1. ¿Bajcheʼ miʼ ticʼlañonla jiñi chʼijyemlel?

TI LAC pejtelel an lac wocol tac, i ti jujumpʼejl qʼuin mi lac chaʼlen wersa chaʼan mi lac lʌtʼ. I ñumen wocolto mi lac ñusan cheʼ bʌ mi la cubin lac chʼijyemlel. Jiñi chʼijyemlel miʼ chilbeñonla lac tijicñʌyel yicʼot miʼ yʌqʼueñonla la cubin chaʼan maʼañix laj cʼʌjñibal. Cheʼ bajcheʼ miʼ yʌl Proverbios 24:10: «Mi mach chʼejletic tiʼ yorajlel wocol tsʼitaʼ jach a pʼʌtʌlel».

2. a) ¿Chuqui tac mejl bʌ i yʌqʼueñonla lac chʼijyemlel? b) ¿Chuqui mi caj la cʌl ti ili estudio?

² An cabʌl mejl bʌ i yʌqʼueñonla lac chʼijyemlel. Jumpʼejl ejemplo, tajol cheʼ bʌ mi lac ñaʼtan mach tac bʌ weñic ti lac tojlel o cheʼ bʌ mi lac mel mach tac bʌ weñic, cheʼ bʌ mi laj cʼamʼan, cheʼ bʌ maʼañic mi la cʌqʼuentel jumpʼejl eʼtel (troñel) tiʼ yorganización Jehová o cheʼ bʌ yaʼ ti lac territorio mach yomic i ñʌchʼtañob jiñi lac subtʼan. Ti ili estudio, mi caj la cʌl chuqui miʼ mejlel lac mel chaʼan mi laj cʌy la cubin lac chʼijyemlel.

3. ¿Chuqui mi caj i coltañonla chaʼan maʼañic mi laj cʌlʌx ñaʼtan jiñi mach tac bʌ weñic ti lac tojlel yicʼot jiñi mach tac bʌ weñic tsaʼ lac mele?

³ Mi tsaʼ laj cʌlʌx ñaʼta jiñi mach tac bʌ weñic ti lac tojlel yicʼot jiñi mach tac bʌ weñic tsaʼ lac mele, mach ñumen weñix mi caj la cubin lac bʌ yicʼot mi caj lac ñaʼtan chaʼan Jehová maʼañic baqui ora mi caj i yʌcʼonla ochel yaʼ ti tsijiʼ bʌ pañimil. Mi cheʼ mi laj cʌlʌx ñaʼtan, miʼ mejlel i ticʼlañonla. ¿Chuqui mi caj i coltañonla? I sujmʌch chaʼan ti lac pejtelel xmulilonla, cojach Jesús mach xmulilic (Ro. 3:23). Pero Jehová mach jiñic miʼ qʼuel jiñi mach tac bʌ weñic mi lac mel yicʼot maʼañic miʼ pijtan chaʼan tojonla. Jehová jiñʌch juntiquil lac Tat muʼ bʌ i wen cʼuxbiñonla yicʼot yujil bʌ pijt. Yujil chaʼan mi lac chaʼlen wersa lac mel chuqui wen yicʼot chaʼan maʼañic miʼ ñumel ti pʼis jiñi muʼ bʌ lac  ñaʼtan ti lac tojlel, i Jehová mucʼʌch i coltañonla cheʼ bʌ i cʼʌjñibal lac chaʼan (Ro. 7:18, 19).

4, 5. Cheʼ bajcheʼ miʼ yʌl 1 Juan 3:19, 20, ¿chuqui tsiʼ colta Deborah yicʼot María chaʼan miʼ cʌy i yubiñob i chʼijyemlel?

