. Me Bondye ti swazir en lanz e i ti dir li ki son sizesyon ti pou reisi. (1 Rwa. 22:19-22, NWT) Eski bann lezot lanz fidel ti dekouraze e petet mazinen ki zot pa ti’n devret gaspiy zot letan pour donn en sizesyon. Nou napa okenn rezon pour krwar ki zot ti mazin koumsa. Bann lanz i annan bokou limilite e zot anvi tou loner i al pour Zeova.​—Ziz 13:16-18; Rev. 19:10.

17. Ki nou devret fer si nou sagren akoz nou napa serten privilez dan servis Zeova?

¹⁷ Gard antet ki nou annan sa privilez pour port non Bondye e pour koz lo son Rwayonm. Nou kapab ganny en nouvo servis oubyen nou kapab aret en servis, me pa sa ki fer nou presye pour Bondye. Si nou annan limilite, nou pou presye pour Zeova e pour nou bann frer ek ser. Alor, sipliy Zeova pour ed ou kontinyen annan limilite. Reflesir lo legzanp bann serviter Zeova dan lepase ki ti annan limilite. Toultan pare pour servi ou bann frer ek ser dan nenport fason ou kapab.​—Ps. 138:6, NWT; 1 Pyer 5:5.

18-19. Ki mannyer ou kapab trouv lazwa dan predikasyon menm si dimoun dan ou teritwar pa enterese avek sa bon nouvel?

¹⁸ Eski ou’n deza santi ou dekouraze akoz bann dimoun dan ou teritwar pa enterese avek sa bon nouvel oubyen akoz ou pa zwenn bokou dimoun kot lakour? Dan sa sityasyon, ki mannyer ou kapab gard ou lazwa oubyen ganny plis lazwa? I annan serten sizesyon pratik dan sa bwat “ Ki mannyer ou kapab annan plis lazwa dan sa travay predikasyon?” I osi enportan pour annan sa bon pwennvi lo sa travay predikasyon. Ki sa i vedir?

 ¹⁹ Gard antet ki rezon prensipal akoz nou anons sa bon nouvel i pour fer bann dimoun konn non Bondye ek son Rwayonm. Zezi ti dir klerman ki pa bokou dimoun ki pou trouv sa semen ki anmenn ver lavi. (Mat. 7:13, 14) Ler nou dan predikasyon, nou annan sa loner pour travay avek Zeova, Zezi ek bann lanz. (Mat. 28:19, 20; 1 Kor. 3:9; Rev. 14:6, 7) Zeova pe atir bann dimoun ki anvi servi li. (Zan 6:44) Alor si ozordi en dimoun pa anvi ekout nou mesaz petet i kapab ekout nou laprosenn fwa.

20. Ki Zeremi 20:8, 9 i montre nou konsernan sirmont dekourazman?

²⁰ Nou kapab aprann bokou avek legzanp profet Zeremi. Bann dimoun dan sa landrwa kot i ti bezwen anons mesaz Bondye pa ti ekout li. Zot ti ensilte li e sikann li. (Lir Zeremi 20:8, 9, NWT.) * En fwa, i ti sitan dekouraze ki i ti anvi aret anons mesaz Bondye. Me i pa ti fer li. Akoz? “Mesaz Zeova” ti parey en dife dan Zeremi e i pa ti kapab tenir! Nou osi nou kapab santi parey Zeremi si nou etidye Labib toulezour e reflesir lo la. Alor, nou pou ganny plis lazwa dan sa travay predikasyon e plis dimoun i kapab ekout nou.​—Zer. 15:16, NWT.

21. Ki mannyer nou kapab sirmont dekourazman?

²¹ Deborah, ki’n ganny mansyonnen pli boner, i dir: “Dekourazman i en zarm pwisan ki Satan i servi kont nou.” Me Zeova i pli pwisan ki Satan ek tou son bann zarm. Alor, ler ou dekouraze, sipliy Zeova pour ed ou. I pou ed ou fer fas avek ou bann lenperfeksyon ek febles. I pou ed ou ler ou malad. I pou ed ou annan en bon pwennvi lo bann privilez ki i annan dan son servis. I pou osi ed ou annan en pwennvi pozitif lo sa travay predikasyon. An plis, devid ou leker avek ou Papa ki dan lesyel. Avek son led, ou pou kapab sirmont dekourazman.