⁴ Laʼ laj qʼuel jiñi ejemplo i chaʼan Deborah yicʼot María. * Cheʼ bʌ Deborah alʌ xchʼocto, jiñi i familia maʼañic tsiʼ wen pʌsbe cʼuxbiya yicʼot maʼañic tsiʼ wen subeyob utsʼatax bʌ tʼan. Jin chaʼan, cʼuxʌch tiʼ pusicʼal tsiʼ yubi, i tiʼ caj jiñi, mach weñic chuqui tsaʼ caji i ñaʼtan tiʼ tojlel. Cheʼ bʌ miʼ tsʼitaʼ mel mach bʌ weñic, maʼañic i cʼʌjñibal miʼ yubin i bʌ. María lʌcʼʌ cheʼ tsiʼ ñusa jaʼel. Jiñi i familia cabʌl chuqui tsiʼ mele tsaʼ bʌ i yʌqʼue i yubin chaʼan maʼañic i cʼʌjñibal. Cheʼto jaʼel, cheʼ bʌ chʼʌmʌlix i chaʼan jaʼ, wocolto tsiʼ yubi cheʼ bʌ miʼ pejcʌntel tiʼ testigo Jehová.

⁵ Anquese tsiʼ ñusayob ili wocol, ili hermanajob maʼañic tsiʼ cʌyʌyob i melben i yeʼtel Jehová. ¿Chuqui tsiʼ coltayob? Jiñʌch cheʼ bʌ tsiʼ chʌn meleyob oración chaʼan miʼ yʌqʼueñob tiʼ cʼʌb Jehová jiñi i wocolob (Sal. 55:22). Tsiʼ chʼʌmbeyob i sujm chaʼan jiñi cʼuxbibil bʌ lac Tat Jehová yujil chaʼan jiñi tsaʼ tac bʌ lac ñusa ti wajali miʼ mejlel i yʌcʼ chaʼan mi lac ñaʼtan mach tac bʌ weñic ti lac tojlel. I Jehová jaʼel mucʼʌch i qʼuel jiñi wen tac bʌ chuqui mi lac mel, anquese joñonla maʼañic mi lac taj laj qʼuel (pejcan 1 Juan 3:19, 20).

6. ¿Bajcheʼ miʼ mejlel i yubin i bʌ juntiquil muʼ bʌ i chaʼ mel mach bʌ weñic?

⁶ Mi juntiquil woli (choncol) i chaʼlen wersa i cʌy i mel jiñi mach bʌ weñic pero miʼ chaʼ mel, miʼ mejlel i yubin i chʼijyemlel. I tilelʌch cheʼ mach weñic mi la cubin lac bʌ cheʼ bʌ mi lac mel jumpʼejl mulil (2 Co. 7:10). Pero mach yomic miʼ cʼotel lac ñaʼtan iliyi: «Maʼañic j cʼʌjñibal, Jehová maʼañic baʼ ora mi caj i ñusʌbeñon c mul». Mach weñic cheʼ bʌ mi lac ñaʼtan iliyi come miʼ mejlel i yʌcʼ chaʼan mi lac ñajtʼesan lac bʌ ti Jehová. Cheʼ jaʼel, laʼ laj cʼajtesan chaʼan Proverbios 24:10 miʼ yʌl chaʼan mi mach chʼejloñicla o chʼijyem mi la cubin lac bʌ tiʼ yorajlel wocol tsʼitaʼ jach lac pʼʌtʌlel. Jin chaʼan, «laʼ lac tem chaʼlen tʼan» yicʼot Jehová cheʼ bʌ mi lac pejcan ti oración chaʼan mi laj cʼajtiben chaʼan miʼ ñusan lac mul (Is. 1:18). Jehová mi caj i qʼuel chaʼan comʌch laj cʌy jiñi lac mul, i mi caj i ñusʌbeñonla. Cheʼ jaʼel, laʼ lac pejcañob jiñi ancianojob come mi caj i coltañoñobla lac chaʼ pʼʌtʼan tiʼ chaʼan bʌ Dios (Stg. 5:14, 15).

7. ¿Chucoch mach yomic mi la cubin lac chʼijyemlel mi woli lac chaʼlen wersa laj cʌy lac mel mach bʌ weñic?

⁷ Juntiquil anciano chʼoyol bʌ ti Francia i cʼabaʼ Jean-Luc miʼ suben ili tʼan tac jiñi woli (yʌquel) bʌ i chaʼleñob wersa i cʌyob i mel mach bʌ weñic: «Tiʼ wut Jehová, juntiquil toj bʌ quixtañu  mach jiñic jiñi mach bʌ añic miʼ taj i mul jiñʌch cʼux bʌ i pusicʼal miʼ yubin cheʼ bʌ miʼ cʼotel i mel mach bʌ weñic yicʼot miʼ chaʼlen wersa i qʼuextan bajcheʼ yilal miʼ chaʼlen» (Ro. 7:21-25). Jin chaʼan, mach lac ñaʼtan chaʼan maʼañic baqui ora mi caj i mejlel lac tojʼesan bajcheʼ yilal mi lac chaʼlen. Laʼ laj cʼajtesan chaʼan ti lac pejtelel mi lac mel mach bʌ weñic, pero Jehová wen miʼ qʼuelonla come miʼ pʼuntañonla yicʼot tsiʼ yʌcʼʌ i yalobil chaʼan i tojol lac mul (Ef. 1:7, Jini wen bʌ tʼan; 1 Jn. 4:10).

8. ¿Majquiyob miʼ mejlel laj cʼajtibeñob i coltaya cheʼ baʼ ora chʼijyem mi la cubin lac bʌ?

⁸ Miʼ mejlel laj cʼajtiben jiñi la quermañujob chaʼan miʼ coltañoñobla cheʼ bʌ mi lac ñusan wocol. Mucʼʌch caj i ñuqʼuesañob lac pusicʼal yicʼot mucʼʌch caj i ñʌchʼtañoñobla cheʼ bʌ i cʼʌjñibal lac chaʼan (Pr. 12:25; 1 Ts. 5:14). Juntiquil hermana chʼoyol bʌ ti Nigeria i cʼabaʼ Joy, am bʌ i chaʼle wersa chaʼan miʼ cʌy i yubin i chʼijyemlel, miʼ yʌl: «¿Bajcheʼ yilalon cheʼ machic an quermañujob? Jiñʌch muʼ bʌ i cʼʌn Jehová chaʼan miʼ jacʼ coración. Cheʼ jaʼel, jiñi hermanojob an i cʌntesayoñob bajcheʼ miʼ mejlel c ñuqʼuesʌbeñon i pusicʼal jiñi chʼijyemoʼ bʌ». Pero yom mi lac ñaʼtan chaʼan jiñi la quermañujob mach tiʼ pejtelelic ora mi caj i qʼuelob ti lac wut chaʼan la com miʼ ñuqʼuesʌntel lac pusicʼal. Jin chaʼan, an i tajol joñonla yom mi lac pejcan jiñi hermanojob o jiñi hermanajob pʼʌtʌloʼ bʌ tiʼ chaʼan bʌ Dios chaʼan mi lac subeñob chaʼan la com coltʌntel.

9. ¿Bajcheʼ miʼ ñuqʼuesan lac pusicʼal muʼ bʌ i yʌl Salmo 41:3 yicʼot 94:19?

⁹ Laʼ laj cʼajtiben Jehová chaʼan miʼ coltañonla. Wocolʌch chaʼan tijicñayonla cheʼ bʌ cʼamonla, ñumento cheʼ bʌ wen tsʌts jiñi laj cʼamʌjel. Jehová maʼañic mi caj i mel jumpʼejl milagro ili ora chaʼan miʼ lajmesan jiñi laj cʼamʌjel, pero mucʼʌch i ñuqʼuesan lac pusicʼal yicʼot miʼ yʌqʼueñonla lac pʼʌtʌlel chaʼan mi laj cuch (pejcan Salmo 41:3; 94:19). ¿Bajcheʼ miʼ mel? Tajol miʼ ñijcʌben i pusicʼal jiñi hermanojob chaʼan miʼ cʼajtibeñoñobla mi an chuqui la com miʼ mʌmbeñoñobla o chaʼan miʼ melob yan tac bʌ eʼtel ti la cotot. Cheʼ jaʼel, miʼ mejlel i ñijcʌben i pusicʼal jiñi la quermañujob chaʼan miʼ melob oración yicʼotonla. I Jehová miʼ mejlel i cʼajtesʌbeñonla jiñi utsʼatax bʌ tʼan tac bʌ am bʌ ti Biblia, cheʼ bajcheʼ jiñi lac pijtaya chaʼan weñix mi caj lac chumtʌl yaʼ ti tsijiʼ bʌ pañimil baqui maʼañix miʼ cajel laj cʼaman (Ro. 15:4).

10. ¿Chuqui tsiʼ colta Isang chaʼan miʼ cʌy i yubin chʼijyemlel cheʼ bʌ tsiʼ taja accidente?

¹⁰ Isang, chʼoyol bʌ ti Nigeria, tiʼ caj jumpʼejl accidente tsaʼ subenti ti doctor chaʼan maʼañix baqui ora mi caj i chaʼ mejlel ti xʌmbal. Miʼ yʌl: «Wen chʼijyem tsaʼ cubi c bʌ». ¿Chuqui tsiʼ colta chaʼan miʼ cʌy i yubin chʼijyemlel? Isang miʼ yʌl: «Joñon quicʼot quijñam maʼañic tsaʼ j cʌyʌ c pejcan lojon Jehová ti oración yicʼot tsaʼ c wen ñaʼta lojon muʼ bʌ i yʌl jiñi i Tʼan. Cheʼ jaʼel, tsaʼ lon cʌcʼʌ ti lon c jol chaʼan mi lon cʌqʼuen wocolix i yʌlʌ Jehová chaʼan pejtelel jiñi am bʌ lon c chaʼan, yaʼ bʌ ochem jiñi pijtaya chaʼan mi caj lac chumtʌl ti jiñi tsijiʼ bʌ i pañimil Dios».

11. ¿Chuqui tsiʼ yʌqʼue i yubin i tijicñʌyel Cindy anquese wen cʼam?

¹¹ Cindy, chumul bʌ ti México, tsaʼ subenti ti doctor chaʼan an i chaʼan jumpʼejl cʼamʌjel mejl bʌ i tsʌnsan. ¿Bajcheʼ tsiʼ lʌtʼʌ ili wocol? Cheʼ bʌ miʼ majlel ti hospital chaʼan miʼ chʼʌm tsʼac, tsiʼ chaʼle wersa i chaʼlen subtʼan ti jujumpʼejl qʼuin. Cindy miʼ tsʼijbun: «Ili tsiʼ coltayon chaʼan mic xucʼchocon c pensar ti jiñi yambʌlob i mach jiñic cheʼ bʌ mi caj chaʼlentel ti operar, cheʼ bʌ cʼux mi cubin j cʼamʌjel o cheʼ mach weñic mi cubin c bʌ. Ili jiñʌch tsaʼ bʌ c mele: Cheʼ tsaʼ c pejca jiñi doctorob o enfermerojob, tsaʼ j cʼajtibeyob bajcheʼ yilal añob i familia. Cheʼ jiñi, tsaʼ j cʼajtibeyob chucoch tsiʼ yajcayob jiñi eʼtel woli bʌ i melob. Cheʼ bajcheʼ jiñi,  mach wocolic tsaʼ cubi chaʼan mic taj temaj tac muʼ bʌ i mulañob. Cabʌlob tiʼ subeyoñob chaʼan mach tiʼ pejtelelic ora juntiquil xcʼamʌjel an i cʼajtibeyob bajcheʼ yilal añob, i cabʌlob tsiʼ yʌqʼueyoñob wocolix cʌlʌ chaʼan tsaʼ j cʼajtibeyob. An tsaʼ bʌ i yʌqʼueñob i dirección yicʼot i número i celular. Cheʼ bʌ tsaʼ c ñusa ili tsʌts bʌ wocol, tsiʼ yʌcʼʌ ti toj sajtel c pusicʼal cheʼ bʌ Jehová tsiʼ yʌqʼueyon cubin cabʌl c tijicñʌyel» (Pr. 15:15).

12, 13. ¿Chuqui an i meleyob jiñi hermanojob chaʼan miʼ bej chaʼleñob subtʼan anquese cʼamob, ñoxobix, i chuqui an i tajayob?

¹² An hermanojob maʼañix bʌ miʼ wen mejlel i melbeñob i yeʼtel Jehová cheʼ bajcheʼ yomob tiʼ caj cʼamob o ñoxobix i jiñʌch muʼ bʌ i wen aqʼueñob i chʼijyemlel. Pero cabʌlob mucʼʌch i sʌclañob bajcheʼ miʼ mejlel i chaʼleñob subtʼan. Yaʼ ti Estados Unidos, juntiquil hermana i cʼabaʼ Laurel 37 jab ñupʼul tsaʼ ajñi ti jumpʼejl maquina i cʼabaʼ pulmón de acero tsaʼ bʌ i colta i jap icʼ. Cheʼ jaʼel, tsaʼ mʌjli i chaʼan jiñi cáncer yicʼot cabʌl operación, i tsaʼ loqʼui cabʌl cʼamʌjel tiʼ pʌchʌlel. Anquese jiñi hermana tsiʼ ñusa ili tsʌts bʌ wocol, maʼañic tsiʼ cʌyʌ subtʼan. Tiʼ sube i chaʼan bʌ Biblia jiñi enfermerojob yicʼot i yaj coltayajob muʼ bʌ cʼotelob tiʼ yotot chaʼan miʼ qʼuelob. Tsiʼ colta 17 wiñicob xʼixicob (quixtañujob) chaʼan miʼ sujtelob tiʼ testigo Jehová. *

¹³ Juntiquil anciano chʼoyol bʌ ti Francia i cʼabaʼ Richard miʼ suben ili tʼan tac jiñi maʼañobic bʌ miʼ mejlel i loqʼuelob tiʼ yotot o chumuloʼ bʌ ti jumpʼejl otot baqui miʼ cʌntʌntel jiñi ñoxobix bʌ: «Cʌyʌla jiñi lac jun tac baqui ajpan tsiquil chaʼan cheʼ bʌ miʼ ñumelob jiñi quixtañujob miʼ qʼuelob i miʼ cʼajtiñob. Ili miʼ mejlel i wen ñuqʼuesʌbeñob i pusicʼal jiñi cʼuxbibil bʌ la quermañujob mach bʌ muqʼuix i mejlelob i chaʼleñob subtʼan ti jujumpʼejl otot come miʼ coltañob chaʼan miʼ chaʼleñob tʼan yicʼot jiñi quixtañujob». Jiñi maʼañobic bʌ miʼ mejlel i loqʼuelob tiʼ yotot miʼ mejlel i chaʼleñob subtʼan jaʼel ti carta yicʼot ti teléfono.

14. ¿Chuqui wem bʌ ejemplo tsiʼ pʌsbeyonla jiñi rey David?

¹⁴ Tajol la com chaʼan mi la cʌqʼuentel jumpʼejl eʼtel yaʼ ti laj congregación o ti lac circuito. Pero an tacʌch chucoch maʼañic mi la cʌqʼuentel jiñi eʼtel, jumpʼejl ejemplo tajol chaʼan lac jabilel, chaʼan mach cʼocʼonla o chaʼan yan tac bʌ. Mi cheʼʌch miʼ yujtel, miʼ mejlel i coltañonla jiñi i yejemplo jiñi rey David. Tsiʼ mulaj i melben i templo Dios, pero cheʼ bʌ tsaʼ subenti chaʼan mach jiñic tsaʼ bʌ yajcʌnti chaʼan miʼ mel, tsaʼʌch i wen colta jiñi tsaʼ bʌ yajcʌnti ti Dios. I tsiʼ wen acʼʌ oro yicʼot plata. ¡Wem bʌ ejemplo tsiʼ pʌsbeyonla jiñi rey David! (2 S. 7:12, 13; 1 Cr. 29:1, 3-5).

15. ¿Bajcheʼ tsiʼ cʌyʌ i yubin i chʼijyemlel juntiquil hermano?

 ¹⁵ Juntiquil hermano chʼoyol bʌ ti Francia i cʼabaʼ Hugues tsiʼ cʌyʌ i mel jiñi eʼtel bajcheʼ anciano tiʼ caj tsiʼ taja cʼamʌjel tac. Maʼañic tsaʼ mejli i mel jiñi eʼtel tac mach bʌ wen tsʌtsic tiʼ yotot. Miʼ tsʼijbun: «Ti ñaxan, tsaʼ c wen ubi c chʼijyemlel i maʼañic i cʼʌjñibal tsaʼ cubi c bʌ. Pero tsaʼ cʼoti c ñaʼtan chaʼan mach yomic chʼijyemon tiʼ caj jiñi mach tac bʌ mejlix c mel yicʼot chaʼan yom tijicñayon chaʼan jiñi mejlixto bʌ c mel tiʼ yeʼtel Jehová. Maʼañic mi caj cʌcʼ chaʼan miʼ mʌlbeñon (jotbeñon) jiñi c wocol. Lajalon bajcheʼ Gedeón yicʼot jiñi 300 i wiñicob: Anquese lujboñix, mi caj c chʌn chaʼlen wersa» (Jue. 8:4).

16. ¿Chuqui miʼ cʌntesañonla jiñi yejemplo jiñi ángelob?

¹⁶ Jiñi ángelob miʼ pʌsbeñonla wem bʌ ejemplo jaʼel. Ti jumpʼejl bʌ qʼuin, Jehová tsiʼ cʼajtibe jiñi ángelob chaʼan miʼ yʌlob bajcheʼ miʼ mejlel i lotintel jiñi jontol bʌ rey Acab. Cabʌl ángelob tsiʼ yʌlʌyob bajcheʼ miʼ mejlel i lotiñob jiñi rey Acab, pero Jehová tsaʼ jach i yajca tsaʼ bʌ i yʌlʌ juntiquil ángel i tiʼ sube chaʼan laʼ i mel bajcheʼ tsiʼ yʌlʌ come wen mi caj i mel (1 R. 22:19-22). ¿Tsaʼ ba i yubiyob i chʼijyemlel jiñi yambʌ ángelob i tsiʼ ñaʼtayob: «Lolom jach chuqui tsaʼ cʌlʌ»? Maʼañic tsiʼ ñaʼtayob jiñi. Jiñi ángelob miʼ pʌsob i pecʼlel i yomob chaʼan jiñʌch Jehová muʼ bʌ i yʌqʼuentel i ñuclel (Jue. 13:16-18; Ap. 19:10).

17. ¿Chuqui yom mi lac mel mi chʼijyemonla mi la cubin lac bʌ come maʼañic an aqʼuentiyonla jumpʼejl eʼtel tiʼ yorganización Jehová?

¹⁷ Ñumen ñuc bʌ i cʼʌjñibal jiñʌch cheʼ i testigojonla Jehová yicʼot cheʼ bʌ mi lac sub jiñi wen tʼan chaʼan i Yumʌntel Dios. Jiñi eʼtel tac muʼ bʌ la cʌqʼuentel tiʼ yorganización Jehová miʼ mejlel laj qʼuextʌbentel. Pero ñumen ñuc bʌ i cʼʌjñibal miʼ qʼuel Jehová yicʼot jiñi la quermañujob mach jiñi chuqui ti eʼtel mi lac mel jiñʌch cheʼ mi lac pʌs lac pecʼlel. Jin chaʼan, laʼ laj cʼajtiben Jehová chaʼan miʼ coltañonla lac chʌn pʌs lac pecʼlel. Laʼ lac wen ñaʼtan jiñi wem bʌ ejemplo tac muʼ bʌ i yʌjlel yaʼ ti Biblia chaʼan jiñi wiñicob xʼixicob tsaʼ bʌ i pʌsʌyob i pecʼlel yicʼot laʼ laj coltan yicʼot lac tijicñʌyel jiñi la quermañujob cheʼ bajcheʼ cʼamel mejlonla (Sal. 138:6; 1 P. 5:5).

18, 19. ¿Chuqui miʼ mejlel i coltañonla chaʼan chʌn tijicñayonla mi lac chaʼlen subtʼan ti jumpʼejl territorio baqui maʼañic miʼ wen ñʌchʼtañoñobla?

¹⁸ ¿Muʼ ba lac ñumel ti subtʼan baqui wocolʌch chaʼan mi lac taj jiñi lac piʼʌlob tiʼ yototob o chaʼan miʼ ñʌchʼtañoñobla? Mi ili miʼ yʌqʼueñonla  lac chʼijyemlel, ¿chuqui miʼ mejlel lac mel chaʼan chʌn tijicña mi la cubin lac bʌ? Jiñi recuadro: « ¿Bajcheʼ miʼ mejlel lac ñumen ubin lac tijicñʌyel ti subtʼan?», mi caj i subeñet chaʼpʼej uxpʼejl chuqui tac miʼ mejlel a mel. Cheʼ jaʼel, an ñumen ñuc bʌ i cʼʌjñibal yom bʌ mi lac ñaʼtan chaʼan jiñi subtʼan. ¿Baqui bʌ?

¹⁹ Laʼ laj cʼajtesan chaʼan jiñi ñumen ñuc bʌ i cʼʌjñibal jiñʌch cheʼ mi lac sub i cʼabaʼ Dios yicʼot i Yumʌntel. Jesús tsiʼ yʌlʌ chaʼan tsʼitaʼ jach jiñi quixtañujob muʼ bʌ caj i tajob jiñi bij muʼ bʌ i pʌyonla majlel lac taj laj cuxtʌlel (Mt. 7:13, 14). Cheʼ jaʼel, cheʼ bʌ mi lac loqʼuel ti subtʼan mi lac tem chaʼlen eʼtel la quicʼot Jehová, Jesús yicʼot jiñi ángelob (Mt. 28:19, 20; 1 Co. 3:9; Ap. 14:6, 7). Cheʼ jaʼel, Jehová jiñʌch muʼ bʌ i pʌy tilel tiʼ yorganización jiñi yomobʌch bʌ i chʼujutesan (Jn. 6:44). Jin chaʼan, tajol juntiquil quixtañu maʼañic miʼ ñʌchʼtan lac subtʼan ili ora, pero mucʼʌch caj i mel cheʼ baʼ ora mi lac chaʼ pejcan.

20. Cheʼ bajcheʼ miʼ yʌl Jeremías 20:8, 9, ¿chuqui mi caj i coltañonla chaʼan mi laj cʌy la cubin lac chʼijyemlel?

²⁰ Cabʌl chuqui miʼ mejlel laj cʌn tiʼ tojlel jiñi xʼaltʼan Jeremías. Tsiʼ chaʼle subtʼan baqui maʼañic miʼ wen ñʌchʼtañob. Jiñi wiñicob xʼixicob tiʼ subeyob mach tac bʌ weñic yicʼot tsiʼ wajleyob ti ‹bele ora› (pejcan Jeremías 20:8, 9). Tsiʼ wen ubi chʼijyemlel i colelix i cʌy i chaʼlen subtʼan. Pero maʼañic tsiʼ cʌyʌ i chaʼlen subtʼan. ¿Chucoch? Jeremías tiʼ tsictesa chaʼan ‹tiʼ pusicʼal tsaʼ caji i yubin i tʼan› Jehová cheʼ bajcheʼ cʼajc woli bʌ ti lejmel mach bʌ mejlic i lʌtʼben i ticwʌlel. I lajal mi caj la cujtel mi mucʼʌch lac pejcan jiñi Biblia ti jujumpʼejl qʼuin yicʼot mi lac wen ñaʼtan muʼ bʌ i yʌl. Cheʼ jiñi, ñumen tijicñayonla mi caj la cubin lac bʌ ti subtʼan i tajol cabʌlob mi caj i ñʌchʼtañoñobla (Jer. 15:16).

21. ¿Bajcheʼ miʼ mejlel laj cʌy la cubin lac chʼijyemlel?

²¹ Deborah, jiñi tsaʼix bʌ lac taja ti tʼan ti párrafo 4, miʼ yʌl: «Jiñi chʼijyemlel jiñʌch jumpʼejl pʼʌtʌl bʌ eʼtijib muʼ bʌ i cʼʌn Satanás». Pero Satanás yicʼot jiñi eʼtijib tac muʼ bʌ i cʌn maʼañic chuqui miʼ mejlel i tumben Jehová. Jin chaʼan, mach yʌlʌyic jiñi muʼ bʌ i yʌqʼueñonla lac chʼijyemlel, laʼ lac suben Jehová bajcheʼ yubil mi la cubin lac bʌ yicʼot laʼ laj cʼajtiben chaʼan miʼ coltañonla. Jehová mi caj i coltañonla cheʼ bʌ mi lac ñaʼtan mach tac bʌ weñic ti lac tojlel yicʼot cheʼ bʌ mi lac mel mach tac bʌ weñic, mi caj i coltañonla cheʼ bʌ cʼamonla, cheʼ bʌ maʼañic mi la cʌqʼuentel jumpʼejl eʼtel tiʼ yorganización Jehová, i cheʼ bʌ yaʼ ti lac territorio mach yomic i ñʌchʼtañob jiñi lac subtʼan. Tiʼ coltaya Jehová, miʼ mejlel laj cʌy la cubin lac chʼijyemlel.